Captain vs Coach in RR IPL 2026 | పరాగ్ కామెంట్స్‌పై కోచ్ సంగక్కర ఫైర్

క్వాలిఫయర్-2 లో గుజరాత్ టైటాన్స్ చేతిలో ఓడిపోయి రాజస్థాన్ రాయల్స్ టోర్నీ నుండి నిష్క్రమించింది. అయితే ఈ ఓటమి తర్వాత RR క్యాంప్ లో తీవ్ర చర్చ నడుస్తోంది. మ్యాచ్ తర్వాత కెప్టెన్ రియాన్ పరాగ్ చేసిన ఓ కామెంట్ ఇప్పుడు సరికొత్త వివాదానికి తెరలేపింది. తాము ప్లేఆఫ్స్ చేరుతామని అసలు ఎవరూ ఊహించలేదని, ఇక్కడివరకు రావడమే ఎక్కువ అన్నట్లు పరాగ్ మాట్లాడాడు. అయితే కెప్టెన్ చేసిన ఈ కామెంట్స్‌ను హెడ్ కోచ్ కుమార సంగక్కర పూర్తిగా ఖండించాడు. 

ఈ సీజన్లో ఎన్నో ఎత్తుపల్లాల మధ్య లక్నోపై గెలిచి నాలుగో స్థానంతో ప్లేఆఫ్స్ చేరింది రాజస్థాన్. ఎలిమినేటర్‌లో సన్‌రైజర్స్‌ను ఓడించినా.. క్వాలిఫైయర్-2 లో గిల్ సేన చేతిలో ఘోరంగా ఓడిపోయింది. పరాగ్ కామెంట్లపై సంగక్కరను ప్రశ్నించగా.. ఆయన తీవ్ర అసంతృప్తి వ్యక్తం చేశాడు. "మేము కేవలం మ్యాచ్‌లు గెలిపించే ఆటగాళ్లను, టైటిల్ గెలవాలనే మైండ్‌సెట్‌తోనే కొనుగోలు చేశాం. యువ బ్యాటర్ వైభవ్ సూర్యవంశీకి అనుభవం లేకపోయినా, ప్లేయింగ్ ఎలెవన్‌లో ఆడే అర్హత ఉందని నమ్మి తీసుకున్నాం. జట్టులో ఇన్‌ఎక్స్‌పీరియన్స్ ఉన్న మాట వాస్తవమే కావచ్చు, కానీ వారంతా ఇక్కడికి వచ్చింది కేవలం గెలవడానికే" అని సంగక్కర స్పష్టం చేశాడు.

కెప్టెన్ రియాన్ పరాగ్ కామెంట్లతో విభేదించినప్పటికీ.. పూర్తి స్థాయి కెప్టెన్‌గా రియాన్ పరాగ్ చేసిన మొదటి సీజన్ అద్భుతంగా ఉందని కోచ్ కొనియాడాడు. మైదానంలో పరాగ్ తీసుకున్న నిర్ణయాలు చాలా బాగున్నాయని, ఈ సీజన్ నుండి మరిన్ని విషయాలు నేర్చుకుని భవిష్యత్తులో మరింత మెరుగైన కెప్టెన్‌గా ఎదుగుతాడని సంగక్కర చెప్పుకొచ్చారు.