Covid-19 R Factor: భారత్‌లో కరోనా R- ఫ్యాక్టర్‌పై ఆందోళన.. కేరళతోనే ముప్పు, వైద్య నిపుణుల హెచ్చరికలు

దేశంలో కరోనా ఆర్- ఫ్యాక్టర్ మళ్లీ పెరిగింది. ప్రస్తుతం ఇది 1 చేరుతుండటం ఆందోళన కలిగిస్తోంది. ఇది కరోనా ఇన్ ఫెక్షన్ వ్యాప్తిని తెలియేజేస్తోంది. కేరళలో అత్యధికంగా 1.11గా ఆర్ ఫ్యాక్టర్ ఉంది.

దేశంలో పెరిగిపోతున్న కరోనా ఆర్ ఫ్యాక్టర్

దేశంలో కొవిడ్-19 వ్యాప్తిని తెలియజేసే ఆర్‌-ఫ్యాక్టర్‌ (రీ ప్రొడక్షన్‌ రేట్‌) క్రమేపీ పెరుగుతోంది. ఇది 1కి చేరువవుతుండటం ఆందోళన కలిగిస్తోంది. ప్రధానంగా కేరళతో పాటు పలు ఈశాన్య రాష్ట్రాల్లో కరోనా తీవ్రత అధికంగా ఉంది. మెట్రో నగరాలైన పుణె, ఢిల్లీల్లోనూ ఆర్‌-ఫ్యాక్టర్‌ పెరుగుతున్నట్లు చెన్నైలోని ఇన్‌స్టిట్యూట్‌ ఆఫ్‌ మ్యాథమెటికల్‌ సైన్సెస్‌ పరిశోధకులు తెలిపారు.

1. దేశంలో కొవిడ్‌ రెండో దశ ఉద్ధృతి అత్యంత తీవ్రదశలో ఉన్నప్పుడు (మార్చి 9 - ఏప్రిల్‌ 21 మధ్య) ఆర్‌-ఫ్యాక్టర్‌ 1.37గా ఉండేది.
2. అనంతరం క్రమేపీ తగ్గుతూ మే 15 - జూన్‌ 26 మధ్య కాలంలో 0.78కి చేరింది. జులై నెలలో మళ్లీ పెరుగుదల మొదలైంది.
3. జులై 3 - 22 మధ్య కాలంలో ఇది ఏకంగా 0.95కి పెరగడం ఆందోళన పెంచుతోంది.

కొవిడ్‌-19 బారిన పడిన వారి నుంచి ఈ ప్రాణాంతక వైరస్‌ ఇతరులకు సంక్రమించే తీరును ఆర్‌-ఫ్యాక్టర్‌ తెలుపుతుంది. ఉదాహరణకు ఇది 0.95 ఉందంటే.. కొవిడ్‌ సోకిన ప్రతి 100 మంది ద్వారా వైరస్ ఇన్‌ఫెక్షన్‌ మరో 95 మందికి సోకుతుందని అర్థం. అదే 1 దాటితే పరిస్థితి తీవ్రమవుతుంది.

కేరళలో ఆర్‌-ఫ్యాక్టర్‌ ఏకంగా 1.11కి పెరిగింది. ఈశాన్య రాష్ట్రాలైన త్రిపుర, మణిపూర్‌ మినహా మిగిలిన అన్నిచోట్ల ఇది 1 దాటింది. మణిపూర్‌లో కూడా 1కి చేరువగా ఉంది. దేశంలోని మిగతా రాష్ట్రాలకు సంబంధించి ఉత్తరాఖండ్‌లోనూ ఇదే పరిస్థితి ఉంది. దీంతో వచ్చే రెండు వారాల్లో కొవిడ్‌ వ్యాప్తి ఈ ప్రాంతాల్లో పెరిగే ప్రమాదం ఉందని ఇన్‌స్టిట్యూట్‌ ఆఫ్‌ మ్యాథమెటికల్‌ సైన్సెస్‌ బృందానికి నేతృత్వం వహిస్తున్న సితభ్ర సిన్హా తెలిపారు.

ప్రత్యేక బృందం

దేశంలోని మొత్తం కరోనా యాక్టివ్ కేసుల్లో 37 శాతం (1.54 లక్షలు) ఉన్న కేరళకు కేంద్ర ప్రభుత్వం ఆరుగురు సభ్యుల ప్రత్యేక బృందాన్ని పంపుతోంది. వ్యాధుల నియంత్రణ జాతీయ కేంద్రం (ఎన్‌సీడీసీ) డైరెక్టర్‌ ఎస్‌.కె.సింగ్‌ నేతృత్వంలోని ఈ బృందం శుక్రవారం కేరళకు చేరుకొని కోవిడ్19 పాజిటివిటీ రేటు ఎక్కువగా ఉన్న జిల్లాల్లో పర్యటిస్తుంది.

వరుసగా మూడో రోజు (గురువారం) కేరళలో 22 వేలకు పైగా కొవిడ్‌ కేసులు నమోదయ్యాయి. రోజువారీ పాజిటివిటీ రేటు ఏకంగా 13.53 శాతం నమోదైంది. కేరళ రాష్ట్రంలో నమోదైన కరోనా కేసులతో కరోనా థర్డ్ వేవ్ ముప్పు వచ్చే అవకాశాలు సైతం ఉన్నాయని దేశీయ వైద్య నిపుణులు అలర్ట్ చేస్తున్నారు.

డెల్టా వేరియంట్..

దేశంలో కరోనా కేసులు పెరగడానికి డెల్టా వేరియంట్ విజృంభణ కూడా ఓ కారణమని తెలిసిందే. ప్రస్తుతం ఉన్న యాక్టివ్ కేసుల్లో చాలా వరకు డెల్టా వేరియంట్ ద్వారా నమోదైనవేనని తాజాగా నిర్వహించిన అధ్యయనాల్లో తేలింది. కరోనా కేసులు విపరీతంగా పెరుగుతన్న నేపథ్యంలో ప్రజలు కొవిడ్19 నిబంధనలు తప్పక పాటించాలని నిపుణులు హెచ్చరిస్తున్నారు. కరోనా నిబంధనలను లైట్ తీసుకుంటే మూడో వేవ్ మరింత ప్రమాదకరంగా ఉండొచ్చని ఇప్పటికే పలు అధ్యయనాలు వెల్లడించాయి.