Who is Cricketer Bharti Fulmali | ట్రోలర్స్ నోర్లు మూయించిన మహిళా క్రికెటర్

ఇప్పుడున్న క్రికెట్‌లో గేమ్ కంటే ప్లేయర్స్ లుక్స్‌పైనే సోషల్ మీడియాలో ఎక్కువ చర్చ జరుగుతోంది. తాజాగా భారత మహిళా క్రికెటర్ భారతి ఫుల్మాలిపై కొందరు నెటిజన్లు దారుణంగా బాడీ షేమింగ్ ట్రోల్స్ చేస్తున్నారు. ఆమె ఆటను పక్కనపెట్టి.. చూడటానికి మగాడిలా ఉన్నావంటూ, వివిఎస్ లక్ష్మణ్, పొల్లార్డ్‌లా ఉన్నావంటూ హద్దులు దాటి కామెంట్లు చేశారు. 

మహారాష్ట్రకు చెందిన ఈ రైట్ హ్యాండ్ బ్యాటర్ దేశవాళీల్లో విదర్భ తరఫున, డబ్ల్యూపీఎల్‌లో గుజరాత్ జెయింట్స్ తరఫున రాణించి టీమ్ ఇండియాలో చోటు దక్కించుకుంది. అయితే సెలక్టర్లు ఆమె ప్రతిభను చూస్తే, నెటిజన్లు మాత్రం లుక్స్‌కే పరిమితమైపోయారు.

అయితే, తాజాగా ఆమె ట్రోలర్స్‌కు తన బ్యాట్‌తోనే సమాధానం ఇచ్చింది. మహిళల టీ20 ప్రపంచకప్ ముందు వెస్టిండీస్‌తో జరిగిన వార్మప్ మ్యాచ్‌లో భారతి చెలరేగిపోయింది. కేవలం 40 బంతుల్లోనే 6 ఫోర్లు, ఒక సిక్సర్‌తో 56 పరుగులు చేసి నాటౌట్‌గా నిలిచింది. భారతి సంచలన ఇన్నింగ్స్‌తో ఒక్కసారిగా సీన్ మారిపోయింది. నిన్నటివరకు ట్రోల్ చేసిన వారే.. ఇప్పుడు ఆమె టాలెంట్‌కు సెల్యూట్ చేస్తున్నారు. ఎవరు మనల్ని తక్కువ చేసి మాట్లాడినా మన పని మనం చేసుకుంటూ పోతే సక్సెస్ లభిస్తుందని భారతి స్టోరీ నిరూపిస్తోంది.