మెగాస్టార్కు మరో వారంలో మోకాళ్ళ సర్జరీ - మరి నెక్స్ట్ ప్రాజెక్ట్ సంగతేంటి?
మెగాస్టార్ చిరంజీవి మోకాలి సర్జరీ చేయించుకోనున్నట్లు తెలుస్తోంది. గత కొంతకాలంగా ఆయన మోకాళ్ళ నొప్పితో బాధపడుతుండగా, తాజాగా నొప్పి ఎక్కువవడంతో ఈ వారంలోనే సర్జరీ జరగనున్నట్లు సమాచారం.
మెగాస్టార్ చిరంజీవి తన మోకాలికి సర్జరీ చేయించుకోబోతున్నారట. గత కొంతకాలంగా విరామం లేకుండా పనిచేస్తుండడంతో ఆయన మోకాళ్ళ నొప్పితో బాధపడుతున్నట్లు తెలుస్తోంది. దీంతో తాజాగా ఆయనకి మోకాలి సర్జరీ జరగబోతుంది అంటూ వార్తలు వినిపిస్తున్నాయి. పూర్తి వివరాల్లోకి వెళితే.. 70 పదుల వయసు దగ్గర పడుతున్న సమయంలోనూ చిరంజీవి వరుస సినిమాలు చేస్తున్నారు. కేవలం ఏడాది వ్యవధిలోనే మెగాస్టార్ నుంచి నాలుగు సినిమాలు రావడం విశేషం. ఓ సీనియర్ హీరో ఇంత వేగంగా సినిమాలు చేయడం అంటే మామూలు విషయం కాదు. గత ఏడాది ఏప్రిల్ లో చిరంజీవి నటించిన 'ఆచార్య' విడుదలవగా.. అక్టోబర్లో 'గాడ్ ఫాదర్' అలాగే 2023 ప్రారంభంలో లో 'వాల్తేరు వీరయ్య' రిలీజ్ అవ్వగా తాజాగా మరోసారి 'భోళాశంకర్' తో ప్రేక్షకులు ముందుకు వచ్చారు.
ఇలా వరుస సినిమా షూటింగ్స్ తో విశ్రాంతి కూడా తీసుకోకుండా పనిచేస్తున్నందున ఆయన మోకాలి నొప్పితో బాధపడుతున్నట్టు తెలుస్తోంది. ఇప్పుడు ఆ నొప్పి ఎక్కువడంతో ఆయన సర్జరీ చేయించుకోబోతున్నట్లు సమాచారం. హైదరాబాదులో లేకపోతే విదేశాల్లో మెగాస్టార్ కి ఈ సర్జరీ జరగనున్నట్లు వార్తలు వినిపిస్తున్నాయి. ఈ వారం లోనే మెగాస్టార్ కి సర్జరీ ఉండబోతున్నట్లు చెబుతున్నారు. సర్జరీ అనంతరం సుమారు నెల నుంచి నెలన్నర వరకు ఆయన విశ్రాంతి తీసుకోనున్నారట. అంతేకాదు పూర్తిగా కోలుకున్న తర్వాతే ఆయన నెక్స్ట్ మూవీ స్టార్ట్ కానుందట. ప్రస్తుతం ఈ వార్త సోషల్ మీడియాలో వైరల్ అవ్వడంతో ఆయన ఫ్యాన్స్ కొంత నిరాశకు లోనవుతున్నారు. ఈ క్రమంలోనే తమ అభిమాన హీరోకి సర్జరీ విజయవంతమై పూర్తిగా కోలుకొని త్వరలోనే మళ్లీ కొత్త సినిమాను స్టార్ట్ చేయాలంటూ ఫ్యాన్స్ కోరుకుంటున్నారు.
ఇక మరోవైపు తాజాగా 'భోళాశంకర్' సినిమాతో ప్రేక్షకుల ముందుకు వచ్చిన చిరంజీవి అభిమానులను నిరాశపరిచారు. రొటీన్ కమర్షియల్ స్టోరీ కావడం, సిస్టర్ సెంటిమెంట్ అంతగా వర్కౌట్ అవ్వకపోవడం, అలాగే అనవసరమైన కామెడీని ఇరికించి అందులో జబర్దస్త్ గ్యాంగ్ ని పెట్టడం ఇలాంటి అంశాలన్నీ సినిమాకు మైనస్ లుగా చెబుతున్నారు. ఇక ప్రస్తుతం చిరంజీవి కళ్యాణ్ కృష్ణ దర్శకత్వంలో తన తదుపరి సినిమా చేయబోతున్నట్లు తెలుస్తోంది. మలయాళం లో హిట్ అయిన 'బ్రో డాడీ' సినిమాకి రీమేక్ గా ఈ ప్రాజెక్టు తెరకెక్కనుందట. మెగాస్టార్ తో పాటు యంగ్ హీరో శర్వానంద్ కూడా ఈ సినిమాలో నటిస్తున్నట్లు తెలుస్తోంది.
చిరంజీవి పెద్ద కూతురు సుస్మిత ఈ సినిమాని నిర్మిస్తున్నారు. రొమాంటిక్ ఎంటర్టైనర్ గా ఈ సినిమా ఉండబోతోంది. అయితే 'భోళాశంకర్' డిజాస్టర్ తో చిరు తీవ్ర విమర్శలు ఎదుర్కొంటున్న వేళ ఇకపై రీమేక్ జోలికి వెళ్లొద్దంటూ మెగాస్టార్ ని అభిమానులు హెచ్చరిస్తున్నారు. ఈ క్రమంలోనే చిరంజీవి 'బ్రో డాడి'ని పక్కన పెట్టే అవకాశాలు కూడా ఉన్నాయని ఫిలిం సర్కిల్స్ లో టాక్ వినిపిస్తోంది. మొత్తం మీద మెగాస్టార్ కి సర్జరీ, తన నెక్స్ట్ ప్రాజెక్ట్ పై కొనసాగుతున్న సస్పెన్స్.. వీటన్నిటిని చూస్తే 2024 వేసవి వరకు ఆయన నుంచి మరో సినిమా ఉండకపోవచ్చు.
Also Read : దళితులపై హీరో ఉపేంద్ర అనుచిత వ్యాఖ్యలు - కేసు నమోదు, ఆయన స్పందన ఇదీ!
Join Us on Telegram: https://t.me/abpdesamofficial
టాప్ హెడ్ లైన్స్
ట్రెండింగ్ వార్తలు
