Kamal Haasan: నన్ను ఇకపై అలా పిలవొద్దు... అభిమానులకు కమల్ స్పెషల్ రిక్వెస్ట్ - ఎక్స్‌లో వైరల్ పోస్ట్
ఇకపై అలా పిలవొద్దు అని కోరుతూ అభిమానులకు కమల్ హాసన్ స్పెషల్ రిక్వెస్ట్ చేస్తూ ఈ మేరకుఎక్స్ లో పోస్ట్ చేశారు.
సాధారణంగా సినిమా ఇండస్ట్రీలో తమ అభిమాన నటీనటులను స్పెషల్ ట్యాగ్ తో పిలుచుకుని సంబర పడతారు ఫ్యాన్స్. అతికొద్ది మంది సెలబ్రిటీలు తప్ప మంచి స్టార్ డమ్ ఉన్న పెద్ద పెద్ద హీరోలతో పాటు చిన్న చిన్న హీరోలు కూడా ఇటీవల కాలంలో ఇలా స్పెషల్ ట్యాగ్స్ తగిలించుకొని మరీ పిలిపించుకుంటున్నారు. తాజాగా అగ్ర కథానాయకుడు కమల్ హాసన్ మాత్రం ఈ విషయంలో ఒక కీలక నిర్ణయం తీసుకోవడం సంచలనంగా మారింది. ఆయన ఇకపై తనను ఎవ్వరూ ఎలాంటి స్టార్ ట్యాగ్ తో పిలవద్దంటూ షాక్ ఇచ్చారు. తనని కేవలం కమల్ లేదా కమల్ హాసన్ అని పిలిస్తే చాలని తెలుపుతూ స్పెషల్ గా ఓ లెటర్ ను రిలీజ్ చేశారు. అయితే కమల్ హాసన్ తాను సినీ ప్రియులకు మరెన్నో అద్భుతమైన సినిమాలను అందించాలనే ఉద్దేశంతో ఈ నిర్ణయం తీసుకున్నట్టు ఆ లెటర్లో వెల్లడించారు. అంతే కాకుండా ఎవ్వరూ తన నిర్ణయాన్ని తప్పుగా అర్థం చేసుకోవద్దని రిక్వెస్ట్ చేస్తూ ఎక్స్ వేదికగా ఆయన సోమవారం పెట్టిన పోస్ట్ ప్రస్తుతం వైరల్ అవుతుంది.
ఆ లెటర్లో కమల్ హాసన్ 'నా పనిని మెచ్చి ఎన్నో బిరుదులను అందించిన వారందరికీ నేను ఎప్పటికీ కృతజ్ఞుడిగా ఉంటాను. ఉలగనాయగన్ వంటి బిరుదు ఇచ్చినందుకు కృతజ్ఞతలు. ఇక తోటి నటీనటులతో పాటు ఆత్మీయుల నుంచి వచ్చే ఇలాంటి ప్రశంసలు ఎన్నో నా మనసును ఎంతగానో కదిలించాయి. ఏ ఒక్కరి ఊహకు అందని సినిమా ప్రపంచంలో నేను నిత్య విద్యార్థిని. ఈ రంగంలో ఎన్నో కొత్త విషయాలను నేర్చుకుని మరింత ముందుకు సాగాలని ఆశిస్తున్నాను. ఇతర కళల మాదిరిగానే సినిమా కూడా అందరికీ చెందిన కళ. సినిమా ఇండస్ట్రీ అనేది ఎంతోమంది సాంకేతిక నిపుణులు, ప్రేక్షకులు, కళాకారుల సహకారం. నా అభిప్రాయం ప్రకారం కళకంటే కళాకారుడు గొప్ప కాదు. నేను ఎప్పటికీ నా లోపాలను గుర్తించి మరింత మెరుగుపరుచుకుంటూ, నటుడిగా కర్తవ్యాన్ని నిర్వర్తిస్తూ, స్థిరంగా ఉండాలని అనుకుంటున్నాను. బాగా ఆలోచించాక ఒక నిర్ణయానికి వచ్చాను.. నేను మర్యాదపూర్వకంగా స్టార్ ట్యాగ్స్ ను తిరస్కరిస్తున్నాను. నా అభిమానులతో పాటు మీడియా, సినీ ప్రముఖులు, భారతీయులందరూ నన్ను కేవలం కమల్ లేదా కమల్ హాసన్ లేదా కేహెచ్ అని పిలవాలని ఈ సందర్భంగా రిక్వెస్ట్ చేస్తున్నాను" అంటూ సుదీర్ఘ నోట్ ను రిలీజ్ చేశారు.
உங்கள் நான்,
— Kamal Haasan (@ikamalhaasan) November 11, 2024
கமல் ஹாசன். pic.twitter.com/OpJrnYS9g2
అయితే స్టార్ హీరోలు ఇలా ట్యాగ్స్ పై వ్యతిరేకతను వ్యక్తం చేయడం ఇదే మొదటిసారి కాదు. కోలీవుడ్ స్టార్ హీరో అజిత్ తనని కేవలం అజిత్ కుమార్ లేదా అజిత్ లేదా ఏకే అని పిలిస్తే చాలని అన్నారు. అలాగే తెలుగులో నాని కూడా తనను నేచురల్ స్టార్ అని పిలవొద్దు అని అన్నారు. వీళ్లిద్దరు మాత్రమే కాదు సంయుక్త మీనన్ కూడా తనను ఇంటిపేరుతో పిలవద్దు కేవలం సంయుక్త అని పిలిస్తే చాలని కోరింది. ఇక ఇప్పుడు ఈ లిస్ట్ లో కమల్ కూడా చేరడం విశేషం.
టాప్ హెడ్ లైన్స్
ట్రెండింగ్ వార్తలు
