Priyanka Mohan: నేచురల్ స్టార్ మూవీలో ప్రియాంక ఫిక్స్! ‘గ్యాంగ్ లీడర్’ తర్వాత మళ్లీ జోడీ!

నేచురల్ స్టార్ నాని తర్వాతి చిత్రంలో చెన్నై బ్యూటీ ప్రియాంక అరుల్ మోహన్ హీరోయిన్ గా ఫిక్స్ అయినట్లు తెలుస్తోంది. వివేక్ ఆత్రేయ తెరకెక్కిస్తున్నఈ చిత్రాన్ని, డివివి దానయ్య నిర్మిస్తున్నారు.

ప్రియాంక మోహన్, నాని(Photo Credit: Nani/Priyanka Mohan/Instagram)

‘దసరా’తో బ్లాక్ బస్టర్ హిట్ కొట్టిన నేచురల్ స్టార్ నాని.. ‘హాయ్ నాన్న’ మూవీతో ప్రేక్షకుల ముందుకు వచ్చేందుకు సిద్ధమవుతున్నాడు. ‘దసరా’లో ఊరమాస్ లుక్ లో అలరించిన నాని, ఈ సినిమాలో ఓ పాపకు తండ్రిగా కనిపించబోతున్నాడు. శౌర్యువ్ దర్శకత్వంలో ఇప్పటికే షూటింగ్ కంప్లీట్ చేసుకున్న ఈ మూవీ, ప్రస్తుతం పోస్టు ప్రొడక్షన్ పనులు జరుపుకుంటోంది. డిసెంబర్ 7న ఈ సినిమా ప్రేక్షకుల ముందుకు రానుంది. ఈ సినిమాలో మృణాల్ ఠాకూర్ హీరోయిన్ గా నటిస్తుండగా, నాని కూతురిగా బేబి కైరా ఖన్నా కనిపించనుంది. శృతి హాసన్ ఓ ముఖ్యమైన పాత్రలో కనిపించబోతోంది. 

వివేక్ ఆత్రేయతో నాని మూవీ

‘హాయ్ నాన్న’  తర్వాత దర్శకుడు వివేక్ ఆత్రేయతో కలిసి నాని ఓ సినిమా చేయబోతున్నారు. ఇప్పటికే వీరిద్దరకు కలిసి ‘అంటే సుందరానికీ’ సినిమా చేశారు. ఈ సినిమా ప్రేక్షకులను అనుకున్న స్థాయిలో ఆకట్టుకోలేకపోయింది. అయినప్పటికే, వివేక్ తో మరో సినిమా చేయాలని నాని అప్పట్లోనే అనుకున్నారు. తాజాగా ఆయనతో సినిమా చేసేందుకు రెడీ అవుతున్నారు. ఈ సినిమాకు సంబంధించిన ప్రీప్రొడక్షన్ పనులు కూడా మొదలైనట్లు తెలుస్తోంది. ‘RRR’ నిర్మాత డివివి దానయ్య ఈ సినిమాను నిర్మించబోతున్నట్లు తెలుస్తోంది.

నాని మూవీలో హీరోయిన్ గా ప్రియాంక!

ఇక ఈ సినిమాలో హీరోయిన్ ను కూడా ఫిక్స్ చేసినట్లు ఇండస్ట్రీలో టాక్ నడుస్తోంది. చెన్నై బ్యూటీ ప్రియాంక అరుల్ మోహన్ ని హీరోయిన్ గా ఎంపిక చేశారట. ప్రస్తుతం ఈ ముద్దుగుమ్మ పవర్ స్టార్ పవన్ కల్యాణ్ ‘ఓజీ’ సినిమాలో నటిస్తోంది. సుజీత్ ఈ సినిమాను పాన్ ఇండియా చిత్రంగా  తెరకెక్కిస్తున్నారు.  ఇప్పటికే ప్రియాంక నానితో ఓ సినిమా చేసింది. ‘గ్యాంగ్ లీడర్’ చిత్రంలో నేచురల్ స్టార్ తో కలిసి నటించింది. తాజాగా మరోసారి నానితో రొమాన్స్ చేయబోతోంది. వాస్తవానికి వివేక్ చిత్రాల్లో హీరోయిన్ కు మంచి ప్రాధాన్యత ఉంటుంది. ఈ మూవీతో ప్రియాంకకు మరింత క్రేజ్ వచ్చే అవకాశం ఉందంటున్నారు సినీ జనాలు.

ప్రియాంకకు ఈ సినిమాలు కలిసి వచ్చేనా?

ప్రస్తుతం ప్రియాంక తమిళ సినిమా పరిశ్రమలో బాగా రాణిస్తోంది. అక్కడ వరుస సినిమాలతో ఫుల్ బిజీ అయ్యింది. తెలుగులోనూ వచ్చిన అవకాశాలను చక్కగా వినియోగించుకుంటుంది. వివేక్ తన తాజా చిత్రంలో హీరోయిన్ పాత్రకు ప్రియాంక బాగా సూట్ అవుతుందని భావించారట. అందుకే ఆమెను ఎంపిక చేశారట. ఈ సినిమాతో మంచి సక్సెస్ అందుకోవాలని దర్శకుడు, హీరో భావిస్తున్నారట. అటు ప్రియాంక కూడా ఈ సినిమాతో మంచి విజయాన్ని అందుకునే అవకాశం ఉందని అందరూ భావిస్తున్నారు. ఇక పవన్ కల్యాణ్ ‘ఓజీ’, నాని మూవీ 2024లోనే విడుదల కానున్నాయి. ఈ రెండు చిత్రాలు తన కెరీర్ కు టర్నింగ్ పాయింట్స్ గా మారే అవకాశం ఉందని ప్రియాంక భావిస్తుందట.  

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial