కేబీఆర్ పార్క్ వద్ద పోర్షే కార్ బీభత్సం

హైదరాబాద్‌లోని బంజారా హిల్స్‌లో పోర్షే కార్ బీభత్సం సృష్టించింది. కేబీఆర్ నేషనల్ పార్క్ ఫుట్‌పాత్‌పై వేగంగా దూసుకెళ్లింది. ఈ ఘటనలో ఓ గోడ కూలిపోయింది. అర్ధరాత్రి ఈ ప్రమాదం జరిగినట్టు పోలీసులు వెల్లడించారు. ఫుట్‌పాత్‌పైకి ఎక్కిన కార్ నేరుగా పార్క్‌లోకి దూసుకుపోయింది. అయితే..ఈ కేసులో ట్విస్ట్ ఏంటంటే..ఈ కార్‌కి నంబర్ ప్లేట్ కనిపించలేదు. అప్పటి నుంచే అనుమానాలు వ్యక్తమవుతున్నాయి. యాక్సిడెంట్ అయిన తరవాత నంబర్ ప్లేట్ తొలగించి పారిపోయారా అన్న కోణంలో పోలీసులు విచారణ జరుపుతున్నారు. కార్‌ ఫుట్‌పాత్‌పైకి దూసుకొచ్చిన సమయంలో అక్కడ ఉన్న వాళ్లంతా ప్రాణభయంతో అటూ ఇటూ పరుగులు పెట్టినట్టు ప్రత్యక్ష సాక్షులు వెల్లడించారు. కార్‌లో ఉన్న వాళ్లు ప్రాణాలతోనే బయటపడి..అక్కడే కార్ వదిలేసి పారిపోయారు. మద్యం మత్తులోనే ఇది జరిగినట్టు పోలీసులు అనుమానిస్తున్నారు. ప్రస్తుతం ఈ కార్‌ ఓనర్ కోసం పోలీసులు గాలిస్తున్నారు. ఈ పోర్షే అల్ట్రా లగ్జరీ కార్ విలువ 2 కోట్లకు పైగానే ఉంటుందని చెబుతున్నారు.