Feeling Sleepy After Eating : భోజనం చేసిన వెంటనే నిద్ర వస్తుందా? నిద్రమత్తును దూరం చేసే టిప్స్ ఇవే

Sleepy Right After Eating : చాలామందికి భోజనం చేసిన తర్వాత నిద్ర వస్తుంది. దీనికి కారణాలు ఏంటో.. నిద్రమత్తును ఎలా దూరం చేసుకోవాలో.. ఇప్పుడు చూసేద్దాం.

భోజనం చేసిన వెంటనే మత్తుగా అనిపిస్తోందా? దీని వెనుక కారణాలివే

ఆహారం తిన్న తర్వాత దానిని జీర్ణం చేయడానికి శరీరం ఎక్కువగా పనిచేస్తుంది. ఈ ప్రక్రియకు శక్తి అవసరం కావడంతో కొందరికి అలసట, మత్తు లేదా నిద్ర వచ్చినట్లు అనిపిస్తుంది. ఇది చాలా సందర్భాల్లో సహజమైన ప్రతిస్పందనగా చెప్తారు.

తెల్ల బియ్యం, బిర్యానీ, స్వీట్లు, బ్రెడ్, పాస్తా వంటి కార్బోహైడ్రేట్లు ఎక్కువగా ఉన్న ఆహారం రక్తంలో చక్కెర స్థాయిలను ఒక్కసారిగా పెంచుతుంది. ఆ తర్వాత అవి తగ్గినప్పుడు మత్తు, బద్ధకం, నిద్ర ఎక్కువగా అనిపించవచ్చు.

అవసరానికి మించి భోజనం చేస్తే జీర్ణవ్యవస్థపై భారం పెరుగుతుంది. దీంతో శరీరం విశ్రాంతి కోరినట్లు అనిపించి నిద్రమత్తు రావచ్చు. కాబట్టి ఒకేసారి ఎక్కువగా తినడం కంటే పరిమితంగా తినడం మంచిది.

రాత్రి తగినంత నిద్రపోకపోతే భోజనం చేసిన తర్వాత ఆ అలసట మరింత స్పష్టంగా కనిపిస్తుంది. అంటే కారణం భోజనం కాకుండా, నిద్రలేమి కూడా కావచ్చు.

డయాబెటిస్ లేదా ప్రీ-డయాబెటిస్ ఉన్నవారిలో భోజనం తర్వాత గ్లూకోజ్ స్థాయిల్లో వచ్చే మార్పుల వల్ల కూడా నిద్ర, అలసట కలగవచ్చు. ఇది తరచూ జరుగుతుంటే ఒకసారి వైద్యుడిని సంప్రదించి రక్తంలో చక్కెర పరీక్ష చేయించుకోవడం మంచిది.

అన్నం, పాలు, గుడ్లు, అరటిపండ్లు వంటి కొన్ని ఆహారాల్లో ట్రిప్టోఫాన్ అనే అమైనో ఆమ్లం ఉంటుంది. ఇది సెరోటోనిన్, మెలటోనిన్ ఉత్పత్తిలో పాత్ర పోషిస్తుంది. అయితే సాధారణంగా ఒక్క ఆహార పదార్థం వల్లే ఎక్కువ నిద్ర వస్తుందని చెప్పడానికి బలమైన ఆధారాలు లేవు. మొత్తం భోజనం ప్రభావం చూపుతుందట.

భోజనం చేసిన ప్రతిసారీ తీవ్రమైన నిద్ర, బలహీనత, తల తిరగడం లేదా చెమటలు పట్టడం వంటి లక్షణాలు కనిపిస్తే అది డయాబెటిస్, థైరాయిడ్ సమస్యలు, రక్తహీనత లేదా ఇతర ఆరోగ్య సమస్యలకు సంకేతం కావచ్చు. ఇలాంటి పరిస్థితుల్లో వైద్యులను సంప్రదించడం మంచిది.

నిద్రమత్తు తగ్గాలంటే ఒకేసారి ఎక్కువగా తినకుండా చిన్న చిన్న మోతాదుల్లో భోజనం చేయాలట. ప్రోటీన్, ఫైబర్ ఎక్కువగా ఉండే ఆహారాన్ని తీసుకోండి. భోజనం చేసిన వెంటనే పడుకోకుండా 10 నుంచి 15 నిమిషాలు నెమ్మదిగా నడవండి. రోజూ 7 నుంచి 9 గంటలు నాణ్యమైన నిద్ర ఉండేలా చూసుకోవాలని సూచిస్తున్నారు.

భోజనం తర్వాత తరచూ అధిక అలసట వస్తే రక్తంలో చక్కెర, హిమోగ్లోబిన్ వంటి పరీక్షల గురించి వైద్యులను సంప్రదిస్తే మంచిదట. అప్పుడప్పుడు భోజనం తర్వాత నిద్రమత్తు రావడం సాధారణమే. అయితే ఇది ప్రతిరోజూ తీవ్రంగా ఉంటే వైద్య సహాయం తీసుకోవాలట.