AP MPTC ZPTC Election Results Live Updates: ఏపీ పరిషత్ ఫలితాలు.. బొత్స ఫ్యామిలీకి షాక్... జడ్పీటీసీ ఎన్నికల్లో కుమార్తె బొత్స అనూష పరాజయం

AP Parishad Election Results Live Updates | ఏపీలో పరిషత్ ఎన్నికల ఓట్ల లెక్కింపు కొనసాగుతోంది. రాష్ట్ర వ్యాప్తంగా 365 కేంద్రాల్లో లెక్కింపు జరుగుతుండగా.. కొన్ని గంటల్లో ఫలితాలు విడుదల కానున్నాయి.

Background

AP MPTC ZPTC Election Counting Live Updates | నవంబర్ 5న జరిగిన ఆంధ్రప్రదేశ్ పరిషత్‌ ఎన్నికల ఫలితాలు మరికొన్ని గంటల్లో వెలువడనుండటంతో  21,012 మంది అభ్యర్థుల భవితవ్యంపై అన్ని రాజకీయ పార్టీల్లో ఉత్కంఠ నెలకొంది. శనివారం ఉదయం 8 గంటల నుంచే రాష్ట్రవ్యాప్తంగా సిద్ధం చేసిన 365 కేంద్రాల్లో ఓట్ల లెక్కింపు ప్రక్రియ  ప్రారంభమైంది. రాష్ట్ర ఎన్నికల సంఘం (SEC) ఆదేశాల మేరకు అధికారులు కౌంటింగ్ కోసం మూడంచెల పటిష్ట భద్రతతో అన్ని ఏర్పాట్లను  పూర్తి చేశారు. మొత్తం 2,61,52,377 మంది ఓటర్లకు గాను 1.85 కోట్ల మంది ఓటుహక్కు వినియోగించుకోవడంతో 70.72 శాతం పోలింగ్‌ నమోదైంది.

రాష్ట్రవ్యాప్తంగా మొత్తం 659 జడ్పీటీసీ స్థానాలకు గాను 77 స్థానాలు ఏకగ్రీవం కాగా, మిగిలిన 582 స్థానాలకు పోలింగ్ నిర్వహించారు. ఇందులో టీడీపీ నుండి 452, వైసీపీ నుండి 574, జనసేన నుండి 109, బీజేపీ నుండి 34 మందితో పాటు ఇతర పార్టీలు, స్వతంత్రులు కలిపి మొత్తం 2,169 మంది అభ్యర్థులు జడ్పీటీసీ బరిలో నిలిచారు. అలాగే, మొత్తం 9,821 ఎంపీటీసీ స్థానాల్లో 2,051 ఏకగ్రీవమవగా, 3 స్థానాలకు నామినేషన్లు పడలేదు. మిగిలిన 7,767 ఎంపీటీసీ స్థానాలకు నిర్వహించిన ఎన్నికల్లో టీడీపీ నుండి 6,342, వైసీపీ నుండి 7,622, జనసేన నుండి 1,499, బీజేపీ నుండి 280 మంది సహా మొత్తం 18,844 మంది అభ్యర్థులు పోటీ చేశారు. 

లెక్కింపు ప్రక్రియ కోసం 39,694 మంది సిబ్బందిని రంగంలోకి దించారు. గతంలో వర్షాల వల్ల మున్సిపల్ ఎన్నికల ఫలితాల్లో జాప్యం జరిగిన అనుభవాలను దృష్టిలో ఉంచుకుని, ఈసారి శనివారం రాత్రి 8 గంటల లోపే కౌంటింగ్ పూర్తి చేయాలని ఎస్ఈసీ కలెక్టర్లను ఆదేశించింది. ఎలాంటి అవాంఛనీయ సంఘటనలకు తావులేకుండా 40,679 మంది పోలీసులతో భారీ బందోబస్తు ఏర్పాటు చేయడంతో పాటు, కౌంటింగ్ కేంద్రాల వద్ద లోపల, బయట సీసీ కెమెరాల ద్వారా కట్టుదిట్టమైన నిఘా ఉంచారు. ఈ కౌంటింగ్ సీసీటీవీ ఫుటేజ్‌ను 60 రోజుల వరకు సురక్షితంగా భద్రపరచనున్నారు.

మొత్తం జడ్పీటీసీ స్థానాలు   -   659
ఏకగ్రీవమైన స్థానాలు     -  77
పోలింగ్ నిర్వహించినవి    -   582
పోటీ చేసిన మొత్తం అభ్యర్థులు   -   2,169
టీడీపీ అభ్యర్థులు   -  452
జనసేన అభ్యర్థులు   -  109
బీజేపీ అభ్యర్థులు   -   34
పోటీ చేసిన వైసీపీ అభ్యర్థులు   -  574
ఇతర పార్టీలు, స్వతంత్రులు   -   1,000 

మొత్తం ఎంపీటీసీ స్థానాలు  -  9,821
అందులో ఏకగ్రీవాలు   -   2,051
నామినేషన్లు వేయని స్థానాలు   -   3
పోలింగ్ నిర్వహించిన ఎంపీటీసీలు   -   7,767
పోటీ చేసిన మొత్తం అభ్యర్థులు   -   18,844
టీడీపీ అభ్యర్థులు   -   6,342
జనసేన అభ్యర్థులు   -  1,499
బీజేపీ అభ్యర్థులు  -  280
పోటీచేసిన వైసీపీ అభ్యర్థులు  - 7,622 
ఇతర పార్టీలు, స్వతంత్రులు   -  3,101

20:28 PM (IST)  •  07 Nov 2026

30 ఏళ్లకు చీపురుపల్లి మండలం గొల్లలములగాం ఎంపీటీసీ నెగ్గిన టీడీపీ

విజయనగరం జిల్లా చీపురుపల్లి మండలం గొల్లలములగాం ఎంపీటీసీ స్థానాన్ని టీడీపీ కైవసం చేసుకుంది. టీడీపీ అభ్యర్థి చందక దుర్గ భవాన్ని విజయంతో 30 ఏళ్ల తర్వాత ఈ స్థానంలో పసుపు జెండా ఎగిరింది.

19:24 PM (IST)  •  07 Nov 2026

బొత్స ఫ్యామిలీకి షాక్... జడ్పీటీసీ ఎన్నికల్లో కుమార్తె బొత్స అనూష పరాజయం

బొండపల్లి: పరిషత్‌ పోరులో కూటమి విజయపరంపర కొనసాగుతోంది. విజయనగరం(Vizianagaram) జిల్లాలోని బొండపల్లి జడ్పీటీసీ స్థానంలో తెదేపా(TDP) అభ్యర్థి గెలుపొందారు. ఇక్కడి నుంచి  పోటీ చేసిన వైకాపా నేత, శాసనమండలిలో ప్రతిపక్ష నేత బొత్స సత్యనారాయణ కుమార్తె అనూష ఓటమి పాలయ్యారు. బొత్స అనూషపై తెదేపా అభ్యర్థి పాశల నీరజ 5,136 ఓట్ల మెజార్టీతో గెలుపొందారు. నీరజ విజయంతో బొండపల్లిలో కూటమి శ్రేణులు సంబరాలు చేసుకుంటున్నాయి. జిల్లా పరిషత్‌ ఛైర్‌పర్సన్‌ రేసులో ఉన్న అనూష ఓటమి పాలవడంతో వైకాపా శ్రేణులు డీలాపడ్డాయి.