Punch macaque Japan Viral Story | తల్లి ప్రేమ కోసం విలవిలలాడిపోతున్న చిన్ని కోతి పిల్ల కథ | ABP Desam

 ప్రపంచంలో అమ్మ ప్రేమ ఎంత గొప్పదో  అమ్మ ఉన్నవాళ్లకు అర్థం కాకపోవచ్చు..కానీ తల్లి ప్రేమకు దూరమై..ఈ ప్రపంచమంతా మనల్ని వెలివేస్తూ నిర్దయగా ప్రవర్తిస్తుంటే ఆ క్షణం అమ్మ గుర్తొచ్చి ఆ నిష్కల్మషమైన తల్లి ప్రేమ కోసం మన మనసు విలవిలాడిపోతుంది. అచ్చం అలాంటి కథే ఈ బుజ్జి కోతి పిల్లది. వాస్తవానికి వీటిని మకాక్స్ అని పిలుస్తారు. జపాన్  సహా ఏసియా, ఆఫ్రికా ఖండాల్లో కనిపించే చాలా అరుదైన...పాత తరం కోతులు ఇవి. అలాంటి మాకాక్ ఈ బుజ్జి కోతి పిల్ల. జపాన్ లోని ఓ జూలో పెరుగుతున్న ఈ బుజ్జి కోతి పేరు పంచ్. కానీ పుట్టినప్పటి నుంచి తన తల్లి ఎవరో పంచ్ కి తెలియదు. తల్లి లేని పిల్ల కావటంతో మిగిలిన పెద్ద మకాక్ లు దీన్ని తమ బృందంలోకి రానివ్వకుండా వెలివేశాయి. దాంతో బాగా బెంగ పెట్టుకుని ముడుచుకుపోయి బతుకుతున్న పంచ్ కు ఓ ఒరాంగుటాన్ బొమ్మను ఇచ్చారు జూ నిర్వాహకులు. ఇకంతే ఆ ఒరాంగుటాన్ నే తన తల్లిగా అనుకుని ఎక్కడికి వెళ్లినా తోడుగా దాన్ని తీసుకువెళ్తూ..దానిపై తల పెట్టుకుని బజ్జుంటూ అమ్మ ప్రేమను పొందుతోంది బుజ్జి పంచ్. ఎవరో సందర్శకులు కొన్ని వీడియోలు తీసి సోషల్ మీడియాలో పెట్టగా రెండు రోజుల్లో పంచ్ ప్రపంచవ్యాప్తంగా వైరల్ అయిపోయింది. పంచ్ ఒంటరిది కాదని దానికి మేం అంతా ఉన్నామంటూ చాలా మంది జూకి వచ్చి చూసి వెళ్తున్నారు. పంచ్ కోసం బోలెడు ఒరాంగుటాన్ బొమ్మలు కొని పంపిస్తున్నారు. ఏదైమైనా ఇలాంటి ఘటనలు అమ్మ ప్రేమ ఎంత గొప్పదో ప్రపంచానికి గుర్తు చేస్తూ ఉంటాయి కదా.