Param Bir Singh News: 'ముందు ఎక్కడున్నారో చెప్పండి ఫస్ట్.. రక్షణ మాట అప్పుడు చూద్దాం'

మనీలాండరింగ్ కేసులో ముంబయి మాజీ పోలీసు కమిషనర్‌ పరమ్ బీర్ సింగ్‌కు రక్షణ కల్పించేందుకు సుప్రీం కోర్టు నిరాకరించింది.

ముంబయి మాజీ పోలీసు కమిషనర్ పరమ్ బీర్ సింగ్‌కు అరెస్ట్ నుంచి రక్షణ కల్పించాలని దాఖలైన పిటిషన్‌పై సుప్రీం కోర్టు తీవ్ర వ్యాఖ్యలు చేసింది. ముందుగా పరమ్ బీర్ సింగ్ ఎక్కడున్నారో తెలియజేయాలని అప్పటి వరకు కోర్టు ఈ పిటిషన్‌ స్వీకరించదని సుప్రీం తేల్చి చెప్పింది.

ముందుగా మీరు ఎక్కడున్నారో మాకు తెలియాలి. భారత్‌లోనే ఉన్నారా? లేక విదేశాల్లోనా? ఆ సమాచారం చెప్పకపోతే ఈ పిటిషన్‌ను విచారించలేము. ఒక వేళ మీరు విదేశాల్లో ఉంటే ముందు భారత్‌కు రండి. అప్పుడు న్యాయస్థానం మీకు సహకరిస్తుంది.                                              -    సుప్రీం ధర్మాసనం

తదుపరి విచారణను నవంబర్ 22కు వాయిదా వేసింది సుప్రీం కోర్టు. పరం​బీర్​ సింగ్​ తనకు అరెస్టు నుంచి రక్షణ కల్పించాలని కోరుతూ పవర్ ఆఫ్ అటార్నీ ద్వారా ఈ వ్యాజ్యం దాఖలు చేశారు.

నాన్‌బెయిలబుల్ వారెంట్లు..

మహారాష్ట్ర మాజీ హోంమంత్రి అనిల్ దేశ్‌ముఖ్‌కు సంబంధించిన బలవంతపు వసూళ్ల కేసులో ముంబయి మాజీ పోలీస్​ కమిషనర్ పరంబీర్​ సింగ్​ సహా మరికొంత మంది పోలీసులను పరారీలోని నేరస్థులుగా మెజిస్ట్రేట్​ కోర్టు బుధవారం ప్రకటించింది. చివరిసారిగా సింగ్ మే నెలలో తన కార్యాలయంలో విధులు నిర్వహించారు. తర్వాత అజ్ఞాతంలోకి వెళ్లిపోయారు.

రూ.15 కోట్ల కోసం పరంబీర్​ సింగ్, మరో ఐదుగురు పోలీసు అధికారులు తనను వేధించారని జులైలో మెరైన్​ డ్రైవ్​ పోలీస్​ స్టేషన్​లో ఓ రియల్​ ఎస్టేట్​ వ్యాపారి ఫిర్యాదు చేశారు. విచారణ చేపట్టిన ముంబయి పోలీసులు పరంబీర్​పై నాన్​బెయిలబుల్ వారెంట్లు జారీ చేశారు. అయినా ఆచూకీ దొరకలేదు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి