Venom: The Last Dance Trailer: ‘వెనొమ్: ది లాస్ట్ డ్యాన్స్’ తెలుగు ట్రైలర్ - ఈ సారి మరింత భయానకంగా.. ఫన్నీగా సీక్వెల్

Venom: The Last Dance: వెనొమ్ ఫ్రాంచైజ్‌లో ఇప్పటికే రెండు సినిమాలు విడుదలయ్యి ప్రపంచ బాక్సాఫీస్ వద్ద ఓ రేంజ్‌లో కలెక్షన్స్ సాధించాయి. ఇప్పుడు అదే రూట్‌లో ‘వెనొమ్: ది లాస్ట్ డ్యాన్స్’ రానుంది.

Image Credit: Marvels Wolverine/Instagram

Venom: The Last Dance Telugu Trailer: హాలీవుడ్‌లో ఎలాంటి మాన్‌స్టర్ సినిమాలకు అయినా ప్రపంచవ్యాప్తంగా విపరీతమైన క్రేజ్ ఉంది. అందుకే ఆ సినిమాలను ఫ్రాంచైజ్‌లాగా చేసి ఒకదాని తర్వాత మరొకటి ప్రేక్షకుల ముందుకు తీసుకొస్తుంటారు మేకర్స్. హాలీవుడ్ తెరకెక్కిన అలాంటి మాన్‌స్టర్ సినిమాల్లో ఒకటి ‘వెనొమ్’. ఇప్పటికే వెనొమ్ ఫ్రాంచైజ్ నుంచి రెండు సినిమాలు విడుదలయ్యి మంచి హిట్‌ను అందుకున్నాయి. ఇప్పుడు ఈ ఫ్రాంచైజ్ నుంచి మూడో సినిమా ప్రేక్షకుల ముందుకు రావడానికి సిద్ధమయ్యింది. అదే ‘వెనొమ్: ది లాస్ట్ డ్యాన్స్’. తాజాగా ఈ మూవీకి సంబంధించిన ట్రైలర్ విడుదలయ్యింది.

మరో కోణం..

ఇప్పటివరకు విడుదలయిన ‘వెనొమ్’ ఫ్రాంచైజ్‌లోని రెండు సినిమాల్లో హీరోగా నటించిన టామ్ హార్డీ.. ‘వెనొమ్: ది లాస్ట్ డ్యాన్స్’లో కూడా లీడ్ రోల్‌లో అలరించనున్నాడు. తను మరోసారి జర్నలిస్ట్ ఎడీ బ్రోక్ పాత్రలో కనిపించనున్నట్టు ట్రైలర్ చూస్తే అర్థమవుతోంది. ‘‘నాలో ఎవరూ ఊహించని, ఎవరికీ తెలియని ఒక కోణం ఉందని మీకు తెలిసి ఉండాలి’’ అంటూ ఎడీ చెప్పే డైలాగ్‌తో ‘వెనొమ్: ది లాస్ట్ డ్యాన్స్’ ట్రైలర్ మొదలువుతుంది. ఆ తర్వాత కొందరు దుండగులు తనపై దాడి చేయడానికి వస్తారు. తనలో ఉన్న వెనొమ్‌ను బయటికి రాకుండా ఎడీ చాలా ప్రయత్నిస్తాడు కానీ వాళ్లంతా కలిసి తనపై దాడి చేయడంతో వెనొమ్ బయటికొస్తుంది.

వెనొమ్‌ను పట్టుకోవాలి..

అప్పటివరకు మామూలుగా ఉన్న ఎడీ.. వెనొమ్ రూపంలోకి మారి దుండగులను చితకబాదుతాడు. ‘‘నువ్వు నన్ను చాలా మంచి ప్రదేశాలకు తీసుకెళ్తున్నావు’’ అంటూ తనలో ఉన్న వెనొమ్.. ఎడీతో ఎప్పటిలాగానే ఫ్రెండ్లీగా ఉంటుంది. ఆ తర్వాత సైంటిస్ట్ పాత్రలో జూనో టెంపుల్ ఎంట్రీ ఇస్తుంది. ‘‘ఇది అసాధ్యమని నాకు ఎప్పటినుండో తెలుసు కానీ ఇలాంటి ప్రపంచంలో మనం ఒంటరిగా ఉన్నాం. ఈ విషయం సీక్రెట్‌గా ఉంచే బాధ్యత మనదే’’ అంటూ షివెటల్‌తో చెప్తుంది. దీంతో ఎడీలో వెనొమ్ ఉందని తెలుసుకున్న షివెటల్.. తన వెంటపడతాడు. వెనొమ్‌ను పట్టుకోవడం కోసం మరో భయంకరమైన మాన్‌స్టర్‌ను క్రియేట్ చేస్తారు. దాని నుంచి ఎడీ తప్పించుకునే ప్రయత్నంలోనే ‘వెనొమ్: ది లాస్ట్ డ్యాన్స్’ ట్రైలర్ ముగుస్తుంది.

సూపర్ హిట్స్..

టామ్ హార్డీ.. ‘వెనొమ్: ది లాస్ట్ డ్యాన్స్’లో హీరోగా నటించడం మాత్రమే కాకుండా ఈ సినిమా కోసం కథను కూడా అందించాడు. తనతో పాటు కథను అందించిన కెల్లీ మార్సెల్.. వెనొమ్ ఫ్రాంచైజ్‌కు మొదటిసారి దర్శకుడిగా మారాడు. ఇక ఈ మూవీ అక్టోబర్ 25న ప్రపంచవ్యాప్తంగా ఉన్న ప్రేక్షకుల ముందుకు రానుంది. వెనొమ్ ఫ్రాంచైజ్‌లోని రెండో మూవీ అయిన ‘వెనొమ్ లెట్ ధేర్ బీ కార్నేజ్’.. 2021లో విడుదలయ్యి హిట్ అందుకుంది. ఈ ఫ్రాంచైజ్‌లోని మొదటి భాగం ప్రపంచవ్యాప్తంగా 856.1 మిలియన్ డాలర్ల కలెక్షన్స్ సాధించగా.. రెండో భాగం 506.8 మిలియన్ డాలర్లు కలెక్ట్ చేసింది.