Telangana News: తెలంగాణ వ్యాప్తంగా రిజిస్ట్రేషన్లు బంద్, పడిగాపులు కాస్తున్న జనం

Telangana News: జూలై 11 ఉదయం నుంచి సాంకేతిక సమస్య కారణంగా సబ్ రిజిస్ట్రార్ కార్యాలయాల్లో పనులు జరగడం లేదు. దీంతో భూ లేదా ఆస్తుల రిజిస్ట్రేషన్ కోసం వచ్చిన జనం పడిగాపులు కాస్తున్నారు.

ప్రతీకాత్మక చిత్రం

Source : Other

Sub Registrar Offices in Telangana: తెలంగాణ వ్యాప్తంగా ఉన్న రిజిస్ట్రార్ ఆఫీసుల్లో భూ రిజిస్ట్రేషన్లు నిలిచిపోయాయి. సాంకేతిక లోపం కారణంగానే ఈ సమస్య తలెత్తినట్లు తెలుస్తోంది. గురువారం (జూలై 11) ఉదయం నుంచి ఇదే సమస్య నెలకొనడంతో సబ్ రిజిస్ట్రార్ కార్యాలయాలకు భూ లేదా ఆస్తుల రిజిస్ట్రేషన్ కోసం వచ్చిన జనం పడిగాపులు కాస్తున్నారు.

ఈ-కేవైసీ సమస్య ఉందని అధికారులు చెబుతున్నారు. సదరు సాంకేతిక సమస్యను వెంటనే పరిష్కరించాలని రిజిస్ట్రేషన్ సేవల కోసం వచ్చిన వారు డిమాండ్ చేస్తున్నారు. సర్వర్ డౌన్ కారణంగా తాము ఏ పనులూ చేయలేమని, సమస్య పరిష్కరిస్తేనే తాము రిజిస్ట్రేషన్ల ప్రక్రియ కొనసాగించేందుకు వీలు పడుతుందని అధికారులు చెబుతున్నారు.

ఆధార్ నెట్ వ‌ర్కింగ్‌లో సాంకేతిక స‌మ‌స్యలు

దేశవ్యాప్తంగా ఆధార్ ఆన్‌లైన్ సేవలు గురువారం నిలిచిపోయాయి. UIDAI నెట్ వర్కింగ్‌లో తలెత్తిన సాంకేతిక కార‌ణాల‌తో ఈ సమస్య తలెత్తింది. దాంతో ఆధార్ ఆధారిత ఓటీపీ సేవలు, రిజిస్ట్రేషన్స్ త‌దిత‌ర సేవలు నిలిచిపోయాయి. ఆ ప్రభావం తెలంగాణలో ముఖ్యంగా రిజిస్ట్రేషన్ల శాఖ సర్వీసులపైన ప‌డింది.  రిజిస్ట్రేషన్లకు ఆధార్ బయోమెట్రిక్ తప్పనిసరి కావ‌డంతో రిజిస్ట్రేషన్లు నిలిచిపోయాయి. అలా నిలిచిపోయిన రిజిస్ట్రేషన్ల సర్వీసులను శుక్రవారం నాటికి రీషెడ్యూల్ చేశారు.