CDS Bipin Rawat Cremation: బిపిన్ రావత్ పార్థివదేహానికి ప్రముఖుల నివాళులు.. నేడు అంత్యక్రియలు

సీడీఎస్ బిపిన్ రావత్ సహా హెలికాప్టర్ ప్రమాదంలో మృతి చెందిన వారి భౌతిక కాయాలు దిల్లీకి తరలించారు. బిపిన్ రావత్ అంత్యక్రియలు దిల్లీలో శుక్రవారం జరగనున్నాయి.

హెలికాప్టర్ ప్రమాదంలో మరణించిన సీడీఎస్ బిపిన్ రావత్ అంత్యక్రియలు దిల్లీలో శుక్రవారం జరగనున్నాయి. ఉదయం 11 గంటల నుంచి మధ్యాహ్నం 2వరకు బిపిన్‌ రావత్‌ నివాసం వద్ద ప్రజల సందర్శనార్థం భౌతికకాయాన్ని ఉంచనున్నారు.

అక్కడే అంత్యక్రియలు..

ఆ తర్వాత కామరాజ్‌ మార్గ్‌ నుంచి బ్రార్‌ స్క్వేర్‌ శ్మశానవాటిక వరకు అంతిమయాత్ర సాగనుంది. దిల్లీ కంటోన్మెంట్‌లో బిపిన్‌ రావత్‌ భౌతికకాయానికి సైనిక లాంఛనాలతో అంతిమ సంస్కారాలు నిర్వహించనున్నారు. 

నివాళులు..

బిపిన్‌ రావత్‌ సహా ఘటనలో మృతి చెందిన 13 మందికి దేశమంతా నివాళులు అర్పిస్తోంది. సోషల్ మీడియాలో బిపిన్ రావత్‌ను కీర్తిస్తూ పోస్ట్‌లు పెడుతున్నారు భారతీయులు. గురువారం ఉదయం వారి భౌతికకాయాలతో కూడిన శవపేటికలను జాతీయ జెండా కప్పి పూలతో అలంకరించిన సైనిక వాహనంలో వెల్లింగ్టన్‌లోని సైనిక ఆస్పత్రి నుంచి మద్రాస్‌ రెజిమెంటల్ కేంద్రానికి తరలించారు.

తమిళనాడు సీఎం ఎంకే స్టాలిన్‌, మంత్రులు సీనియర్‌ ప్రభుత్వ, పోలీసు అధికారులు, సైనికాధికారులు బిపిన్‌ రావత్‌ సహా 13 మందికి పుష్పాలతో నివాళులర్పించారు. అనంతరం రావత్‌ దంపతుల భౌతికకాయాలను మద్రాస్‌ రెజిమెంటల్‌ కేంద్రం నుంచి సూలూరు బేస్‌ క్యాంపునకు తరలించారు. అక్కడి నుంచి వాయుమార్గం ద్వారా  దిల్లీకి తీసుకువచ్చారు. 

మోదీ నివాళి..

ఈరోజు రాత్రి 8 గంటలకు వీరి భౌతికకాయాలు దిల్లీ చేరుకున్నాయి. 9 గంటలకు ప్రధాని నరేంద్ర మోదీ నివాళులర్పించారు. ప్రధానితో పాటు రక్షణ మంత్రి రాజ్‌నాథ్ సింగ్, జాతీయ సలహాదారు అజిత్ డోభాల్, త్రివిధ దళాధిపతులు కూడా బిపిన్ రావత్‌కు నివాళులర్పించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి