Rathika - Pizza 4: 'పిజ్జా 4'లో హీరోయిన్ గా తెలుగు ‘బిగ్ బాస్’ బ్యూటీ రతిక రోజ్

Bigg Boss Rathika - Pizza 4: తెలుగు 'బిగ్‏ బాస్' ఫేమ్ రతిక రోజ్ ఇప్పుడు హీరోయిన్ గా తమిళ చిత్ర పరిశ్రమలో అడుగు పెడుతోంది. ఈ విషయాన్ని ఆమె ఇన్స్టాగ్రామ్ ద్వారా వెల్లడించింది.

'పిజ్జా 4'లో తెలుగు ‘బిగ్ బాస్’ రతిక (Image Credit: X)

Bigg Boss Rathika - Pizza 4: తెలుగు 'బిగ్‏ బాస్' షోతో పాపులారిటీ సంపాదించుకున్న అందాల భామ రతిక రోజ్. సీజన్-7లో రెండు సార్లు హౌస్ లోకి ఎంట్రీ ఇచ్చిన ఈ బ్యూటీ.. తన అంద చందాలతో, ఆట తీరుతో ఆడియన్స్ ను ఆకట్టుకుంది. అంతకముందు కొన్ని సినిమాల్లో క్యారక్టర్ ఆర్టిస్టుగా చేసినా, పెద్దగా గుర్తింపు రాలేదు. అయితే హౌస్ నుంచి బయటకి వచ్చిన తర్వాత అమ్మడు ఒక్కసారిగా ఫేమస్ అయిపోయింది. ఈ క్రమంలో ఇప్పుడు ఓ తమిళ సినిమాలో హీరోయిన్ ఛాన్స్ కొట్టేసింది.

తమిళంలో సూపర్ హిట్టయిన 'పిజ్జా' ఫ్రాంచైజీలో ఇప్పటి వరకూ మూడు సినిమాలు వచ్చాయి. ఈ క్రమంలో ఇప్పుడు 'పిజ్జా 4: హోమ్ అలోన్' పేరుతో నాలుగో చిత్రాన్ని తెరకెక్కిస్తున్నారు. ఇందులో సీనియర్ నటుడు నాజర్ తనయుడు అభి హాసన్ హీరోగా నటిస్తుండగా.. హీరోయిన్ గా తెలుగు బిగ్ బాస్ ఫేమ్ రతిక రోజ్ ను ఎంపిక చేశారు. ఈ హారర్ థ్రిల్లర్ ను నిన్న శుక్రవారం (ఏప్రిల్ 5) పూజా కార్యక్రమాలతో లాంఛనంగా ప్రారంభించారు. 

'పిజ్జా 4: హోమ్ అలోన్' సినిమాని ప్రారంభించినట్లు నటి రతిక రోజ్ సోషల్ మీడియా వేదికగా ప్రకటించింది. 'మీ అందరి సపోర్ట్, ఆశీస్సులు కావాలి' అంటూ ఇన్స్టాగ్రామ్ ఓ పూజా కార్యక్రమాలకు సంబంధించిన వీడియోని పంచుకుంది. ఈ వేడుకకు ప్రధాన తారాగణంతో పాటుగా అభి హాసన్ తల్లిదండ్రులు నాజర్, కమీలా నాజర్ హాజరయ్యారు. అభి - రతిక లపై మొదటి సన్నివేశానికి క్లాప్ కొట్టినట్లు వీడియోలో కనిపిస్తుంది.

 

 

 

 

 

View this post on Instagram

 

 

 

 

 

 

 

 

 

 

 

A post shared by Rathika (@rathikarose_official)

ప్రముఖ తమిళ దర్శక నిర్మాత సి.వి. కుమార్ సమర్పణలో తిరుకుమరన్ ఎంటర్‌టైన్‌మెంట్స్ బ్యానర్ లో 'పిజ్జా 4: హోమ్ అలోన్' సినిమా రూపొందుతోంది. తంగం సినిమాస్‌కి చెందిన నిర్మాత ఎస్ తంగరాజ్‌ కూడా నిర్మాణంలో భాగం పంచుకుంటున్నారు. ఈ చిత్రంతో ఆండ్రూస్ అనే కొత్త దర్శకుడు ఇండస్ట్రీకి పరిచయం అవుతున్నాడు. అతను గతంలో ఎల్‌కెజి, మూకుతి అమ్మన్, గొరిల్లా లాంటి సినిమాలతో పాటుగా 'అయాలీ' అనే వెబ్ సిరీస్ కు కో-డైరెక్టర్‌గా పనిచేశారు.

2012లో కార్తీక్ సుబ్బరాజ్ దర్శకత్వంలో విజయ్ సేతుపతి హీరోగా 'పిజ్జా' సినిమా వచ్చింది. ఆ తర్వాత ఈ ఫ్రాంచైజీలో 'పిజ్జా 2: ది విల్లా'.. గతేడాది 'పిజ్జా 3: ది మమ్మీ' వంటి చిత్రాలు వచ్చాయి. ఇప్పుడు 'పిజ్జా 4: హోమ్ అలోన్' సినిమాని పట్టాలెక్కించారు. ఇప్పటి వరకూ వచ్చిన మూడు చిత్రాల కంటే పూర్తి భిన్నమైన కథాంశంతో, ఒక ఎమోషనల్ హారర్ థ్రిల్లర్ గా రూపొందుతుందని చిత్ర బృందం చెబుతోంది. అలాంటి సినిమాతో తెలుగమ్మాయి రతిక కోలీవుడ్ లో హీరోయిన్ గా అడుగుపెట్టబోతోంది.

ఇప్పటికే పలువురు తెలుగమ్మాయిలు తమిళ చిత్ర పరిశ్రమలో రాణించారు. అంజలి, శ్రీ దివ్య, ఆనంది, బిందు మాధవి లాంటి నటీమణులు టాలీవుడ్ లో కంటే, కోలీవుడ్ లో క్రేజీ ఆఫర్లు అందుకున్నారు. ఈ క్రమంలో ఇప్పుడు తమిళనాట కథానాయికగా ఎంట్రీ ఇవ్వడానికి రెడీ అయిన రతిక రోజ్ 'పిజ్జా 4' చిత్రంతో ఎలాంటి గుర్తింపు తెచ్చుకుంటుందో చూడాలి.