Aryavir Sehwag & Anvay Dravid Debut | సెహ్వాగ్, ద్రవిడ్ కుమారుల అరంగేట్రం

క్రికెట్ దిగ్గజాల వారసులు ఇప్పుడు మైదానంలో తమదైన ముద్ర వేసేందుకు సిద్ధమయ్యారు. ఆస్ట్రేలియా అండర్-19 జట్టుతో జరిగిన తొలి యూత్ వన్డేలో భారత అండర్-19 టీమ్ 7 పరుగుల తేడాతో విజయం సాధించి సిరీస్‌లో శుభారంభం చేసింది. రాజ్‌కోట్ వేదికగా జరిగిన ఈ మ్యాచ్ భారత క్రికెట్ అభిమానులకు ఎంతో ప్రత్యేకంగా నిలిచింది.

ఈ మ్యాచ్‌ ద్వారా టీమిండియా మాజీ డాషింగ్ ఓపెనర్ వీరేంద్ర సెహ్వాగ్ కుమారుడు ఆర్యవీర్ సెహ్వాగ్, అలాగే మాజీ హెడ్ కోచ్ రాహుల్ ద్రవిడ్ చిన్న కుమారుడు ఆన్వయ్ ద్రవిడ్ అండర్-19 క్రికెట్‌లోకి అరంగేట్రం చేశారు. తండ్రిలాగే ఓపెనర్‌గా బరిలోకి దిగిన ఆర్యవీర్ 26 బంతుల్లో 28 పరుగులు చేయగా, ఆన్వయ్ ద్రవిడ్ 18 బంతుల్లోనే 2 ఫోర్లు, 3 సిక్సర్లతో 38 పరుగులు చేసి దూకుడుగా ఆడాడు.

ఇక క్రికెట్ ప్రపంచంలో దిగ్గజాల వారసుల విషయానికొస్తే.. సచిన్ టెండూల్కర్ కుమారుడు అర్జున్ టెండూల్కర్ లెఫ్ట్ ఆర్మ్ పేస్ బౌలర్‌గా దేశవాళీలో గోవా జట్టుకు ప్రాతినిథ్యం వహిస్తూ ఐపీఎల్‌లోనూ ఆడాడు. అలాగే రాహుల్ ద్రవిడ్ పెద్ద కుమారుడు సమిత్ ద్రవిడ్ పేస్ ఆల్‌రౌండర్‌గా ఇప్పటికే భారత్ అండర్-19 జట్టుకు ప్రాతినిథ్యం వహించాడు. ఇప్పుడు తాజాగా ఆర్యవీర్, ఆన్వయ్ కూడా అండర్-19లోకి అడుగుపెట్టడంతో క్రికెట్ ప్రియుల్లో ఆసక్తి మరింత పెరిగింది.