Redmi Pad SE 8.7: రెండు బడ్జెట్ ట్యాబ్‌లు లాంచ్ చేసిన రెడ్‌మీ - రూ.13 వేలలోపే!
Redmi New Tab: ప్రముఖ స్మార్ట్ ఫోన్ బ్రాండ్ రెడ్‌మీ తన కొత్త ట్యాబ్‌లను లాంచ్ చేసింది. దీని ధర రూ.13 వేలలోపే అందుబాటులో ఉంది.
Redmi Pad SE 8.7 Launched: రెడ్‌మీ ప్యాడ్ ఎస్ఈ 8.7 4జీ, రెడ్‌మీ ప్యాడ్ ఎస్ఈ 8.7 ట్యాబ్లెట్లు ఎంపిక చేసిన గ్లోబల్ మార్కెట్లలో లాంచ్ అయ్యాయి. చైనీస్ బ్రాండ్ లాంచ్ చేసిన లేటెస్ట్ ట్యాబ్లెట్లు ఇవే. ఈ రెండు మోడల్స్‌లోనూ మీడియాటెక్ హీలియో జీ85 ప్రాసెసర్‌పై ఈ ట్యాబ్‌లు పని చేయనున్నాయి. 6 జీబీ వరకు ర్యామ్, 128 జీబీ వరకు స్టోరేజ్ ఇందులో ఉంది. ఇందులో 8.7 అంగుళాల ఎల్సీడీ స్క్రీన్‌ను అందించారు. 90 హెర్ట్జ్ రిఫ్రెష్ రేట్ ఫీచర్ కూడా ఉంది. దీని బ్యాటరీ సామర్థ్యం 6650 ఎంఏహెచ్ కాగా, 18W ఫాస్ట్ ఛార్జింగ్‌ను ఇది సపోర్ట్ చేయనుంది. డాల్బీ అట్మాస్ సపోర్ట్ ఉన్న డ్యూయల్ స్పీకర్లను అందించారు.
రెడ్‌మీ ప్యాడ్ ఎస్ఈ 8.7, రెడ్‌మీ ప్యాడ్ ఎస్ఈ 8.7 4జీ ధర ఎంత?
రెడ్‌మీ ప్యాడ్ ఎస్ఈ 8.7 ధర 119 పౌండ్లుగా (మనదేశ కరెన్సీలో రూ.13,000) నిర్ణయించారు. రెడ్‌మీ ప్యాడ్ ఎస్ఈ 8.7 4జీ వెర్షన్ ధర 149 పౌండ్లుగా (మనదేశ కరెన్సీలో 16,000) ఉంది. అరోరా గ్రీన్, గ్రాఫైట్ గ్రే, స్కై బ్లూ కలర్ ఆప్షన్లలో దీన్ని కొనుగోలు చేయవచ్చు. ప్రస్తుతానికి ఇవి యూకేలో అందుబాటులో ఉండనున్నాయి. ఇవి మనదేశంలో ఎప్పుడు లాంచ్ కానున్నాయో తెలియరాలేదు.
రెడ్‌మీ ప్యాడ్ ఎస్ఈ 8.7, రెడ్‌మీ ప్యాడ్ ఎస్ఈ 8.7 4జీ స్పెసిఫికేషన్లు
రెడ్‌మీ ప్యాడ్ ఎస్ఈ 8.7, రెడ్‌మీ ప్యాడ్ ఎస్ఈ 8.7 4జీ ట్యాబ్లెట్లు రెండిట్లోనూ 8.7 అంగుళాల హెచ్‌డీ ప్లస్ ఎల్సీడీ స్క్రీన్‌ను అందించారు. ఎల్సీడీ స్క్రీన్, 90 హెర్ట్జ్ రిఫ్రెష్ రేట్, 600 నిట్స్ పీక్ బ్రైట్‌నెస్ ఫీచర్లు కూడా ఉన్నాయి. మీడియాటెక్ హీలియో జీ85 ప్రాసెసర్‌పై ఈ ట్యాబ్‌లు రన్ కానున్నాయి. 6 జీబీ వరకు ర్యామ్, 128 జీబీ వరకు స్టోరేజ్ ఇందులో ఉన్నాయి.
వీటిలో 8 మెగాపిక్సెల్ కెమెరాను అందించారు. ముందువైపు 5 మెగాపిక్సెల్ సెల్ఫీ కెమెరా అందుబాటులో ఉంది. ఈ ట్యాబ్‌లు డ్యూయల్ స్టీరియో స్పీకర్లు, డాల్బీ అట్మాస్ సర్టిఫికేషన్‌తో రానున్నాయి. వైఫై 5, బ్లూటూత్ వీ5.3, ఎఫ్ఎం రేడియో, 3.5 ఎంఎం హెడ్ ఫోన్ జాక్, యూఎస్‌బీ టైప్-సీ పోర్టు వంటి ఫీచర్లు ఉన్నాయి. వీటి బ్యాటరీ సామర్థ్యం 6650 ఎంఏహెచ్ బ్యాటరీగా ఉంది. ఇవి 18W ఫాస్ట్ ఛార్జింగ్‌ను సపోర్ట్ చేయనుంది. వీటి మందం 0.88 సెంటీమీటర్లు కాగా, బరువు 375 గ్రాములుగా ఉంది.
టాప్ హెడ్ లైన్స్
ట్రెండింగ్ వార్తలు
