Raj kundra: రాజ్ కుంద్రా అరెస్టు కేసులో శిల్పాశెట్టికి ఏం సంబంధం?

శిల్పా శెట్టి భర్త రాజ్ కుంద్రా  హట్ టాపిక్ అయిపోయారు. ఆయనకు వివాదలు కొత్తేమి కాదనుకోండి..  ఐపీఎల్‌లో రాజస్థాన్ రాయల్స్ జట్టు యజమానిగా ఉంటూ బెట్టింగ్‌కు పాల్పడి నిషేధం ఎదుర్కొన్న చరిత్ర ఉంది.  ఇప్పుడు పోర్న్ సినిమాల రూపకల్పనలో కీలక పాత్ర పోషిస్తూ.. వాటిని కొన్ని మొబైల్ యాప్స్‌లో రిలీజ్ చేస్తున్నట్లుగా అభియోగాలతో రాజ్ కుంద్రాను.. ముంబయి క్రైమ్ బ్రాంచ్ పోలీసుల చేతిలో అరెస్టవడం తెలిసిందే. ప్రస్తుతం ముంబయి పోలీసులు శిల్పాశెట్టిని ప్రశ్నిస్తున్నారు. 

బ్రిటన్‌లోని తన సమీప బంధువు ప్రదీప్‌ బక్షితో కలిసి రాజ్ కుంద్రా అశ్లీల చిత్రాల దందాను నిర్వహిస్తున్నట్లు వాట్సప్‌ గ్రూప్‌ చాటింగ్‌, ఈ-మెయిళ్ల ద్వారా వెల్లడైనట్లు ముంబయి పోలీసులు తెలిపారు. ప్రదీప్‌ బక్షికి బ్రిటన్‌లో కెన్రిన్‌ అనే నిర్మాణ సంస్థ ఉంది.

కుంద్రా బాలీవుడ్‌లో సినిమా అవకాశాల కోసం ప్రయత్నిస్తున్న యువతులు, మోడళ్లను అశ్లీల చిత్రాల్లో నటించేలా ఒప్పించి.. పోర్న్ మూవీస్ తీస్తున్నారని.. ఇందుకోసం ఏజెంట్ల ద్వారా కెన్రిన్ సంస్థ నిధులు సమకూర్చిందని.. చిత్రీకరణ తర్వాత కుంద్రా టీం వీడియోలను కెన్రిన్‌ సంస్థకు ఓ అప్లికేషన్‌ ద్వారా పంపిస్తోందని పోలీసులు చెబుతున్నమాట. భారత చట్టాలను తప్పించుకునేందుకు ఆ వీడియోలను బ్రిటన్‌ నుంచి హాట్‌షాట్స్‌ యాప్‌తో పాటు మరికొన్ని యాప్‌లలోనూ అప్‌లోడ్‌ చేస్తున్నట్టు తెలుస్తోంది..

ఈ పోర్న్ కంటెంట్‌ను చూసేందుకు  ఛార్జీలు వసూలు చేసేవారని.. దీని ద్వారా కుంద్రా కోట్ల రూపాయలు ఆర్జించాడని పోలీసులు వెల్లడించారు. ఈ వ్యవహారంపై ఓ బాధితురాలు ఫిర్యాదు చేయడంతో ఫిబ్రవరిలో కేసు నమోదైంది. ఇప్పటివరకూ ఈ కేసులో 11 మందిని అరెస్టు చేయడంతో పాటు రూ.7.5 కోట్లను సీజ్‌ చేసినట్లు పోలీసులు చెప్పారు. కుంద్రాపై నేరం రుజువైతే 7 ఏళ్ల వరకూ జైలు శిక్ష పడే అవకాశం ఉందని తెలుస్తోంది. అతడికి జులై 23 వరకూ కోర్టు పోలీస్‌ కస్టడీ విధించింది

సొసైటీలో పేరున్న వ్యక్తి, పైగా శిల్పా శెట్టి భర్త ఇలాంటి పనులు చేసి ఉంటాడా.. ఇవి తప్పుడు ఆరోపణలు అయ్యుంటాయేమో అని సందేహిస్తున్న వాళ్లూ ఉన్నారు. కానీ రాజ్ ఒక ప్రణాళిక ప్రకారమే పోర్నోగ్రఫీ రాకెట్ నడిపిస్తున్నాడని.. దీని వెనుక పెద్ద తతంగమే ఉందని ముంబయి పోలీసులు అంటున్నారు. 

అయితే రాజ్ కుంద్రాకు వ్యతిరేకంగా వినిపిస్తున్న గళాలు దాదాపుగా లేవు. ఒకరిద్దరు బాధితులమని తెరముందుకు వస్తున్నారు కానీ.. ఎక్కువగా మద్దతు లభిస్తోంది. పెద్ద సెలబ్రిటీలు సైలెంట్‌గా ఉంటున్నారు కానీ.. స్పందిస్తున్న ఎక్కువ మంది రాజ్ కుంద్రా చేస్తోంది తప్పు కాదని.. బిజినెస్సేనని.. పోర్న్‌కి.. ఎరోటిక్ ఫిల్మ్స్‌కు తేడా చూడాలని అంటున్నారు. రాజ్ కుంద్రా పోర్న్ మూవీస్ తీయలేదని.. ఎరోటిక్ మూవీస్ మాత్రమే తీస్తున్నారని చెప్పుకొస్తున్నారు.. చూడాలిక ఈ కథ ఎటు వెళ్తుందో..