Devara 2: ‘దేవర‘ పార్ట్ 2 ఎలా ఉంటుందంటే? అసలు విషయం చెప్పేసిన ఎన్టీఆర్

Devara 2 Movie: భారీ అంచనాల నడుమ విడుదలైన ‘దేవర‘ ప్రేక్షకులను బాగానే ఆకట్టుకుంది. ఇప్పుడు ‘దేవర 2’ కోసం ఎదురు చూస్తున్నారు. ఈ నేపథ్యంలో ఎన్టీఆర్ కీలక విషయాలు చెప్పారు.

‘దేవర 2‘ పై ఎన్టీఆర్ ఇంట్రెస్టింగ్ కామెంట్స్

Source : Devara/X

NTR About Devara 2: ఎన్టీఆర్, కొరటాల శివ కాంబోలో తెరకెక్కిన ‘దేవర’ సినిమా కనీవినీ ఎరుగని అంచనాలతో గత నెల 27న ప్రేక్షకుల ముందుకు వచ్చింది. ఈ సినిమాకు ఓపెనింగ్స్ అద్భుతంగా వచ్చాయి. తొలి మూడు రోజుల్లో రికార్డ్‌ స్థాయి వసూళ్లు నమోదయ్యాయి. వీక్ డేస్‌లో కాస్త తగ్గినా, మళ్లీ పుంజుకున్నాయి.  ప్రస్తుతం ఈ సినిమా అనుకున్నట్లుగా ఆడుతోంది. 7 రోజుల్లో రూ.405 కోట్లు సాధించింది.

‘దేవర 2’పై ఎన్టీఆర్ ఆసక్తికర వ్యాఖ్యలు

‘దేవర’ సినిమాకు అద్భుత స్పందన లభించిన నేనథ్యంలో ‘దేవర 2’పై భారీగా అంచనాలు నెలకొన్నాయి. ఈ సినిమా ఎప్పుడెప్పుడు వస్తుందా? అని అభిమానులు ఎదురు చూస్తున్నారు. ఈ నేపథ్యంలోనే ఎన్టీఆర్ ‘దేవర 2’పై కీలక వ్యాఖ్యలు చేశారు. ది అసోసియేటెడ్ ప్రెస్ కు ఇచ్చిన ఇంటర్వ్యూలో ‘దేవర 2’ ఎలా ఉంటుందో వివరించే ప్రయత్నం చేశారు. “‘దేవర‘ పార్ట్ 1 బాగా ఆడుతున్నది. అంచనాలకు తగినట్లుగానే ఈ సినిమా మంచి ఆదరణ దక్కించుకుంటున్నది. ‘దేవర 2‘ ఇంకా అద్భుతంగా ఉండబోతోంది. తొలి భాగంతో పోల్చితే రెండో భాగం బిగ్గర్ గా, బెటర్ గా ఉంటుంది. ‘దేవర‘2 కోసం దర్శకుడు అద్భుతమైన స్టోరీ ప్లాన్ చేస్తున్నారు. సీక్వెల్ అంచనాలకు మించి ఉంటుంది. ‘దేవర 2’ కోసం ఆసక్తిగా ఎదురుచూస్తున్నాను” అని చెప్పుకొచ్చారు. మరోవైపు దర్శకుడు కొరటాలపై ఎన్టీఆర్ ప్రశంసలు కురిపించారు.  ‘బృందావనం’ మూవీతో తమ ప్రయాణం మొదలైందన్న ఆయన, తన ఫ్యామిలీలో ఒకరు అయ్యారని చెప్పుకొచ్చారు. ‘దేవర’ సినిమాతో తనతో మరింత సాన్నిహిత్యం పెరిగిందన్నారు.  

#Devara Part 2 will be BIGGER & BETTER 🔥🔥🔥🤙🏻🤙🏻🤙🏻 pic.twitter.com/48HzILBVI2

— Devara (@DevaraMovie) October 4, 2024

ఇంతకీ ‘దేవర 2’ వచ్చేది ఎప్పుడు?

‘దేవర’ బ్లాక్ బస్టర్ హిట్ కొట్టిన నేపథ్యంలో ఇప్పుడు అభిమానుల చూపు ‘దేవర’2 మీద పడింది. ఈ సినిమా ఎప్పుడు వస్తుందా? అని ఎన్టీఆర్ అభిమానులతో పాటు సినీ లవర్స్ ఆలోచిస్తున్నారు. అయితే, ‘దేవర 2’ ఇప్పట్లో వచ్చే అవకాశం కనిపించడం లేదు. ఈ సినిమా కోసం కాస్త గ్యాప్ తీసుకోవాలనే ఆలోచనలో ఎన్టీఆర్, కొరటాల ఉన్నట్లు తెలుస్తోంది. ఇప్పటికే ఎన్టీఆర్ బాలీవుడ్ మూవీ ‘వార్ 2’లో నటిస్తున్నారు. ఈ మూవీకి సంబంధించి కొంత షూటింగ్ పూర్తైంది. మరోవైపు ‘కేజీఎఫ్’ దర్వకుడు ప్రశాంత్ నీల్ తో కలిసి ఓ సినిమా చేయబోతున్నారు. ఈ సినిమా త్వరలోనే సెట్స్ మీదకు వెళ్లనుంది. ఈ రెండు సినిమాలు పూర్తయ్యే వరకు ‘దేవర 2’ ప్రారంభం అయ్యేది కష్టమే. మొత్తంగా ఈ సినిమా 2026 తర్వాత సెట్స్ మీదకు వెళ్లే అవకాశం ఉంది. ఈ గ్యాప్ లో కొరటాల కూడా మరో సినిమా చేయాలని భావిస్తున్నట్లు తెలుస్తోంది. ఈ నేపథ్యంలో ‘దేవర 2’ 2027 చివరలో లేదంటే 2028లో ప్రేక్షకుల ముందుకు వచ్చే అవకాశం ఉంది. త్వరలోనే ఈ సినిమాపై మేకర్స్ నుంచి ఓ క్లారిటీ వచ్చే అవకాశం ఉంది.