Shivam Dube Ind vs Ned T20 World Cup | అసలు రహస్యం బయటపెట్టిన శివమ్ దూబే

నెదర్లాండ్స్‌తో ( India vs Netherlands ) జరిగిన మ్యాచ్‌లో టీమిండియా ఆల్‌రౌండర్ శివం దూబే ( Shivam Dube ) తన విశ్వరూపం చూపించాడు. అందరూ తడబడిన పిచ్‌పై అలవోకగా సిక్సర్లు బాదిన దూబే, మ్యాచ్ అనంతరం తన బ్యాటింగ్ శైలి గురించి కొన్ని ఆసక్తికరమైన విషయాలను పంచుకున్నాడు.

"నాకు సిక్సర్లు కొట్టడం అంటే చాలా ఇష్టం, కానీ నేను ఎప్పుడూ గుడ్డిగా ఆడను" అని దూబే స్పష్టం చేశాడు. మ్యాచ్ పరిస్థితులను బట్టి, పిచ్ ఎలా ప్రవర్తిస్తుందో అర్థం చేసుకున్న తర్వాతే గేర్ మారుస్తానని చెప్పాడు. నెదర్లాండ్స్ ఆఫ్ స్పిన్నర్ వరుసగా నాలుగు డాట్ బాల్స్ వేసినప్పుడు కూడా తాను కంగారు పడలేదని, ఆ తర్వాత స్కోరును కవర్ చేయగలననే నమ్మకం తనలో ఉందని దూబే తెలిపాడు.

అహ్మదాబాద్ పిచ్‌పై బంతి కొన్నిసార్లు స్కిడ్ అవ్వడం, మరికొన్నిసార్లు లో-బౌన్స్‌ రావడంతో బ్యాటింగ్ కష్టంగా అనిపించిందని దూబే అన్నాడు. "బౌలర్లు నన్ను బోల్తా కొట్టించడానికి యార్కర్లు వేయరని నాకు తెలుసు. వారు షార్ట్ బాల్స్, స్లోయర్ బాల్స్ వేస్తారని ముందే ఊహించి, వాటి కోసం సిద్ధంగా ఉంటాను" అని తన ప్లానింగ్ గురించి వివరించాడు. మిడిల్ ఓవర్లలో రన్ రేట్‌ను పెంచడమే తన బాధ్యత అని కెప్టెన్, కోచ్ చెప్పినట్లు దూబే తెలిపాడు. కానీ వెంటనే చెలరేగకుండా, 'ఇక కొట్టాల్సిన సమయం వచ్చింది' అని అనిపించినప్పుడే భారీ షాట్లకు వెళ్తానని అన్నాడు.