BJP Vs BRS :హన్మకొండ కాకతీయ యూనివర్సిటీ వద్ద ఉద్రిక్తత, బీజేపీ నిరుద్యోగ మార్చ్ కు వ్యతిరేకంగా బీఆర్ఎస్ ఆందోళన

BJP Vs BRS : హన్మకొండ కాకతీయ యూనివర్సిటీ వద్ద ఉద్రిక్తత నెలకొంది. బీజేపీ నిరుద్యోగ మార్చ్ కు వ్యతిరేకంగా బీఆర్ఎస్వీ నేతలు నిరసన చేపట్టారు.

బీఆర్ఎస్ ఆందోళన

BJP Vs BRS :  హన్మకొండ కాకతీయ యూనివర్సిటీలో ఉద్రిక్తత చోటుచేసుకుంది. బీజేపీ నిరుద్యోగ మార్చ్ కు వ్యతిరేకంగా బీఆర్ఎస్వీ నేతలు యూనివర్సిటీ ఫస్ట్ గేటు వద్ద నిరసన చేపట్టారు. ప్రధాని నరేంద్ర మోదీ దిష్టిబొమ్మను దహ‌నం చేశారు. బీజేపీ ఫ్లెక్సీలను దగ్ధం చేసేందుకు బీఆర్ఎస్వీ నేతలు యత్నించారు. ఈ క్రమంలో పోలీసులకు, నేతలకు మధ్య వాగ్వాదం నెలకొంది. కేంద్రంలో ఖాళీగా ఉన్న ప్రభుత్వ ఉద్యోగాలు భర్తీ చేయాలని బీఆర్ఎస్వీ నేతలు డిమాండ్ చేశారు. కేంద్ర ప్రభుత్వ ఉద్యోగాలు భర్తీ చేయకుండా నిరుద్యోగ మార్చ్ నిర్వహించే హక్కు లేదని, నిరుద్యోగ మార్చ్ అడ్డుకుంటామని హెచ్చరించారు. దీంతో 11 మంది నిరసనకారులను పోలీసులు అరెస్ట్ చేసి ధ‌ర్మసాగ‌ర్ పోలీస్ స్టేషన్‌కు తరలించారు. కాకతీయ యూనివర్సిటీ వద్ద భారీగా పోలీసులు మోహరించారు.

బీజేపీ నిరుద్యోగ మార్చ్ 

టీఎస్​పీఎస్సీ పేపర్ల లీకేజీపై శనివారం సాయంత్రం బీజేపీ ఆధ్వర్యంలో హ‌న్మకొండ‌లో నిరుద్యోగ మార్చ్ నిర్వహించనున్నారు. పేపర్ల లీకేజీపై సిట్టింగ్ జడ్జితో విచారణ జరిపించాలని, మంత్రి కేటీఆర్ ​ను బర్తరఫ్ ​చేయాలని, పేపర్ల లీకేజీతో నష్టపోయిన నిరుద్యోగులకు రూ.లక్ష చొప్పున పరిహారం చెల్లించాలనే డిమాండ్లతో భారీ ర్యాలీ చేపడుతున్నారు. బీజేపీ రాష్ట్ర అధ్యక్షుడు బండి సంజయ్, ఓబీసీ మోర్చా జాతీయ అధ్యక్షుడు లక్ష్మణ్, బీజేపీ జాతీయ ఉపాధ్యక్షురాలు డీకే అరుణతో పాటు సీనియర్ నాయకులు ఈ మార్చ్ కు హాజరుకానున్నారు. హన్మకొండలోని కాకతీయ యూనివర్సిటీ జంక్షన్​ నుంచి నయీంనగర్, పెట్రోల్ పంప్, పోలీస్ ​హెడ్ ​క్వార్టర్స్ మీదుగా అంబేడ్కర్ జంక్షన్​ వరకు ర్యాలీ కొనసాగనుంది. శనివారం మధ్యాహ్నం 3 గంటలకు ప్రారంభమయిన ఈ ర్యాలీ.. దాదాపు 2 కిలోమీటర్ల మేర సాగనుంది. కేటీఆర్ ను కేబినెట్ నుంచి బర్తరఫ్ చేయాలని నిరుద్యోగ మార్చ్ లో బీజేపీ నేతలు డిమాండ్ చేశారు. 

దిల్లీలో నిరుద్యోగుల మార్చ్ నిర్వహించండి - మంత్రి తలసాని 

 ఏడాదికి 2 కోట్ల ఉద్యోగాలు ఇస్తామని మోసం చేసిన మోదీ ప్రభుత్వాన్ని బీజేపీ నేతలు నిలదీయాలని మంత్రి తలసాని శ్రీనివాస్‌ యాదవ్‌ డిమాండ్‌ చేశారు. బీజేపీ నాయకులు ఇచ్చిన మాటను నిలబెట్టుకోకుండా తెలంగాణలో నిరుద్యోగుల మిలీనియం మార్చ్‌ చేయడం విడ్డూరంగా ఉందన్నారు. బీజేపీ నాయకులకు దమ్ముంటే దిల్లీలో నిరుద్యోగుల మార్చ్‌ చేయాలని సవాల్ చేశారు. ఉద్యోగాలు ఇస్తామన్న కేంద్రంలోని బీజేపీ తొమ్మిది ఏళ్లలో ఎన్ని ఉద్యోగాలు భర్తీ చేసిందని ప్రశ్నించారు. తెలంగాణ ఏర్పడిన తర్వాత బీఆర్ఎస్ ప్రభుత్వం 1.35 లక్షల ఉద్యోగాలు భర్తీ చేసిందన్నారు. మరో 90 వేల ఉద్యోగాల భర్తీకి నోటిఫికేషన్ జారీ చేసిందని గుర్తుచేశారు. గత ప్రభుత్వాలు బీఆర్‌ అంబేడ్కర్ పేరును ఉపయోగించుకోవడం తప్ప సరైన గౌరవం ఇవ్వలేదన్నారు. సీఎం కేసీఆర్ మాత్రమే దేశంలోనే అతిపెద్ద 125 అడుగుల అంబేడ్కర్ విగ్రహం ఏర్పాటు చేసి నిజమైన గౌరవం కల్పించారని తెలిపారు. కేంద్రం నుంచి నిధులు తెచ్చి అభివృద్ధి చేయడం చేతకాని బీజేపీ నేతలు ప్రభుత్వంపై విమర్శలు చేయడం సిగ్గుచేటన్నారు. కేంద్రమంత్రిగా ఉన్న కిషన్ రెడ్డి నాలుగేళ్లుగా ఎన్ని నిధులు తెచ్చారని మంత్రి తలసాని ప్రశ్నించారు.