SLvIND: తొలి టీ20లో 38 పరుగుల తేడాతో భారత్ విజయం
కొలంబో వేదికగా ఆదివారం ముగిసిన తొలి టీ20 మ్యాచ్‌లో ఆల్‌రౌండర్ ప్రదర్శన కనబర్చిన భారత్ జట్టు 38 పరుగుల తేడాతో శ్రీలంకని ఓడించింది.
ఇప్పటికే వన్డే సిరీస్‌ను చేజెక్కించుకున్న టీమిండియా టీ20 సిరీస్‌లోనూ బోణి కొట్టింది. కొలంబో వేదికగా ఆదివారం ముగిసిన తొలి టీ20 మ్యాచ్‌లో ఆల్‌రౌండర్ ప్రదర్శన కనబర్చిన భారత్ జట్టు 38 పరుగుల తేడాతో శ్రీలంకని ఓడించింది.
మొదట సూర్యకుమార్ యాదవ్ (50: 34 బంతుల్లో 5x4, 2x6) హాఫ్ సెంచరీ బాదడంతో 5 వికెట్ల నష్టానికి 164 పరుగులు చేసింది. అనంతరం భువనేశ్వర్ కుమార్ (4/22), దీపక్ చాహర్ (2/24) చెలరేగడంతో శ్రీలంక 126 పరుగులకే కుప్పకూల్చింది. దాంతో మూడు టీ20ల సిరీస్‌లో భారత్ 1-0తో ఆధిక్యంలో నిలిచింది. రెండో టీ20 మ్యాచ్ కొలంబో వేదికగానే మంగళవారం రాత్రి 8 గంటలకి ప్రారంభంకానుంది.
165 పరుగుల లక్ష్య ఛేదనని శ్రీలంక పేలవంగా ఆరంభించింది. ఓపెనర్లు మినోద్ భానుక (10: 7 బంతుల్లో 2x4), అవిష్కా ఫెర్నాండో (26: 23 బంతుల్లో 3x4) తక్కువ స్కోర్లకే వికెట్లు చేజార్చుకున్నారు. 3వ వచ్చిన ధనంజయ డిసిల్వా (9: 10 బంతుల్లో 1x4) కూడా ఫెయిలయ్యాడు. కానీ.. చరిత అసలంక (44: 26 బంతుల్లో 3x4, 3x6) కాసేపు దూకుడుగా ఆడి గెలుపు ఆశలు రేపాడు. స్పిన్నర్లని లక్ష్యంగా చేసుకుని అతను సిక్సర్లు బాదాడు. ప్రమాదకరంగా మారిన అసలంకని ఇన్నింగ్స్ 16వ ఓవర్‌లో ఔట్ చేసిన దీపక్ చాహర్.. అదే ఓవర్‌లో హసరంగా(0)ని క్లీన్ బౌల్డ్ చేసి మ్యాచ్‌ని భారత్ వైపు తిప్పాడు.
ఇక చివర్లో కరుణరత్నె (3), ఇసుర ఉదాన (1)తో పాటు చమీరా (1)లను ఔట్ చేసేసిన భువనేశ్వర్ కుమార్ 18.3 ఓవర్లలోనే శ్రీలంక ఇన్నింగ్స్‌కి ముగింపు పలికేశాడు. స్పిన్నర్లు కృనాల్ పాండ్య, వరుణ్ చక్రవర్తి, చాహల్ తలో వికెట్ పడగొట్టగా.. హార్దిక్ పాండ్యాకి కూడా ఓ వికెట్ దక్కింది. మొత్తంగా ఆరుగురు బౌలర్లు బౌలింగ్ చేయగా.. అందరికీ వికెట్లు పడటం గమనార్హం. శ్రీలంక చివర్లో కేవలం 15 పరుగుల వ్యవధిలోనే ఆరు వికెట్లు చేజార్చుకుంది.
మ్యాచ్‌లో అంతకముందు టాస్ గెలిచిన శ్రీలంక కెప్టెన్ దసున్ షనక మరో ఆలోచన లేకుండా ఫీల్డింగ్ ఎంచుకున్నాడు. దాంతో.. మొదట బ్యాటింగ్ ఆరంభించిన టీమిండియా.. తొలి బంతికే పృథ్వీ షా (0) రూపంలో వికెట్ చేజార్చుకుంది. అయితే.. నెం.3లో వచ్చిన సంజు శాంసన్ (27: 20 బంతుల్లో 2x4, 1x6) క్రీజులో ఉన్నంతసేపు దూకుడుగా ఆడుతూ కనిపించాడు. మరో ఎండ్‌లో కెప్టెన్ శిఖర్ ధావన్ (46: 36 బంతుల్లో 4x4, 1x6) స్లోగా స్టార్ట్ చేశాడు. ఇన్నింగ్స్ 11వ ఓవర్ నుంచి శిఖర్ ధావన్ గేర్ మార్చగా.. సూర్యకుమార్ యాదవ్ క్రీజులోకి వచ్చినప్పటి నుంచి భారీ షాట్లు ఆడేశాడు. దాంతో 14 ఓవర్లు ముగిసే సమయానికి 113/2తో నిలిచిన భారత్ మెరుగైన స్కోరు చేసేలా కనిపించింది. కానీ.. ఓవర్ వ్యవధిలో శిఖర్ ధావన్, సూర్యకుమార్ యాదవ్ ఔటవగా.. అనంతరం వచ్చిన హార్దిక్ పాండ్యా (10: 12 బంతుల్లో) తేలిపోయాడు. అయితే.. చివర్లో ఇషాన్ కిషన్ (20 నాటౌట్: 14 బంతుల్లో 1x4, 1x6) విలువైన పరుగులు చేశాడు.
టాప్ హెడ్ లైన్స్
ట్రెండింగ్ వార్తలు
