Beetroot Brownie : పిల్లలు ఇష్టంగా తినే బీట్​రూట్​ బ్రౌనీలు.. రెసిపీ ఇదే

Tasty Breakfast Ides : మీ పిల్లలు బీట్​రూట్ తినట్లేదా? ఆరోగ్యానికి మంచిదని మీరు ఎలా అయినా వారికి బీట్​రూట్ పెట్టాలనుకుంటే మీరు బీట్​రూట్​ బ్రౌనీలు చేసి పెట్టొచ్చు.

బీట్​రూట్​ బ్రౌనీ రెసిపీ (Image Source : Pinterest)

Beetroot Brownie Recipe : పిల్లలు కేక్​లు, బ్రౌనీలు ఇష్టంగా తింటారు. అదే బీట్​రూట్​, క్యారెట్​లు అంటే మొహం చాటేస్తారు. అలాంటప్పుడు తల్లిదండ్రులు కూడా స్మార్ట్​గా మారాలి. వారు ఎలాంటి ఫుడ్స్​ని ఇష్టపడుతున్నారో తెలుసుకుని.. ఆ ఫుడ్స్​లో మీరు హెల్తీ ఫుడ్​ ఉండేలా చూసుకోవాలి. ఉదాహారణకు మీ పిల్లలు బ్రౌనీలు ఇష్టంగా తింటే.. మీరు వారికి బీట్​రూట్ బ్రౌనీలు చేయొచ్చు. ఇది వారి ఇష్టాలను హెల్తీగా చేస్తుంది. మరి ఈ బీట్​రూట్​ బ్రౌనీలు ఎలా తయారు చేయాలి? కావాల్సిన పదార్థాలు ఏమిటో ఇప్పుడు తెలుసుకుందాం.

కావాల్సిన పదార్థాలు

బీట్​రూట్ - 2 పెద్దవి

వెజిటేబుల్ ఆయిల్ - అవసరానికి తగినంత

గోధుమ పిండి - 2 కప్పులు

కోకా పౌడర్ - 1 కప్పు

బేకింగ్ పౌడర్ - 1 టీస్పూన్

బేకింగ్ సోడా - అర టీస్పూన్

ఉప్పు - తగినంత

పంచదార - రుచికి తగినంత

వెనిలా ఎసెన్స్ - 1 టీస్పూన్

చాక్లెట్ చిప్స్ - 1 కప్పు

డ్రై ఫ్రూట్స్ - గార్నిష్ కోసం 

తయారీ విధానం

ముందుగా బీట్​రూట్ పైన తొక్కను పీల్ చేసి.. బాగా కడిగి తురుముకోవాలి. ఇప్పుడు స్టౌవ్ వెలిగించి.. ఓ గిన్నె పెట్టి దానిలో బీట్ రూట్ వేసి అవి మెత్తగా అయ్యేవరకు ఉడికించుకోవాలి. ఉడికిన తర్వాత చల్లార్చాలి. అనంతరం వాటిని బ్లెండర్​లో వేసి ప్యూరీ చేసుకోవాలి. కావాలంటే మీరు దానిని వడకట్టి మెత్తటి ప్యూరీని మాత్రమే ఉపయోగించుకుంటే బ్రౌనీలు బాగా వస్తాయి.

ఇప్పుడు ఓవెన్​ను 175 డిగ్రీలు ప్రీ హీట్ చేసుకోవాలి. బ్రౌనీ పాన్ తీసుకుని దానిలో పార్చ్​మెంట్​ పేపర్ సెట్ చేయండి. ఇది లేకుంటే మీరు నూనె లేదా వెన్నను పాన్​కు అప్లై చేయవచ్చు. ఇప్పుడు ఒక గిన్నె తీసుకుని దానిలో గోధుమ పిండి, కోకాపౌడర్, బేకింగ్ సోడా, బేకింగ్ పౌడర్, సాల్ట్ వేసి బాగా కలపాలి. ఇప్పుడు మరో గిన్నె తీసుకుని దానిలో బీట్​రూట్​ ప్యూరీ, పంచదార, వెనిలా ఎసెన్స్​ వేసి బాగా మిక్స్ చేయాలి. అన్నీ బాగా మిక్స్ చేయాలి. ఒకదానికొకటి కలిసేలా మిక్స్ చేసుకుంటే బ్రౌనీలు బాగా వస్తాయి.

రెండు గిన్నెలు దగ్గర పెట్టుకుని పిండిలో బీట్​రూట్ మిశ్రమం వేస్తూ కలుపుతూ ఉండాలి. ఉండలు లేకుండా ఉండేలా దీనిని మిక్స్ చేసుకోవాలి. దీనిలో ఇప్పుడు చాక్లెట్ చిప్స్ కూడా వేసి బాగా కలపండి. దీనిని బటర్ పూసి బీటరూట్​ పాన్​లో వేయండి. చిన్నచిన్న కప్పులలో మీరు దానికి కాస్త నిండుగా కాకుండా కొంచెం వెలితిగా ఉండేలా మిశ్రమాన్ని వేయాలి. ఈ బ్రౌనీ పాన్​ని ప్రీహీట్​ చేసిన ఓవెన్​లో జాగ్రత్తగా ప్లేస్ చేయాలి. 30 నుంచి 35 నిమిషాలు దానిని అలా వదిలేయాలి. 

బ్రౌనీలు ఉడికాయో లేదో తెలుసుకునేందుకు దానిలో టూత్ పిక్ పెట్టాలి. దానికి పిండి అంటుకోకుండా వస్తే బ్రౌనీలు సిద్ధమైనట్లు. ఒకవేళ బ్రౌనీ అంటుకుంటే మరికొంచెం సేపు దానిని బేక్ చేయాలని అర్థం. బ్రౌనీలు ఉడికిన తర్వాత పాన్​ను బయటకు తీసి చల్లారనివ్వండి. అనంతరం ఓ ప్లేట్​లో బ్రౌనీలు తీసి.. వాటిని డ్రై ఫ్రూట్స్​తో గార్నిష్ చేయండి. అంతే టేస్టీ టేస్టీ బీట్​రూట్ బ్రౌనీలు రెడీ.