Kakinada: డాక్టర్‌పై జనసేన ఎమ్మెల్యే దాడి! బూతులతో మెడికల్ కాలేజీ వైస్ ఛైర్మన్‌పై దౌర్జన్యం

Kakinada News: రంగరాయ మెడికల్ కాలేజీ స్పోర్ట్స్ వైస్ చైర్మన్ పై దాడి జరిగింది. డాక్టర్ ఉమా మహేశ్వర రావుపై కాకినాడ రూరల్ ఎమ్మెల్యే పంతం నానాజీ బూతులతో దౌర్జన్యానికి దిగారు.

పంతం నానాజీ

Source : x

Janasena MLA Pantam Nanaji: జనసేన ఎమ్మెల్యే పంతం నానాజీ  ఒక మెడికల్ కాలేజీ వైస్ చైర్మన్ (స్పోర్ట్స్ ) పై దౌర్జన్యం చేశారు. ఏకంగా అమ్మనా బూతులతో దుర్భాషలాడారు. కాకినాడ రూరల్ ఎమ్మెల్యేగా ఉన్న పంతం నానాజీ తన అనుచరులతో కలిసి సిటీలోని రంగరాయ మెడికల్ కాలేజీ వద్ద చేసిన దౌర్జన్యం సోషల్ మీడియాలో వైరల్ అయింది. దీనితో గవర్నమెంట్ డాక్టర్ల అసోసియేషన్ భగ్గుమంది. వెంటనే జనసేన అధ్యక్షుడు, ఉప ముఖ్యమంత్రి  పవన్ కళ్యాణ్ డాక్టర్ పై దాడి చేసిన పంతం నానాజీపై చర్యలు తీసుకోకుంటే వెంటనే ఆందోళనకు దిగుతామని హెచ్చరిస్తూ లేఖ రాశారు.

బాస్కెట్ బాల్ ఆడొద్దు అన్నందుకు గొడవ

రంగరాయ మెడికల్ కాలేజ్ అనేది కాకినాడలోనే కాకుండా తెలుగు రాష్ట్రాల్లోనే చాలా ప్రముఖమైన వైద్య కళాశాల. ఇక్కడ చదువుకున్న వారు డాక్టర్లుగా ప్రపంచవ్యాప్తంగా ప్రముఖమైన స్థానాల్లో ఉన్నారు. అంత చరిత్ర ఉన్న రంగరాయ మెడికల్ కాలేజీ గ్రౌండ్లో  బాస్కెట్ బాల్ ఆడుకుంటామంటూ కొందరు అనుచరులు ఎమ్మెల్యే పంతం నానాజీని అడిగారు. వారికోసం నానాజీ మెడికల్ కాలేజీ యాజమాన్యాన్ని అనుమతి కోరారు. అది ఇంకా పెండింగ్ లో ఉంది. ఈలోపులోనే  ఆయన అనుచరులు కొందరు కాలేజీ గ్రౌండ్లో నెట్ కట్టడానికి ప్రయత్నించారు.  దీనిని అక్కడ ఉన్న సిబ్బంది అడ్డుకున్నారు.

విషయం తెలుసుకున్న  రంగరాయ మెడికల్ కాలేజీ స్పోర్ట్స్ వైస్ చైర్మన్ డాక్టర్ ఉమామహేశ్వరరావు అక్కడకు చేరుకుని అనుమతి లేకుండా కాలేజీ గ్రౌండ్లో ఆటలు ఆడడం కుదరదని చెప్పారు. పై అధికారుల అనుమతి గాని సభ్యత్వం గాని లేకుండా కాలేజీ గ్రౌండ్లో ఆడొద్దని అనడంతో అక్కడ మాట మాట పెరిగింది. దానితో ఎమ్మెల్యే అనుచరులు నానాజీ ఇంటికి వెళ్లి ఉమామహేశ్వరరావు మీపై స్టూడెంట్స్ ని రెచ్చగొడుతున్నారంటూ  చెప్పడంతో తన ప్రధాన అనుచరులతో కలిసి కాలేజీ గ్రౌండ్ కి చేరుకున్నారు నానాజీ. డాక్టర్ ఉమామహేశ్వరరావు ఏం జరిగిందో చెప్పే ప్రయత్నం చేస్తుండగానే  "నా పైనే స్టూడెంట్స్ ని  రెచ్చగొడతావా " అంటూ  దౌర్జన్యానికి దిగారు. డాక్టర్ ముఖానికి ఉన్న మాస్కుని సైతం లాగేసారు. అదే సమయంలో అనుచరులు కొందరు డాక్టర్ పై  దాడి చేస్తున్న విజువల్స్ కూడా రికార్డ్ అయ్యాయి. విషయం తెలుసుకున్న విద్యార్థులు సైతం అక్కడకు భారీగా చేరుకుని   నిరసనకు దిగారు. పోలీసులు వారిని ఆపేందుకు తీవ్రంగా ప్రయత్నించినా న్యాయం కోసం వారి ఆందోళన కు దిగడం తో చివరకు ఎమ్మెల్యే క్షమాపణ చెప్పారు.

ఆందోళనకు దిగుతాం : గవర్నమెంట్ డాక్టర్లు 
ఒక ప్రతిష్టాత్మక మెడికల్ కాలేజీ ప్రొఫెసర్ పైనే ఇలా ఒక ఎమ్మెల్యే అండ్ కో దాడికి దిగడంతో ఆంధ్ర ప్రదేశ్ గవర్నమెంట్ డాక్టర్ల అసోసియేషన్ (APGDA )ఆగ్రహం వ్యక్తం చేసింది. ఎమ్మెల్యే అనుచరుల పేరుతో కొందరు కాలేజీ బాస్కెట్బాల్ గ్రౌండ్ ను ఆక్రమించి అక్కడ చట్ట వ్యతిరేకమైన పనులు, బెట్టింగులు, మహిళా స్టూడెంట్ లు  ఉన్న కాలేజ్ ప్రాంతంలో న్యూసెన్స్ కు పాల్పడుతున్నారని అవి వద్దు అని చెప్పినందుకు ఇలా ఎమ్మెల్యేను తీసుకొచ్చి దౌర్జన్యానికి దిగారని లేఖ ను రిలీజ్ చేశారు. కాకినాడ రూరల్ ఎమ్మెల్యే పంతం నానాజీ తమ ప్రొఫెసర్ డాక్టర్ ఉమామహేశ్వరరావుకు బహిరంగ క్షమాపణ చెప్పాలని అలాగే ఎమ్మెల్యే అనుచరులమంటూ దాడి చేసిన పై వారిపై వెంటనే చట్టపరమైన చర్యలు తీసుకోవాలని డిమాండ్ చేశారు. ఉప ముఖ్యమంత్రి హోదాలో పవన్ కళ్యాణ్ తగిన చర్యలు తీసుకోవాలని లేకుంటే 10000 మంది వరకూ ఉన్న  ప్రభుత్వ డాక్టర్లందరూ నిరసనకు దిగుతాము అంటూ ఆయనకు రాసిన లేఖలో పేర్కొన్నారు. మరి దీనిపై కళ్యాణ్ ఎలా స్పందిస్తారో అన్నది రాజకీయంగా చర్చనీయాంశమైంది.