VC Sajjanar Junior NTR Fans: మీ ఫ్యాన్స్ డీప్ ఫేక్ చేస్తున్నారు..కాస్త చూడండి - జూనియర్ ఎన్టీఆర్‌కు కమిషనర్ సజ్జనార్ రిక్వెస్ట్
VC Sajjanar IPS: చుట్టమల్లే పాటను డీప్ ఫేక్ చేసిన వారిని అరెస్టు చేసినట్లుగా వైరల్ అవుతున్న ఫోటోపై సజ్జనార్ క్లారిటీ ఇచ్చారు. అది ఏఐ డీప్‌ఫేక్ అని .. జూ. ఎన్టీఆర్‌కు కీలక విజ్ఞప్తి చేశారు.
AI Deepfake Photo Misinformation: జూనియర్ ఎన్టీఆర్ నటించిన దేవర చిత్రంలోని చుట్టమల్లే పాటను అసభ్యంగా ఎడిట్ చేశారనే ఆరోపణలతో దొండ హర్ష కుమార్ రెడ్డిని హైదరాబాద్ సిటీ పోలీసులు అరెస్ట్ చేశారని, అందుకు పోలీసులకు ధన్యవాదాలు తెలుపుతున్నామంటూ సోషల్ మీడియా లో ఒక ఫోటోతో కూడిన పోస్ట్ విపరీతంగా వైరల్ అయ్యింది. అయితే, ఈ వైరల్ ఫోటోపై కమిషనర్ వి.సి. సజ్జనార్ స్పందిస్తూ అసలు నిజాలను వెల్లడించారు. ఆ ఫోటో పూర్తిగా కృత్రిమ మేధస్సు ద్వారా సృష్టించిన డీప్‌ఫేక్ ఇమేజ్ అని, నిజమైన చిత్రం కాదని స్పష్టం చేశారు.
సోషల్ మీడియాలో వేగంగా వ్యాప్తి చెందుతున్న ఈ అసత్య ప్రచారంపై సజ్జనార్ క్లారిటీ ఇస్తూ హెచ్చరిక జారీ చేశారు. ఇది ఏఐ ద్వారా రూపొందించిన చిత్రం, నిజమైన ఫోటో కాదు. ఇటువంటి డీప్‌ఫేక్ చిత్రాలను నమ్మవద్దు , వాస్తవాలను నిర్ధారించుకోకుండా వాటిని షేర్ చేయవద్దు అని నెటిజన్లను కోరారు. ఏఐ సాంకేతికత అందుబాటులోకి వచ్చాక డిజిటల్ ఫోటోలు అత్యంత సహజంగా కనిపిస్తున్నాయని, స్క్రీన్‌పై కనిపించే ప్రతిదాన్నీ గుడ్డిగా నమ్మకుండా ప్రశ్నించడం, సత్యాసత్యాలను పరిశీలించడం నేటి కాలంలో అత్యంత కీలకమని ఆయన అన్నారు.
This is an AI-generated image, not a genuine photograph. Please do not fall for such deepfakes or share them without verifying their authenticity. With AI-generated images becoming increasingly realistic, it is important to question what we see online. Just because a photograph looks convincing does not mean it is real. Misinformation spreads faster when people share content without checking the facts. I ask @tarak9999 garu take note of the misuse of my image by some of his fans. CC: @CyberCrimeshyd @hydcitypolice
— V.C. Sajjanar, IPS (@SajjanarVC_IPS) October 8, 2026
ఫ్యాక్ట్ చెకింగ్ చేయకుండా కంటెంట్‌ను రీట్వీట్ చేయడం లేదా షేర్ చేయడం వల్ల సమాజంలో తప్పుడు సమాచారం అత్యంత వేగంగా వ్యాపిస్తుందని సజ్జనార్ ఆందోళన వ్యక్తం చేశారు. అలాగే, ఇంటర్నెట్ వినియోగదారులు సైబర్ నేరాలు, డిజిటల్ మోసాలు , పరువు నష్టం కలిగించే ఏఐ క్రియేషన్స్ పట్ల అప్రమత్తంగా ఉండాలని సూచించారు. ఏదైనా వార్త లేదా ఫోటోను సామాజిక మాధ్యమాల్లో పంచుకునే ముందు దానికి సంబంధించిన అధికారిక మూలాలను సరిచూసుకోవాలని ఆయన స్పష్టం చేశారు. 
ఇదే సందర్భంలో, తన చిత్రాన్ని లేదా పేరును దుర్వినియోగం చేస్తున్న తీరుపై సజ్జనార్ నేరుగా కథానాయకుడు జూనియర్ ఎన్టీఆర్‌ను ట్యాగ్ చేస్తూ ఒక కీలక విజ్ఞప్తి చేశారు. ఎన్టీఆర్ గారూ , మీ అభిమానుల్లో కొందరు నా ఫోటోను ఈ విధంగా దుర్వినియోగం చేస్తున్న విషయాన్ని గమనించగలరు అని పేర్కొన్నారు. అభిమానుల పేరుతో ఇటువంటి ఏఐ డీప్‌ఫేక్ చిత్రాలను రూపొందించి ప్రచారం చేయడాన్ని అరికట్టేలా అవగాహన తెచ్చేందుకు చొరవ చూపాలని సజ్జనార్ కోరారు. సోషల్ మీడియాలో ముసుగులో జరుగుతున్న ఏఐ దుర్వినియోగం, డీప్‌ఫేక్ సైబర్ నేరాల తీవ్రతకు ఈ సంఘటన ఒక నిదర్శనంగా నిలిచింది.
టాప్ హెడ్ లైన్స్
ట్రెండింగ్ వార్తలు
