Tirumala Tickets : శ్రీవారి భక్తులకు గుడ్ న్యూస్, జులై 20న ఆగస్టు కోటా టికెట్లు విడుదల

Tirumala Tickets : తిరుమల శ్రీవారి భక్తులకు టీటీడీ మరో గుడ్ న్యూస్ చెప్పింది. ఆగస్టు నెలకు సంబంధించిన అంగప్రదక్షిణం టోకెన్లను విడుదల చేస్తున్నట్లు ప్రకటించింది.

తిరుమల తిరుపతి దేవస్థానం

Tirumala Tickets : తిరుమల శ్రీవారి దర్శనం కోసం భక్తులు ఎంతగానో ఎదురుచూస్తారు. ఒక్కసారైనా కలియుగ దైవాన్ని కనులారా దర్శించుకోవాలని భావిస్తుంటారు. తిరుమలలో అంగప్రదక్షిణం టోకెన్లపై టీటీడీ కీలక సమాచారం విడుదల చేసింది. జులై 20న అంగప్రదక్షిణం టోకెన్ల విడుదల చేస్తున్నట్లు తెలిపింది.  ఆగస్టు నెలకు సంబంధించిన అంగప్రదక్షిణం టోకెన్లను జులై 20న ఉదయం 11 గంటలకు టీటీడీ ఆన్ లైన్ లో విడుదల చేయనుంది. వారంలో శుక్రవారం మినహా అన్ని రోజులు 750 టోకెన్ల చొప్పున కేటాయించనున్నారు. భ‌క్తులు టోకెన్లను ఆన్ లైన్లో బుక్ చేసుకోవాలని టీటీడీ సూచించారు.  

భక్తుల రద్దీ దృష్ట్యా 

కోవిడ్ కారణంగా తాత్కాలికంగా నిలిపివేసిన అంగప్రదక్షణ టోకెన్ల జారీని దాదాపు రెండున్నర ఏళ్ల తరువాత ఈ ఏడాది ఏప్రిల్ 1న ప్రారభించారు. ఆఫ్ లైన్ లో అంగప్రదక్షణ టోకెన్లను తిరుమలలోని సీఆర్వో కార్యాలయం వద్ద భక్తులకు అందుబాటులోకి ఉంచారు. అధిక సంఖ్యలో భక్తుల రద్దీ కారణంగా రోజు వారి తిరుమలలో జారీ చేసే అంగప్రదక్షణ టోకెన్లను ఆన్లైన్ లో  జారీ చేస్తుంది. దీంతో గంటల తరబడి అంగప్రదక్షణ టోకెన్ల కోసం భక్తులు వేచి ఉండే అవసరం లేకుండా ఇంటి వద్దే ఆన్లైన్ ద్వారా టోకెన్లు పొందే సౌకర్యం కల్పించింది టీటీడీ. 

అంగప్రదక్షిణం అంటే? 

ఆపద మొక్కల వాడికి అంగప్రదక్షణ అంటే ఎంతో ప్రీతికరమైనది. అందుకే భక్తి భావంతో భక్తులు పొర్లు దండాలు చేసి స్వామి వారి కటాక్షాలను పొందుతుంటారు.  భక్తుల సౌకర్యార్ధం ప్రతి రోజు వేకువజామున, ఒంటి గంటకు అంగప్రదక్షణ టోకెన్లు ఉన్న భక్తులు ముందుగా శ్రీవారి పుష్కరిణిలో పుణ్యస్నానం  చేసి తడి బట్టలతో వైకుంఠం క్యూ కాంప్లెక్స్ ద్వారా ఆలయంలోకి ప్రవేశిస్తారు. ఇలా ఆలయ ప్రవేశం చేసిన భక్తులు ముందుగా వెండి వాకిలి దాటి బంగారు వాకిలి చేరుకోవాల్సి ఉంటుంది.  వెండి వాకిలి లోపల ఆనంద నిలయం చుట్టూ చేసే ప్రదక్షిణాన్నే అంగప్రదక్షణ అంటారు. సుప్రభాత సేవ జరిగే సమయంలో భక్తులను అంగప్రదక్షణ చేయిస్తుంటారు.  వెండి వాకిలి లోపలికి ప్రవేశించగానే‌ ఎదురుగా ఆదిశేషునిపై శ్రీరంగనాథుడు కనిపిస్తారు. ఈయనకు పైన వరదరాజ స్వామి, కింద వేంకటేశ్వరస్వామి మూర్తులు చిన్న బంగారు ఫలకాలపై ఉంటారు. ఇక్కడి నుంచి అంగప్రదక్షణ మొదలవుతోంది.  ఇలా‌ ఆనంద నిలయం చుట్టూ ఓ ప్రదక్షణ చేసిన తరువాత వారికి స్వామి దర్శన భాగ్యం కల్పిస్తుంది టీటీడీ. 

అంగప్రదక్షణ టోకెన్లు ఆన్ లైన్ లో 

ప్రతి రోజు మధ్యాహ్నం తిరుమల సీఆర్వో కార్యాలయం వద్ద జారీ చేసే అంగప్రదక్షణ టోకెన్లకు భారీ డిమాండ్ ఉంటుంది. ఉదయం నుంచి భక్తులు క్యూలైన్స్ లో టోకెన్ల కోసం వేచి ఉంటారు. ఈ సమయంలో అధిక రద్దీతో భక్తుల మధ్య తోపులాట జరిగే అవకాశం ఉంటుంది. అయితే భక్తులు ఇబ్బందులను దృష్టిలో తీసుకున్న టీటీడీ  ఇకపై భక్తుల సౌకర్యార్థం ఆన్లైన్ లో అంగప్రదక్షణ టోకెన్ల జారీ చేయాలని నిర్ణయించింది. ఈ ఏడాది జూన్ 15వ తేదీ నుంచి ఆన్‌లైన్‌లో భ‌క్తుల‌కు అందుబాటులో అంగ‌ప్రద‌క్షణ‌ టోకెన్లను అందుబాటులోకి తీసుకుని వచ్చింది.  జులై 20వ తేదీ ఉద‌యం 11 గంట‌ల‌కు ఆగస్టు నెలకు సంబంధించిన అంగప్రదక్షణ టోకెన్లను రోజుకు 750 టోకెన్ల చొప్పున టీటీడీ ఆన్‌లైన్‌లో జారీ చేయనుంది. ఆగస్టు నెలకు సంబంధించి మొత్తం 20,250 టోకెన్లను భక్తులకు అందుబాటులో ఉంచనుంది. ఇందుకు సంబంధించిన టీటీడీ వెబ్ సైట్  https://tirupatibalaji.ap.gov.in ద్వారా అంగ‌ప్రద‌క్షణ టికెట్లు బుక్ చేసుకునే అవకాశం కల్పించింది టీటీడీ.