Nitish Kumar: నితీశ్ అనే నేను 8 సార్లు సీఎం అయ్యాను - రాజకీయాల్లో అరుదైన రికార్డ్ ఇది
Nitish Kumar: 20 ఏళ్లలో నితీశ్ కుమార్ 8 సార్లు బిహార్ ముఖ్యమంత్రిగా ప్రమాణ స్వీకారం చేశారు.
Nitish Kumar Swearing Record: బిహార్ ముఖ్యమంత్రి నితీశ్ కుమార్ సీఎంగా (Nitish Kumar) ప్రమాణ స్వీకారం చేయనున్నారు..! ఇది చదవడానికి, వినడానికి వింతగానే అనిపిస్తుంది. కానీ...మరి కొద్ది గంటల్లో ఇదే జరగనుంది. తేదీ మారుతుందని కానీ ఆ పదవి మారదు. ఇలా ఒక్కసారి కాదు. గత 20 ఏళ్లలో ఇప్పటికే 8 సార్లు బిహార్ ముఖ్యమంత్రిగా ప్రమాణ స్వీకారం చేశారు నితీశ్ కుమార్. దేశ రాజకీయాల్లో ఇదో రికార్డు. 2022లో NDAతో తెగదెంపులు చేసుకున్నారు నితీశ్. ఉన్నట్టుండి బయటకు వచ్చేశారు. ఆ సమయంలో కాంగ్రెస్, RJD మద్దతుతో ప్రభుత్వం ఏర్పాటు చేశారు. ముఖ్యమంత్రిగా 8వ సారి ప్రమాణ స్వీకారం చేశారు. ఇప్పుడే కాదు. 2005 నుంచి ఈ సీఎం రేసులో ఉన్నారు నితీశ్ కుమార్. 2014-15 లో మాత్రం జితన్ రామ్ మాంజి నితీశ్‌కి గట్టి పోటీ ఇచ్చి ఆ పదవిని సొంతం చేసుకున్నారు. నిజానికి 2000 సంవత్సరంలోనే తొలిసారి ముఖ్యమంత్రిగా ప్రమాణ స్వీకారం చేశారు నితీశ్ కుమార్. కానీ ఆయన ప్రభుత్వం వారం రోజులు కూడా నిలబడలేదు. బలపరీక్షలో ఓడిపోవడం వల్ల ప్రభుత్వం కూలిపోయింది. ఫలితంగా మళ్లీ జాతీయ రాజకీయాల్లోకి వెళ్లారు. అప్పటి అటల్ బిహారీ వాజ్‌పేయీ ప్రభుత్వంలో కేంద్రమంత్రిగా పని చేశారు. ఆ తరవాత ఐదేళ్లకు అంటే 2005లో జేడీయూ, బీజేపీ పొత్తు పెట్టుకోడం వల్ల మెజార్టీ సీట్లు సాధించారు. JDU 88 సీట్లు సాధించింది. బీజేపీ 55 చోట్ల గెలిచింది. రెండు పార్టీలు కలిసి ప్రభుత్వాన్ని ఏర్పాటు చేశాయి. అప్పుడే ముఖ్యమంత్రిగా రెండోసారి బాధ్యతలు తీసుకున్నారు నితీశ్. ఈ సారి ఐదేళ్ల పాటు ఆ పదవిలో కొనసాగారు. ఆ తరవాత 2010లో జరిగిన ఎన్నికల్లోనూ విజయం సాధించి సీఎం పదవిని చేపట్టారు. కాకపోతే 2014లో ఆయన ఆ పదవి నుంచి తప్పుకున్నారు. లోక్‌సభ ఎన్నికల్లో జేడీయూ పెద్దగా ప్రభావం చూపించలేకపోయింది. దీనికి నైతిక బాధ్యత వహిస్తూ సీఎం పదవి నుంచి దిగిపోయారు.
అటు ఇటు ఊగుతూ..
2015లో జరిగిన అసెంబ్లీ ఎన్నికల్లో JDU,RJD, కాంగ్రెస్ కలిసి ప్రభుత్వాన్ని ఏర్పాటు చేశాయి. అప్పుడు కూడా ముఖ్యమంత్రి పదవి నితీశ్ కుమార్‌నే వరించింది. అయితే..ఈ మహాఘట్‌బంధన్‌లో కొన్ని విభేదాలు తలెత్తాయి. సైద్ధాంతికంగా ఒక పార్టీ మరో పార్టీతో విభేదించింది. ఫలితంగా...2017 జులైలో మహాఘట్‌బంధన్‌ నుంచి తప్పుకున్నారు. వెంటనే బీజేపీ మద్దతుతో మరోసారి అధికారంలోకి వచ్చారు. అప్పుడూ ఆయనే ముఖ్యమంత్రిగా ప్రమాణ స్వీకారం చేశారు. ఆ తరవాత అంతా బాగానే ఉందనుకుంటున్న సమయంలో ఉన్నట్టుండి 2022లో బీజేపీకి గుడ్‌బై చెప్పారు. NDA నుంచి బయటకు వచ్చేశారు. బీజేపీతో సరిపడడం లేదంటూ తేల్చి చెప్పారు. RJD,కాంగ్రెస్ మద్దతు తీసుకుని ప్రభుత్వాన్ని ఏర్పాటు చేసి 8వ సారి ముఖ్యమంత్రిగా ప్రమాణ స్వీకారం చేశారు. ఇప్పుడు ఆ కూటమికీ గుడ్‌బై చెబుతున్నారన్న సంకేతాలు వచ్చేశాయి. మళ్లీ బీజేపీతో కలిసి నడిచేందుకే నితీశ్ ఆసక్తి చూపిస్తున్నారట. అంతా సవ్యంగా జరిగితే జనవరి 28వ తేదీనే ఆయన 9వ సారి ముఖ్యమంత్రిగా ప్రమాణ స్వీకారం చేసే అవకాశాలున్నాయి. ఇలా ఆయన రికార్డుని ఆయనే బద్దలు కొడుతున్నారు.
Also Read: నితీశ్ యూటర్న్‌పై అలెర్ట్ అయిన కాంగ్రెస్, RJDతో భేటీకి పిలుపు
టాప్ హెడ్ లైన్స్
ట్రెండింగ్ వార్తలు
