Vishnu Sahasranamam: విష్ణుసహస్రం పారాయ‌ణం చేయాల్సిన సందర్భాలివే!

Vishnu Sahasranamam: పవిత్రత, ఆధ్యాత్మిక బలం పెరగడానికి విష్ణుసహస్రనామ పారాయణం చేయాలి. ఈ ప్ర‌క్రియ‌లో శ్రీ మ‌హావిష్ణువు 1000 నామాలను జపిస్తారు. ఈ నామాలు విష్ణువు మహిమల‌ను వివరిస్తాయి. ఈ నామాల‌న్నీ ఆధ్యాత్మికత, ధ్యానం, భక్తి, అంతర్గత శాంతి కోసం పారాయ‌ణ చేస్తారు. విష్ణుసహస్రనామాన్ని పారాయ‌ణ చేయ‌డం వల్ల మానసిక ప్రశాంతతతో పాటు మానసిక ఆందోళనలు తగ్గుతాయి.

విష్ణు సహస్రనామాన్ని క్రమం తప్పకుండా పారాయణం చేయడం వల్ల కష్టాలు, బాధల నుంచి ఉపశమనం లభిస్తుంది. విష్ణు సహస్రనామాన్ని పఠించడం వల్ల శారీరక, మానసిక ఆరోగ్యం మెరుగుపడుతుందని విశ్వ‌సిస్తారు. క్రమం తప్పకుండా విష్ణు స‌హ‌స్ర‌నామాన్ని పారాయ‌ణ చేయ‌డం వల్ల అశాంతి, చెడు సంకల్పం, అభ్యంతరాలు తొలగిపోతాయి. ఇది హిందూ ధ‌ర్మంలోని అత్యంత పవిత్రమైన గ్రంథాల్లో ఒకటి. ఎవరైతే ఈ పారాయణాన్ని నిర్మలమైన మనస్సుతో, నిశ్చ‌ల భక్తితో పారాయ‌ణ చేస్తారో లేదా వింటారో వారి కోరికలన్నీ నెరవేరుతాయని చెబుతారు.

Also Read : ఈ రూపంలో ఉన్న శ్రీ మహావిష్ణువుని పూజిస్తే కుటుంబ వృద్ధి, శత్రునాశనం!

విష్ణు సహస్రనామాన్ని ఎప్పుడు జపించాలి

•  జ్యోతిష్య శాస్త్రం ప్రకారం, జాతకంలో బృహస్పతి క్షీణించినప్పుడు లేదా చాలా బలహీనంగా ఉన్నప్పుడు, విష్ణు సహస్రనామాన్ని జపించడం ప్రయోజనకరంగా ఉంటుంది. ఫ‌లితంగా  జాతకంలో గురు గ్రహం బలపడుతుంది.
•  జాతకంలో 6, 8 లేదా 12వ ఇంట్లో బృహస్పతి సంచరించినప్పుడు కూడా విష్ణు సహస్రనామం పారాయ‌ణ చేయాలి. దీని ద్వారా వ్యక్తికి ఎటువంటి సమస్యలు ద‌రిచేర‌వ‌ని, జాత‌కంలో చెడు ఫలితాలను ఇచ్చే గ్రహాలు శాంతిస్తాయ‌ని నమ్ముతారు.
•  జాతకంలో బృహస్పతి కారణంగా కడుపు లేదా కాలేయ సమస్య ఉన్నప్పుడు, జ్యోతిష్క‌లు విష్ణు సహస్రనామాన్ని పఠించమని సలహా ఇస్తారు.
•  వివాహానికి ఆటంకాలు ఎదురైనా, వివాహానంతరం సంతానోత్పత్తి సమస్యలు ఎదురవుతున్నా అలాంటి సమయాల్లో విష్ణు సహస్రనామ పారాయణం మేలు చేస్తుంది.

 విష్ణు సహస్ర‌నామ పారాయణ నియమాలు

• బ్రహ్మ ముహూర్తంలో విష్ణు సహస్ర‌నామం జపించండి, విష్ణువును ధ్యానించండి
•  పసుపు రంగు వ‌స్త్రాలు ధరించి ఈ పారాయణం చేయాలి. పూజ సమయంలో బెల్లం లేదా పసుపు రంగు మిఠాయిలు సమర్పించాలి.
•  గురువారం సాయంత్రం ఉప్పు వేసిన ప‌దార్థాలు తినకూడదు.
• విష్ణుసహస్రనామాన్ని పారాయ‌ణ చేసే రోజుల్లో సాత్వికమైన ఆహారం తీసుకోవాలి.

Also Read : వీటిని విక్ర‌యిస్తే పాపాలు చుట్టుముడ‌తాయ్!

విశ్వంలోని ప్రతి సంఘటన విష్ణువుకు సంబంధించినది. విశ్వం సృష్టికర్త అయిన విష్ణువు కోరికలను నెరవేరుస్తాడ‌ని నమ్ముతారు. జీవితంలోని ప్రతి అవరోధాన్ని, ప్రతి విపత్తును తొలగించే విష్ణు స‌హ‌స్ర‌నామం హిందూ ధ‌ర్మంలో చాలా ముఖ్యమైనది. కాబట్టి, మీరు మీ జాతకంలో బృహస్పతి స్థానాన్ని బలోపేతం చేయాలనుకుంటే లేదా మీ ఆర్థిక పరిస్థితిని మెరుగుపరచుకోవాలనుకుంటే, మీరు విష్ణుస‌హ‌స్ర‌నామాన్ని త‌ప్ప‌కుండా పారాయ‌ణ చేయాలి.

Disclaimer: ఇక్కడ అందించిన సమాచారం కేవలం మత విశ్వాసాల మీద ఆధారపడి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను ధృవీకరించడం లేదని గమనించగలరు.