Unstoppable Season 2: బాలయ్య షోకు బాహుబలి, లేటెస్ట్ ప్రోమోలో దుమ్మురేపారుగా!

బాలకృష్ణ హోస్ట్ చేస్తున్న ‘అన్ స్టాపబుల్-2‘ షోలో పలువురు సెలబ్రిటీలు పాల్గొని ఎన్నో విశేషాలను చెప్పారు. తాజాగా ఈ షోకు పాన్ ఇండియన్ స్టార్ రాబోతున్నారు. ఈ ఎపిసోడ్ ప్రోమో ప్రేక్షకులను ఆకట్టుకుంటోంది.

Photo Credit: ahavideoin/twitter

నందమూరి బాలకృష్ణ హోస్ట్ చేస్తున్న టాక్ షో ‘అన్ స్టాపబుల్ విత్ ఎన్బీకే’. ‘ఆహా’ ఓటీటీగా వేదికగా ప్రసారం అయిన తొలి సీజన్.. దేశ వ్యాప్తంగా మంచి క్రేజ్ సంపాదించుకుంది. పలువురు టాలీవుడ్ టాప్ సెలబ్రిటీలు ఈ షోలో పాల్గొని ఎన్నో విశేషాలను వెల్లడించారు. తాజాగా ప్రసారం అవుతున్న ‘అన్ స్టాపబుల్’ సీజన్-2 కూడా చక్కటి ప్రేక్షకాదరణ పొందుతోంది. చాలా మంది సెలబ్రిటీలు ఈ షోకు హాజరయ్యారు. తాజాగా ఈ షోకు స్పెషల్ గెస్టుగా పాన్ ఇండియన్ స్టార్ రాబోతున్నారు. ఈ దెబ్బతో ఈ షోకు మరింత క్రేజ్ పెరుగుతోందని నిర్వాహకులు భావిస్తున్నారు.  

బాలయ్య ‘బాహుబలి’ ఎపిసోడ్

త్వరలో ప్రసారం కానున్న ‘అన్ స్టాపబుల్’ షోకు పాన్ ఇండియన్ స్టార్ ప్రభాస్ గెస్టుగా రాబోతున్నారు. ఈ ఎపిసోడ్ కు సంబంధించిన షూటింగ్ ఈ రోజు (డిసెంబర్ 11న) జరగనుంది. డిసెంబర్ 16న ప్రసారం కానుంది. ప్రభాస్ తో పాటు ఈషోలో ఆయన మిత్రుడు, మరో హీరో గోపీచంద్ కూడా హాజరుకానున్నట్లు తెలుస్తోంది. ఎపిసోడ్ ప్రభాస్ తో మొదలైనా, గోపీచంద్ మధ్యలో జాయిన్ కాబోతున్నట్లు సమాచారం. తాజాగా ఈ షోకు సంబంధించిన ప్రోమోను ఆహా విడుదల చేసింది. ఇందులో ప్రభాస్, బాలయ్య విజువల్స్ ప్రేక్షకులను అలరిస్తున్నాయి. ప్రభాస్ సినిమాలకు సంబంధించిన సీన్స్ తో పాటు, బాలయ్య నటించిన చిత్రాలకు సంబంధించిన సీన్స్ ఇందులో కనిపించాయి. ఇద్దరి పవర్ ఫుల్ సినిమా క్లిప్స్ తో గ్రాండ్ గా ప్రోమో రిలీజ్ చేశారు. ఈషో ‘బాహుబలి ఎపిసోడ్’గా ప్రేక్షకుల ముందుకు రాబోతుంది. దీని కోసం ఆడియెన్స్ ఎంతో ఆసక్తిగా ఎదురుచూస్తున్నారు.

The Bahubali episode #Unstoppable Season 2 is coming soon 😉
Watch out for more updates ✌🏻#UnstoppableWithNBKS2 #NBKOnAHA #NandamuriBalakrishna @PrabhasRaju #NBKWithPrabhas #MansionHouse @tnldoublehorse @realmeIndia @Fun88India #ChandaBrothers @sprite_india pic.twitter.com/yDW1T5NypP

— ahavideoin (@ahavideoIN) December 11, 2022

వరుస సినిమాల్లో బిజీ బిజీ

ఇక బాలయ్య, ప్రభాస్, గోపీచంద్ వరుస సినిమాలు చేస్తున్నారు. ఓవైపు సినిమాల్లో నటిస్తూనే ‘అన్ స్టాపబుల్’ షో చేస్తున్నారు బాలయ్య. సంక్రాంతి కానుకగా ‘వీర నర్సింహారెడ్డి’ సినిమాతో ప్రేక్షకుల ముందుకు రాబోతున్నారు. ఇక పాన్ ఇండియన్ స్టార్ ప్రభాస్ వరుస సినిమాలతో బిజీగా ఉన్నాడు. ఇప్పటికే ‘ఆది పురుష్’ సినిమా షూటింగ్ కంప్లీట్ చేసిన ప్రభాస్ ‘సలార్’, ‘ప్రాజెక్ట్ కే’ సినిమా షూటింగ్స్ లో బిజీ అయ్యాడు. ఇక గోపీచంద్ ఈ ఏడాది ‘పక్కా కమర్షియల్’ సినిమాతో ప్రేక్షకులను అలరించాడు. దర్శకుడు శ్రీవాస్ తో కలిసి తాజాగా ఓ సినిమా చేస్తున్నాడు. మొత్తంగా  ప్రభాస్‌ తో బాలయ్య ‘అన్ స్టాపబుల్’ ఎపిసోడ్ యూత్ ను బాగా ఆకట్టుకోబోతోంది.