Prashanth Neel: దానికోసమే ఇల్లు అమ్మేశాను, నా ఫేవరెట్ దర్శకుడు ఆయనే - ప్రశాంత్ నీల్

Prashanth Neel: పాన్ ఇండియా డైరెక్టర్‌గా గుర్తింపు తెచ్చుకున్న ప్రశాంత్ నీల్.. ఇండస్ట్రీకి పరిచయమయ్యి పదేళ్లు అవుతోంది. ఈ సందర్భంగా తన ఫేవరెట్ హీరో, హీరోయిన్, డైరెక్టర్ ఎవరో బయటపెట్టారు.

Image Credit: Shreyi/Twitter

Prashanth Neel About Ugramm Movie: కన్నడ ఇండస్ట్రీలో డైరెక్టర్‌గా మొదలయిన ప్రశాంత్ నీల్ ప్రయాణం.. ప్రస్తుతం పాన్ ఇండియా స్థాయికి చేరుకుంది. ‘సలార్’తో తన పేరును, శాండిల్‌వుడ్ పేరును దేశవ్యాప్తంగా ఉన్న మూవీ లవర్స్‌కు పరిచయం చేశారు ప్రశాంత్. దానికంటే ముందు తను తెరకెక్కించిన ‘ఉగ్రం’ కూడా ఒక కమర్షియల్‌ డైరెక్టర్‌గా తనకు మంచి గుర్తింపునే తెచ్చిపెట్టింది. తాజాగా ఈ మూవీ విడుదలయ్యి 10 సంవత్సరాలు అయిన సందర్భంగా దీని గురించి గుర్తుచేసుకున్నారు ప్రశాంత్ నీల్. అంతే కాకుండా తన ఫేవరెట్ హీరో, హీరోయిన్, డైరెక్టర్ ఎవరు అనే విషయాలను బయటపెట్టారు.

జీవిత పాఠం నేర్పింది..

‘ఉగ్రం’ అనే సినిమాతో కన్నడ సినీ పరిశ్రమకు దర్శకుడిగా పరిచయమయ్యారు ప్రశాంత్ నీల్. అప్పటివరకు కన్నడ ప్రేక్షకులు ఇలాంటి ఒక కమర్షియల్ సినిమాను చూడలేదు. అందుకే ఈ మూవీ సెన్సేషనల్ హిట్ అయ్యింది. మొదటి వారంలోనే రూ.5.5 కోట్ల కలెక్షన్స్‌ను సాధించింది. అయితే ఈ సినిమా తనకొక జీవిత పాఠాన్ని నేర్పిందని ప్రశాంత్ నీల్ చెప్పుకొచ్చారు. ‘కేజీఎఫ్’ విడుదలయిన తర్వాత ‘ఉగ్రం’కు మరింత ఆదరణ దక్కాల్సింది అనే ఉద్దేశ్యంతోనే కథకు కొన్ని మార్పులు చేర్పులు చేసి ప్రభాస్, పృథ్విరాజ్‌తో కలిసి ‘సలార్’ చేశానని బయటపెట్టారు. ‘ఉగ్రం’ నుండి నేర్చుకున్న అనుభవాలు తన జీవితానికి సరిపడా ఉన్నాయని స్టేట్‌మెంట్ ఇచ్చారు ప్రశాంత్ నీల్.

ఇల్లు అమ్మేశాను..

కన్నడ సినీ పరిశ్రమలో ‘ఉగ్రం’ వల్లే మూవీ మేకింగ్‌లో ఎన్నో మార్పులు వచ్చాయన్నారు. ఆ సినిమా తెరకెక్కించాలని నిర్ణయించుకున్న తర్వాత ప్రొడక్షన్ కోసం అనుకున్న దానికంటే ఎక్కువ సమయాన్ని కేటాయించాల్సి వచ్చిందని ప్రశాంత్ నీల్ గుర్తుచేసుకున్నారు. అంతే కాకుండా ఒక కొత్త టీమ్‌ను కూడా ఏర్పాటు చేసుకొని సినిమా చేయాలనుకున్నారు. ‘ఉగ్రం’ కోసం తన ఇంటిని కూడా అమ్మేయాల్సి వచ్చిందని బయటపెట్టారు. ఇక కష్టపడి మూవీ పూర్తిచేసిన తర్వాత కూడా దానిని డిస్ట్రిబ్యూట్ చేయడానికి ఎవరూ రాలేదట. కొన్నాళ్ల తర్వాత దర్శన్, దినకర్ తూగుదీప ముందుకొచ్చి.. తమ తూగుదీప డిస్ట్రిబ్యూటర్స్ ద్వారా ‘ఉగ్రం’ను విడుదల చేశారు.

వారే నా ఫేవరెట్..

ఇక ఆయన ఫేవరెట్ హీరో, హీరోయిన్, డైరెక్టర్ గురించి కూడా ప్రశాంత్ వర్మ రివీల్ చేశాడు. ‘‘నా ఆల్ టైమ్ ఫేవరెట్ డైరెక్టర్ ఉపేంద్ర. ఇది కన్నడ షో అని నేను ఆయన పేరు చెప్పడం లేదు. ఆయన సినిమాలు ష్, థార్లే నాన్ మగా, ఓమ్ లాంటి మూడు వేర్వేరు జోనర్లలో తెరకెక్కాయి. అలాంటివి ప్రయత్నించడం దర్శకుడికి చాలా కష్టం. కానీ ఉపేంద్ర చేసి చూపించారు’’ అని ఉపేంద్ర గురించి చెప్పుకొచ్చారు ప్రశాంత్. అంతే కాకుండా తన ఫేవరెట్ హీరో, హీరోయిన్ గురించి మాట్లాడుతూ.. అమితాబ్ బచ్చన్, శ్రీదేవి.. తనకు ఆల్ టైమ్ ఫేవరెట్ అన్నారు. ప్రస్తుతం ప్రశాంత్ నీల్ తర్వాతి సినిమాల గురించి పూర్తి స్థాయిలో క్లారిటీ లేదు.