Salman Khan: పాము కరించింది... ఎన్నిసార్లు? ఇదిగో సల్మాన్ రియాక్షన్
బాలీవుడ్ స్టార్ సల్మాన్ ఖాన్‌ను శనివారం పాముకాటుకు గురయ్యారు. ఆసుపత్రిలో చికిత్స తీసుకుని క్షేమంగా ఫామ్ హౌస్‌కు వెళ్లారు. పాము కాటుపై సల్మాన్ స్పందించారు.
హిందీ హీరో సల్మాన్ ఖాన్‌ను పాము కరిచిందనే వార్త ఆయన అభిమానుల్లో ఆందోళన కలిగించింది. హిందీ ఇండస్ట్రీ ప్రముఖులు సైతం ఒక్కసారి స‌ల్మాన్‌కు ఏమైందో అని ఆరా తీశారు. అయితే... ఆ పాముకు విషం లేదని తెలియడంతో వారంతా ఊపిరి పీల్చుకున్నారు. పాము కాటుకు గురైన వెంటనే ఆసుపత్రికి వెళ్లిన కండల వీరుడు, చికిత్స తీసుకుని క్షేమంగా ఆయన వ్యవసాయ క్షేత్రానికి (ప‌న్వేల్ ఫామ్‌హౌస్‌కు) చేరుకున్నారు. ఈ రోజు (డిసెంబర్ 27, సోమవారం) సల్మాన్ పుట్టిన రోజు. ఈ సందర్భంగా ఆదివారం రాత్రి ఫామ్‌హౌస్‌ బయట మీడియాతో ముచ్చటించారు. పాము కాటు గురించి స్పందించారు.
ఈ ఏడాది మొదటి పుట్టినరోజు బహుమతి ఎవరు ఇచ్చారనే ప్రశ్న స‌ల్మాన్‌కు ఎదురైంది. అదే సమయంలో ఒకరు పాము కాటు గురించి ప్రస్తావించారు. "పాటు కాటు! అవును... ఈ ఏడాది మొదటి పుట్టినరోజు బహుమతి పాము ఇచ్చింది. నాకు మూడుసార్లు ముద్దు పెట్టింది" అని సల్మాన్ ఖాన్ సరదాగా వ్యాఖ్యానించారు. పాము మూడుసార్లు కరిచిందని తనదైన శైలిలో ఆయన చెప్పుకొచ్చారు.
View this post on Instagram
ప‌న్వేల్ ఫామ్‌హౌస్‌లో కుటుంబ సభ్యులు, కొంత మంది స్నేహితుల సమక్షంలో సల్మాన్ ఖాన్ పుట్టినరోజు వేడుకలు జరిగాయి. సినిమాలకు వస్తే... ప్రస్తుతం 'టైగర్ 3' సెట్స్ మీద ఉంది. అందులో కత్రీనా కైఫ్ కథానాయిక. పూజా హెగ్డేతో 'కబీ ఈద్ కబీ దీవాలి' చేస్తున్నారు. 'కిక్ 2' కూడా అనౌన్స్ చేశారు. అందులో జాక్వలిన్ ఫెర్నాండేజ్ కథానాయిక. ఇటీవల ముంబైలో జరిగిన 'ఆర్ఆర్ఆర్' ప్రీ రిలీజ్ ఈవెంట్‌లో 'భజరంగీ భాయిజాన్ 2' ప్రకటించారు.
టాప్ హెడ్ లైన్స్
ట్రెండింగ్ వార్తలు
