Infinix Smart 8: రూ.9 వేలలోపే ఇన్‌ఫీనిక్స్ కొత్త ఫోన్ - రెండు కెమెరాలు, లేటెస్ట్ ప్రాసెసర్‌తో!

Infinix New Phone: ప్రముఖ స్మార్ట్ ఫోన్ బ్రాండ్ ఇన్‌ఫీనిక్స్ తన కొత్త ఫోన్‌ను లాంచ్ చేసింది. అదే ఇన్‌ఫీనిక్స్ స్మార్ట్ 8.

ఇన్‌ఫీనిక్స్ స్మార్ట్ 8 మొబైల్ లాంచ్ అయింది.

Source : Infinix

Infinix Smart 8 Launch: ఇన్‌ఫీనిక్స్ స్మార్ట్ 8 స్మార్ట్ ఫోన్ నైజీరియాలో లాంచ్ అయింది. ఈ సంవత్సరం ఫిబ్రవరిలో వచ్చిన ఇన్‌ఫీనిక్స్ స్మార్ట్ 7కి తర్వాతి వెర్షన్‌గా ఈ ఫోన్ మార్కెట్లోకి వచ్చింది. ఇందులో 5000 ఎంఏహెచ్ బ్యాటరీని అందించారు. ప్రస్తుతానికి నైజీరియాలోనే లాంచ్ అయినప్పటికీ త్వరలో మనదేశంలో కూడా లాంచ్ అయ్యే అవకాశం ఉంది.

ఇన్‌ఫీనిక్స్ స్మార్ట్ 8 ధర (Infinix Smart 8 Price)
ఈ ఫోన్ నైజీరియాలో 97,900 నైరాల (మనదేశ కరెన్సీలో సుమారు రూ.10,100) ధరతో లాంచ్ అయింది. జీఎస్ఎంఎరీనా కథనం ప్రకారం దీన్ని 82,000 నైరాలకు (సుమారు రూ.8,500) విక్రయించనున్నారు. క్రిస్టల్ గ్రీన్, గెలాక్సీ వైట్, టింబర్ బ్లాక్, షైనీ గోల్డ్ కలర్ ఆప్షన్లలో దీన్ని కొనుగోలు చేయవచ్చు.

ఇన్‌ఫీనిక్స్ స్మార్ట్ 8 స్పెసిఫికేషన్లు, ఫీచర్లు (Infinix Smart 8)
ఇందులో 6.6 అంగుళాల హెచ్‌డీ+ డిస్‌ప్లేను అందించారు. దీని పీక్ బ్రైట్‌నెస్ 90 హెర్ట్జ్‌గా ఉంది. ఆండ్రాయిడ్ 13 ఆధారిత ఎక్స్ఓఎస్ 13 ఆపరేటింగ్ సిస్టంపై పని చేయనుంది. యూనిసోక్ టీ606 ప్రాసెసర్‌పై ఇన్‌ఫీనిక్స్ స్మార్ట్ 8 రన్ కానుంది. 4 జీబీ ర్యామ్ ఇందులో ఉంది. దీన్ని 8 జీబీ వరకు పెంచుకోవచ్చు. 256 జీబీ వరకు స్టోరేజ్ కూడా అందించారు. దీన్ని మైక్రో ఎస్‌డీ కార్డు ద్వారా పెంచుకునే అవకాశం ఉంది.

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు ఉన్నాయి. వీటిలో ప్రధాన కెమెరా సామర్థ్యం 13 మెగాపిక్సెల్ కాగా, దీంతోపాటు ఏఐ అసిస్టెడ్ కెమెరా ఉంది. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరా అందించారు.

దీని బ్యాటరీ సామర్థ్యం 5000 ఎంఏహెచ్ కాగా, 10W వైర్డ్ ఛార్జింగ్‌ను ఈ ఫోన్ సపోర్ట్ చేయనుంది. డ్యూయల్ సిమ్ 4జీ వోల్టే, వైఫై, బ్లూటూత్ వీ5, జీపీఎస్, యూఎస్‌బీ టైప్-సీ కనెక్టివిటీ కూడా ఇందులో ఉన్నాయి. ఫోన్ వెనకవైపు ఫింగర్ ప్రింట్ సెన్సార్‌ను అందించారు. ఇందులో 3.5 ఎంఎం ఆడియో జాక్ కూడా ఉంది.

ఇన్‌ఫీనిక్స్ జీటీ 10 ప్రో స్మార్ట్ ఫోన్ మనదేశంలో ఇటీవలే లాంచ్ అయింది. ఇది ఒక గేమింగ్ ఫోన్ అని చెప్పవచ్చు. ఈ స్మార్ట్ ఫోన్‌లో వెనకవైపు ట్రాన్స్‌పరెంట్ ఎఫెక్ట్ అందించే బ్యాక్ ప్యానెల్ అందించారు. మినీ ఎల్ఈడీ లైట్ స్ట్రిప్, రిఫ్లెక్టివ్ హార్డ్ వేర్‌ను కూడా ఇందులో చూడవచ్చు. మీడియాటెక్ డైమెన్సిటీ 8050 ప్రాసెసర్‌పై ఇన్‌ఫీనిక్స్ జీటీ 10 ప్రో పని చేయనుంది. 8 జీబీ వరకు ర్యామ్, 256 జీబీ వరకు స్టోరేజ్ ఇందులో ఉన్నాయి. వేపర్ కూలింగ్ ఛాంబర్, బైపాస్ ఛార్జింగ్ ఫీచర్లు కూడా ఈ ఫోన్‌లో అందించారు. 120 హెర్ట్జ్ రిఫ్రెష్ రేట్ ఉన్న అమోఎల్ఈడీ స్క్రీన్‌ ఇందులో ఉంది. ఫోన్ వెనకవైపు మూడు కెమెరాలు అందించారు. వీటిలో ప్రధాన కెమెరా సామర్థ్యం 108 మెగాపిక్సెల్‌గా ఉండటం విశేషం.