Nokia Rugged Phone: కింద పడ్డా, నీళ్లలో పడ్డా ఏమీ కాదు.. నోకియా అదిరిపోయే ఫోన్ వచ్చేసింది!

ప్రముఖ స్మార్ట్ ఫోన్ బ్రాండ్ నోకియా మనదేశంలో కొత్త స్మార్ట్ ఫోన్ లాంచ్ చేసింది. అదే నోకియా ఎక్స్ఆర్20. ఇందులో మిలటరీ గ్రేడ్ డిజైన్‌ను అందించారు.

నోకియా ఎక్స్ఆర్20 స్మార్ట్ ఫోన్ మనదేశంలో లాంచ్ అయింది.

నోకియా ఎక్స్ఆర్20 స్మార్ట్ ఫోన్ మనదేశంలో లాంచ్ అయింది. ఇందులో మిలటరీ గ్రేడ్ డిజైన్‌ను అందించారు. 55 డిగ్రీల నుంచి -20 డిగ్రీల వరకు ఉష్ణోగ్రతల వరకు కూడా ఈ ఫోన్ పని చేస్తుంది. 1.8 మీటర్ల(దాదాపు ఆరు అడుగులు) ఎత్తు నుంచి కింద పడినా ఏమీ కాదని, గంట సేపు నాన్‌స్టాప్‌గా నీళ్లలో ఉంచినా ఏమీ కాదని కంపెనీ అంటోంది. మూడు సంవత్సరాల వరకు ఆపరేటింగ్ సిస్టం అప్‌గ్రేడ్, నాలుగు సంవత్సరాల వరకు నెలవారీ సెక్యూరిటీ అప్‌డేట్స్ అందిస్తామని నోకియా తెలిపింది. ఇందులో 5జీ ఫీచర్ కూడా ఉంది.

నోకియా ఎక్స్ఆర్20 ధర
ఇందులో కేవలం ఒక్క వేరియంట్ మాత్రమే అందుబాటులో ఉంది. 6 జీబీ ర్యామ్ + 128 జీబీ స్టోరేజ్‌తో వచ్చిన ఈ వేరియంట్ ధరను రూ.46,999గా నిర్ణయించారు. దీనికి సంబంధించిన ప్రీ-బుకింగ్స్ అక్టోబర్ 20వ తేదీ నుంచి ప్రారంభం కానున్నాయి. గ్రానైట్, అల్ట్రా బ్లూ రంగుల్లో ఈ ఫోన్ కొనుగోలు చేయవచ్చు. అక్టోబర్ 30వ తేదీన ఈ ఫోన్ సేల్ జరగనుంది. ఆఫ్‌లైన్ రిటైల్ స్టోర్లు, ఈ-కామర్స్ ప్లాట్‌ఫాంలు, నోకియా.కాం వెబ్‌సైట్లలో ఈ ఫోన్ కొనుగోలు చేయవచ్చు.

ఈ ఫోన్ ప్రీ-బుకింగ్ చేసుకున్న వారికి రూ.3,599 విలువైన నోకియా పవర్ ఇయర్‌బడ్స్ లైట్ ఉచితంగా లభించనున్నాయి. దీంతో పాటు వన్ ఇయర్ స్క్రీన్ ప్రొటెక్షన్ ప్లాన్ కూడా నోకియా అందించనుంది.

నోకియా ఎక్స్ఆర్20 స్పెసిఫికేషన్లు
ఆండ్రాయిడ్ 11 స్టాక్ ఆపరేటింగ్ సిస్టంపై ఈ ఫోన్ పనిచేయనుంది. ఇందులో 6.67 అంగుళాల ఫుల్ హెచ్‌డీ+ డిస్‌ప్లేను అందించారు. దీని యాస్పెక్ట్ రేషియో 20:9గా ఉంది. కార్నింగ్ గొరిల్లా గ్లాస్ విక్టస్ ప్రొటెక్షన్‌ను కూడా ఇందులో అందించారు.

దీని బ్యాటరీ సామర్థ్యం 4630 ఎంఏహెచ్‌గా ఉంది. 18W వైర్డ్ చార్జింగ్, 15W వైర్‌లెస్ చార్జింగ్ ఫీచర్లు ఇందులో ఉన్నాయి.  క్వాల్‌కాం స్నాప్‌డ్రాగన్ 480 ప్రాసెసర్‌పై ఈ ఫోన్ పనిచేయనుంది. 6 జీబీ వరకు ర్యామ్, 128 జీబీ వరకు స్టోరేజ్‌ను ఇందులో అందించారు. దీన్ని మైక్రో ఎస్‌డీకార్డు ద్వారా 512 జీబీ వరకు పెంచుకోవచ్చు.

ఇక కెమెరాల విషయానికి వస్తే.. ఇందులో వెనకవైపు రెండు కెమెరాలు అందించారు. వీటిలో ప్రధాన కెమెరా సామర్థ్యం 48 మెగాపిక్సెల్‌గా ఉండగా, దీంతోపాటు 13 మెగాపిక్సెల్ అల్ట్రావైడ్ యాంగిల్ షూటర్ కూడా ఉంది. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ అందించారు.

MIL-STD810H సర్టిఫికేషన్ కూడా ఇందులో ఉంది. ఐపీ68 డస్ట్, వాటర్ రెసిస్టెంట్ ఫీచర్ ఇందులో అందించారు. యాక్సెలరో మీటర్, యాంబియంట్ లైట్ సెన్సార్, బారో మీటర్, గైరోస్కోప్, మ్యాగ్నెటోమీటర్, ప్రాక్సిమిటీ సెన్సార్లు కూడా ఇందులో ఉండనున్నాయి.

5జీ, 4జీ ఎల్టీఈ, వైఫై 6, బ్లూటూత్ వీ5.1, జీపీఎస్/ఏ-జీపీఎస్/నావిక్, ఎన్‌ఎఫ్‌సీ, యూఎస్‌బీ టైప్-సీ పోర్టు, 3.5 ఎంఎం హెడ్ ఫోన్ జాక్ కూడా ఇందులో ఉన్నాయి. దీని మందం 1.06 సెంటీమీటర్లు కాగా, బరువు 248 గ్రాములుగా ఉంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి