Premalu OTT: ‘ప్రేమలు’ ఓటీటీ రిలీజ్ డేట్ ఫిక్స్ - స్ట్రీమింగ్ ఎప్పుడు, ఎక్కడంటే?

Premalu OTT Release: ఇటీవల కాలంలో చాలామంది ప్రేక్షకుల మనసు దోచుకున్న సినిమా ‘ప్రేమలు’. ప్రస్తుతం థియేటర్లలో సక్సెస్‌ఫుల్‌గా రన్ అవుతున్న ఈ మూవీ ఓటీటీ రిలీజ్ అప్డేట్ బయటికొచ్చింది.

Image Credit: Mamitha Baiju/Instagram

Premalu OTT Release Date: ప్రస్తుతం మాలీవుడ్‌లో మాత్రమే కాదు.. టాలీవుడ్‌లో కూడా ఎక్కడ చూసినా ‘ప్రేమలు’ గురించే మాట్లాడుకుంటున్నారు ప్రేక్షకులు. ఇదొక సింపుల్ క్యూట్ లవ్ స్టోరీనే అయినా యూత్‌ను విపరీతంగా ఆకట్టుకొని బ్లాక్‌బస్టర్ హిట్‌ను సాధించింది. ఇప్పటికీ ఎన్ని చిత్రాలు రిలీజ్ అవుతున్నా ‘ప్రేమలు’కు వెళ్తున్న ప్రేక్షకుల సంఖ్య ఏ మాత్రం తగ్గడం లేదు. థియేటర్లలో ఇంకా సక్సెస్‌ఫుల్‌గా రన్ అవుతున్నా కూడా అప్పుడే ఈ మూవీ ఓటీటీ రిలీజ్‌పై కీలక అప్డేట్ బయటికొచ్చింది. ఇక ‘ప్రేమలు’ను థియేటర్లలో మిస్ అయినవారు మాత్రమే కాదు.. థియేటర్లకు వెళ్లి చూసినవారు కూడా ఓటీటీ రిలీజ్ కోసం ఎదురుచూస్తున్నారు.

కార్తికేయ చేతుల మీదుగా..

ఇప్పటికే ‘ప్రేమలు’ మూవీ ఓటీటీ రైట్స్‌ను డిస్నీ ప్లస్ హాట్‌స్టార్ కొనుగోలు చేసింది. ఈ విషయాన్ని మేకర్స్ స్వయంగా ప్రకటించారు కూడా. కానీ ఓటీటీ రిలీజ్ డేట్‌పై పూర్తిస్థాయిలో క్లారిటీ లేదు. ప్రస్తుతం వినిపిస్తున్న కథనాల ప్రకారం మార్చి 29 నుండి డిస్నీ ప్లస్ హాట్‌స్టార్ స్ట్రీమింగ్ ప్రారంభించుకుంటుందని తెలుస్తోంది. ఇక ఈ మలయాళ చిత్రం టాలీవుడ్ బాక్సాఫీస్‌ను పూర్తిగా డామినేట్ చేసేసింది. దీనికి పోటీగా ఎన్ని తెలుగు సినిమాలు విడుదలయినా.. తెలుగు ప్రేక్షకులు మాత్రం ‘ప్రేమలు’కే ఎక్కువగా ఓటు వేశారు. ముఖ్యంగా ఈ చిత్రాన్ని తెలుగులో విడుదల చేయడానికి రాజమౌళి తనయుడు కార్తికేయ ముందుకు రావడం విశేషం.

కలెక్షన్స్ ఎంతంటే..?

‘ప్రేమలు’ తెలుగు రిలీజ్ కోసం కార్తికేయ బరిలోకి దిగడంతో దీని తెలుగు రిలీజ్‌కు మరింత క్రేజ్ లభించింది. తెలుగు ప్రేక్షకులకు కనెక్ట్ అయ్యేలా డైలాగ్స్ రాయడం కూడా మూవీకి ప్లస్ పాయింట్‌గా మారింది. మలయాళంలో హిట్ అయినా కూడా తెలుగు రిలీజ్ కోసం మళ్లీ ఓ రేంజ్‌లో ప్రమోషన్స్ చేసింది ‘ప్రేమలు’ టీమ్. ఇక దేశవ్యాప్తంగా ఈ చిత్రం రూ. 50 కోట్ల కలెక్షన్స్‌ను సాధించిందని సమాచారం. అతి తక్కువ బడ్జెట్‌తో తెరకెక్కించిన ఈ సినిమా.. అన్ని కోట్లు కలెక్ట్ చేసిందంటే ఇది ఇప్పటికే బ్లాక్‌బస్టర్ కేటగిరిలోకి చేరిపోయినట్టే. అంతే కాకుండా కేవలం తెలుగు రాష్ట్రాల్లోనే సినిమాకు రూ.1.43 కోట్ల కలెక్షన్ వచ్చిందని తెలుస్తోంది. తెలుగులోకి డబ్ అవ్వకముందే చాలామంది తెలుగు ప్రేక్షకులు దీనిని మలయాళంలోనే నేరుగా చూశారు కాబట్టి కలెక్షన్స్ ఆ రేంజ్‌లో ఉన్నాయని ఇండస్ట్రీ నిపుణులు చెప్తున్నారు.

క్రష్ లిస్ట్‌లోకి మమితా..

‘ప్రేమలు’లో హీరోగా నస్లీన్ నటించగా.. తనకు జంటగా మమితా బైజు కనిపించింది. ఇప్పటికే మమితాను చాలామంది తెలుగు యూత్ తమ క్రష్ లిస్ట్‌లో యాడ్ చేసేశారు. సింపుల్‌గా క్యూట్ లుక్స్‌తో ఒక కాలేజీ అమ్మాయిలాగా అందరినీ ఆకట్టుకుంది ఈ భామ. అందుకే తనకు తెలుగు ప్రేక్షకులలో వచ్చిన ఆదరణను గమనించి తనను నేరుగా టాలీవుడ్‌లో అడుగుపెట్టేలా చేయాలని మేకర్స్ ప్రయత్నాలు మొదలుపెట్టారు. ఇక టాలీవుడ్‌లోకి ఎంట్రీ ఇవ్వడంపై మమితా కూడా ఇంట్రెస్ట్ చూపిస్తోంది. విష్ణు విజయ్ తెరకెక్కించిన ఈ సినిమాలో వీరితో పాటు శ్యామ్ మోహన్, మీనాక్షి రవీంద్రన్, అఖిల భార్గవన్, అల్తాఫ్ సలీమ్, మాథ్యు థామస్, సంగీత్ ప్రతాప్ కూడా కీలక పాత్రల్లో నటించారు.