Pawan Kalyan : ఒక్కో కుటుంబానికి రూ.లక్ష ఇస్తున్న పవన్ కల్యాణ్, రేపు అనంతపురం జిల్లాలో రైతు భరోసా యాత్ర

Pawan Kalyan : జనసేనాని పవన్ కల్యాణ్ రేపు అనంతపురం జిల్లాలో పర్యటిస్తు్న్నారు. కౌలు రైతుల భరోసా యాత్రను ప్రారంభించనున్నారు. ఆత్మహత్యలకు పాల్పడిన కౌలు రైతుల కుటుంబాలకు జనసేన ఆర్థిక సాయం చేస్తుంది.

పవన్ కల్యాణ్(ఫైల్ ఫొటో)

Pawan Kalyan : పంటలు నష్టపోయిన ఆత్మహత్య చేసుకున్న కౌలు రైతులకు ఆర్ధిక సాయం అందించేందుకు జనసేన పార్టీ ముందుకొచ్చింది. బాధిత కుటుంబాల్లో ధైర్యం నింపడానికి తలపెట్టిన కౌలు రైతుల భరోసా యాత్రను అనంతపురం జిల్లాలో జనసేన అధినేత పవన్ కల్యాణ్ మంగళవారం ప్రారంభించనున్నారు. ఈ యాత్ర కోసం 12వ తేదీ ఉదయం 9 గంటలకు పవన్ పుట్టపర్తి విమానాశ్రయానికి చేరుకుంటారు. అక్కడి నుంచి కొత్తచెరువు గ్రామానికి చేరుకుంటారు. అక్కడ ఆత్మహత్య చేసుకున్న కౌలు రైతు కుటుంబాన్ని పరామర్శించి ఆర్థిక సాయం అందిస్తారు పవన్ కల్యాణ్. ఉదయం గం.10.30 నిమిషాలకు కొత్త చెరువు నుంచి బయలుదేరి ధర్మవరంలో మరో బాధిత రైతు కుటుంబాన్ని పరామర్శించి ఆర్థిక సహాయం అందిస్తారు. గం.11:20 నిమిషాలకు ధర్మవరం నుంచి బయలుదేరి ధర్మవరం రూరల్ లోని గొట్లూరు గ్రామానికి చేరుకుంటారు. ఆత్మహత్యలకు పాల్పడిన కౌలు రైతుల కుటుంబాలకు జనసేన రూ.లక్ష ఆర్థికసాయం అందిస్తుంది. 

కౌలు రైతులకు అండగా ఉండేదుకే జనసేన రైతు భరోసా యాత్ర pic.twitter.com/bzz3FrrTcd

— JanaSena Party (@JanaSenaParty) April 11, 2022

బాధిత కుటుంబాలకు భరోసా

గొట్టూరులో మరో రైతు కుటుంబాన్ని పవన్ పరామర్శించి వారిలో ధైర్యాన్ని నింపి ఆర్థిక సాయం చేస్తారు. అక్కడి నుంచి మధ్యాహ్నం గం. 12.10 నిమిషాలకు బయలుదేరి అనంతపురం రూరల్ మండలంలోని పూలకుంట గ్రామానికి చేరుకుంటారు. ఆ గ్రామంలో సుమారుగా 20 రోజుల క్రిందట ఆత్మహత్యకు పాల్పడిన యువ రైతు కుటుంబాన్ని ఓదార్చి వారికి ఆర్ధిక సహాయం అందచేస్తారు. చివరిగా 3 గంటలకు అనంతపురం రూరల్ మండలంలోని మన్నీల గ్రామం చేరుకుంటారు. ఆ గ్రామంలో ఆత్మహత్యకు పాల్పడిన ఇద్దరు కౌలు రైతుల కుటుంబాలకు ఆర్థిక సహాయం అందచేసి అక్కడ నిర్వహించే రచ్చబండ కార్యక్రమంలో పాల్గొంటారు. జిల్లాలో ఆత్మహత్యకు పాల్పడిన మరికొందరి కౌలు రైతుల కుటుంబాలకు ఈ సభలో ఆర్థిక సహాయం అందచేసి వారి కుటుంబ పరిస్థితులు తెలుసుకుంటారు. గ్రామసభ అనంతరం హైదరాబాద్ కు బయలుదేరి వెళతారు.

రేపు అనంతపురం జిల్లాలో శ్రీ @PawanKalyan గారి పర్యటన pic.twitter.com/LP6YwnSn9U

— JanaSena Party (@JanaSenaParty) April 11, 2022