Minor Apologises to PM Modi | పీఎంపై వ్యాఖ్యలకు క్షమాపణ కోరిన మైనర్

ప్రధాని నరేంద్ర మోదీ సోషల్ మీడియాలో ఓ వీడియో విడుదల చేస్తూ యువతకు సందేశం ఇచ్చారు. "తిట్లతో ఏ సమస్యా పరిష్కారం కాదు. దారి తప్పిన వారిని సరైన మార్గంలో నడిపించాలి. దేశం కోసం కలిసి పని చేద్దాం" అని ప్రధాని పిలుపునిచ్చారు. అలాగే, తప్పుల నుంచి నేర్చుకుని, దేశంతో పాటు ప్రతి యువకుడు కూడా అభివృద్ధి చెందాలని ఆకాంక్షించారు. ఈ సందేశం ఇటీవలి విద్యార్థుల నిరసనల నేపథ్యంలో ప్రాధాన్యం సంతరించుకుంది. ఇక ఇదే విషయంపై ప్రధాని నరేంద్ర మోదీపై అభ్యంతరకర వ్యాఖ్యలు చేసినట్లు సోషల్ మీడియాలో వైరల్ అయిన వీడియోలో కనిపించిన 15 ఏళ్ల మైనర్ బాలిక తాజాగా క్షమాపణలు కోరుతూ మరో వీడియో విడుదల చేసింది.

దాదాపు 50 సెకన్ల నిడివి ఉన్న ఈ వీడియోలో చేతులు జోడించి మాట్లాడిన ఆమె... తాను స్నేహితులతో కలిసి ఢిల్లీలోని కనాట్ ప్లేస్‌కు వెళ్లిన సమయంలో ఓ సోషల్ మీడియా ఇన్‌ఫ్లూయెన్సర్ కెమెరా ముందు మాట్లాడాలని కోరాడని తెలిపింది. ఆ సమయంలో ఆలోచించకుండా ప్రధానిపై అనుచిత వ్యాఖ్యలు చేశానని, ఇప్పుడు ఆ మాటలపై తీవ్ర పశ్చాత్తాపం వ్యక్తం చేస్తున్నానని చెప్పింది. "దేశ ప్రజలందరికీ క్షమాపణలు కోరుతున్నాను. నేను ఎంతో సిగ్గుపడుతున్నాను. తలెత్తుకుని చూడలేని పరిస్థితిలో ఉన్నాను. ఇలాంటి తప్పు మళ్లీ చేయను" అంటూ వీడియోలో పేర్కొంది. ఈ క్షమాపణ వీడియో ప్రస్తుతం సోషల్ మీడియాలో వైరల్‌గా మారింది.