Krishnavamsi: డబ్బింగ్ సరే కానీ రిలీజ్ ఎప్పుడు? కృష్ణవంశీ తీరుపై నెటిజన్ల అసహనం!

చాలా కాలంగా ఫ్లాప్ లతో డీలా పడ్డ కృష్ణవంశీ 'రంగమార్తాండ' సినిమాతో ఎలాగైనా హిట్ కొట్టాలని చూస్తున్నారు.

డబ్బింగ్ సరే కానీ రిలీజ్ ఎప్పుడు? కృష్ణవంశీ తీరుపై నెటిజన్ల అసహనం!

ప్రముఖ దర్శకుడు కృష్మవంశీ 'రంగమార్తాండ' అనే సినిమాను తెరకెక్కిస్తోన్న సంగతి తెలిసిందే. మరాఠీలో విడుదలైన 'నట సామ్రాట్' సినిమాకి ఇది రీమేక్. సాధారణంగా అయితే దర్శకుడు కృష్ణవంశీ రీమేక్ సినిమాపై పెద్దగా ఆసక్తి చూపరు. సొంత కథలతోనే సినిమాలను రూపొందిస్తారు. కానీ 'నట సామ్రాట్' సినిమాను చూసిన ఆయన రీమేక్ చేయాలని ఫిక్సయిపోయారు. అంతగా అతడిని కదిలించిన సినిమా అది.

చాలా కాలంగా ఫ్లాప్ లతో డీలా పడ్డ వంశీ ఈ సినిమాతో ఎలాగైనా హిట్ కొట్టాలని చూస్తున్నారు. 'నట సామ్రాట్' సినిమాలో నానా పటేకర్ ప్రధాన పాత్ర పోషించారు. ఆయన పాత్రను తెలుగులో ప్రకాష్ రాజ్ పోషిస్తున్నారు. అలానే సినిమాలో మరో ముఖ్య పాత్ర ఒకటి ఉంటుంది. నానా పటేకర్ స్నేహితుడిగా మరాఠీలో విక్రమ్ గోఖలే నటించారు. సీరియస్ గా ఎమోషనల్ గా సాగే ఆ పాత్ర కోసం బ్రహ్మానందాన్ని ఎంపిక చేశారు. 

ప్రస్తుతం సినిమా పోస్ట్ ప్రొడక్షన్ కార్యక్రమాలు జరుపుకుంటుంది. నిజానికి ఈపాటికే సినిమా రిలీజ్ కావాల్సింది కానీ ఆలస్యం జరుగుతోంది. ఆగస్టులో సినిమా కచ్చితంగా రిలీజ్ అవుతుందన్నారు. కానీ అలా జరగలేదు. దీపావళికి వస్తుందన్నారు. అప్పుడు కూడా రాలేదు. కృష్ణవంశీ మాత్రం సోషల్ మీడియాలో బ్రహ్మానందం, రమ్యకృష్ణ డబ్బింగ్ చెబుతోన్న ఫొటోలను షేర్ చేస్తూ.. కాలం గడుపుతున్నారు. 

కొన్ని నెలల క్రితమే డబ్బింగ్ మొదలైంది. ఇప్పటికే చాలా మంది డబ్బింగ్ చెప్పేశారు కూడా. కానీ కృష్ణవంశీ ఇంకా డబ్బింగ్ ఫొటోలను పెడుతూ.. రిలీజ్ డేట్ మాత్రం చెప్పకపోవడం ఆడియన్స్ కు విసుగు తెప్పిస్తుంది. 'రంగమార్తాండ' సినిమా చూద్దామనుకునే కొందరు ప్రేక్షకులు డబ్బింగ్ సరే కానీ రిలీజ్ ఎప్పుడు అంటూ సోషల్ మీడియాలో కామెంట్స్ చేస్తున్నారు. మరి కృష్ణవంశీ రిలీజ్ విషయంలో ఏం ఆలోచిస్తున్నారో తెలియాల్సివుంది. 

కృష్ణవంశీ ఓటీటీ ప్రాజెక్ట్:
పాండమిక్ సమయంలో జనాలు ఓటీటీకి బాగా అలవాటు పడ్డారు. ఇప్పుడు చాలా మంది థియేటర్లకు వెళ్లి సినిమా చూడడానికి కూడా పెద్దగా ఇష్టపడడం లేదు. ఓటీటీలోనే చూసుకుంటున్నారు. ఇక వెబ్ సిరీస్ లైతే వందల సంఖ్యలో రిలీజ్ అవుతున్నాయి. ఒరిజినల్ కంటెంట్ కోసం బాగా ఖర్చు చేస్తున్నాయి ఓటీటీ సంస్థలు. తెలుగులో కూడా పదుల సంఖ్యలో వెబ్ సిరీస్ లు వస్తున్నాయి. వీటికోసం కోట్లలో ఖర్చు చేస్తున్నారు. పేరున్న దర్శకులు చాలా మంది ఓటీటీ ప్రాజెక్ట్స్ చేపడుతున్నారు. 

ఇప్పుడు కృష్ణవంశీ వంతు వచ్చింది. త్వరలోనే ఆయన ఓటీటీ ప్రాజెక్ట్ చేయబోతున్నారట. ఈ ప్రాజెక్ట్ బడ్జెట్ ఎంతో తెలిస్తే షాక్ అవ్వాల్సిందే. అక్షరాల రూ.300 కోట్ల వరకు ఉంటుంది. ఇదొక బ్లాస్ట్ లాంటి ప్రాజెక్ట్ అని.. త్వరలోనే వివరాలు చెబుతానని అన్నారట. కృష్ణవంశీ లాంటి డైరెక్టర్ ని నమ్మి మూడొందల కోట్ల బడ్జెట్ పెట్టడమంటే మాములు విషయం కాదు. కాకపోతే ఓటీటీలతో ఏదైనా సాధ్యమనే చెప్పాలి. అక్కడ బడ్జెట్ లిమిటేషన్స్ ఉండవు. ప్రాజెక్ట్ పై నమ్మకం ఉంటే ఎంతైనా పెట్టొచ్చు. నెట్ ఫ్లిక్స్ లాంటి సంస్థలకు మూడొందల కోట్లు పెద్ద మేటర్ కూడా కాదు.