Shiva Rajkumar Ghost Movie : శివ రాజ్‌కుమార్ స్పీడు - ఇప్పుడు మరో భారీ సెట్టు 

కన్నడ స్టార్ శివ రాజ్ కుమార్ నటిస్తున్న పాన్ ఇండియా సినిమా 'ఘోస్ట్'. స్పీడుగా షూటింగ్ చేస్తున్నారు. ఖర్చుకు వెనుకాడకుండా భారీ సెట్స్ వేస్తున్నారు. 

'ఘోస్ట్' సినిమాలో శివ రాజ్ కుమార్

ఇండియన్ బాక్సాఫీస్ బరిలో వందల కోట్లు వసూలు చేసే సత్తా కన్నడ సినిమాకు ఉందని, దేశవ్యాప్తంగా అన్ని భాషల ప్రేక్షకులను ఆకట్టుకునే సినిమాలు అందించగల సత్తా కన్నడ చిత్రసీమకు ఉందని 'కెజియఫ్', 'కెజియఫ్ 2', 'విక్రాంత్ రోణ', 'కాంతార' చిత్రాలు నిరూపించాయి. మిగతా కన్నడ హీరోలు కూడా పాన్ ఇండియా సినిమాలు తీయడం స్టార్ట్ చేశారు.

కరుణడ చక్రవర్తి డాక్టర్ శివ రాజ్ కుమార్ (Shiva Rajkumar) కథానాయకుడిగా రూపొందుతున్న పాన్ ఇండియా ఫిల్మ్ 'ఘోస్ట్' (Ghost Pan India Movie). ప్రస్తుతం ఈ సినిమా షూటింగ్ శరవేగంగా జరుగుతోంది. ఆరు కోట్ల రూపాయల వ్యయంతో రూపొందించిన జైల్ సెట్‌లో మొన్నటి వరకు షూటింగ్ చేశారు. వచ్చే నెలలో సెకండ్ షెడ్యూల్ స్టార్ట్ చేయడానికి సన్నాహాలు చేస్తున్నారు.

డిసెంబర్ రెండో వారం
నుంచి రెండో షెడ్యూల్!
Shiva Rajkumar's Ghost Movie Second Schedule Update : ఆరు కోట్ల రూపాయల భారీ వ్యయంతో వేసిన జైల్ సెట్‌లో 'ఘోస్ట్' ఫస్ట్ షెడ్యూల్ కంప్లీట్ చేశారు. హీరోతో పాటు మలయాళ నటుడు జయరామ్ పాల్గొనగా... సుమారు 28 రోజుల పాటు సాగిన ఆ షెడ్యూల్‌లో కీలక సన్నివేశాలు తెరకెక్కించారు. డిసెంబర్ రెండో వారంలో రెండో షెడ్యూల్ స్టార్ట్ చేయనున్నట్లు తెలిపారు. ఇందులో జైలు అవుట్ డోర్ సీన్స్ చేయనున్నట్లు చెప్పారు. 

యాక్షన్ థ్రిల్లర్‌గా రూపొందుతోన్న ఈ సినిమాలో హీరో రోల్ చాలా పవర్‌ఫుల్‌గా ఉంటుందని దర్శక - నిర్మాతలు తెలిపారు. ఫస్ట్ షెడ్యూల్ కంప్లీట్ అయిన సందర్భంగా వర్కింగ్ స్టిల్స్, వీడియో విడుదల చేశారు. గన్ పట్టుకున్న శివ రాజ్ కుమార్ స్టైల్ స్టైలిష్ & ఇంటెన్స్ లుక్‌లో అభిమానులను ఆకట్టుకుంటోంది.  

నట సింహం నందమూరి బాలకృష్ణ కథానాయకుడిగా నటించిన 'గౌతమి పుత్ర శాతకర్ణి' సినిమాలో శివ రాజ్ కుమార్ అతిథిగా కనిపించారు. శతకర్ణుడి కథను వివరించే పాత్రను ఆయన పోషించారు. రామ్ గోపాల్ వర్మ 'కిల్లింగ్ వీరప్పన్' సినిమా చేశారు. ఆయన సినిమాలు కొన్ని తెలుగులో డబ్బింగ్ అయ్యాయి. ఈ 'ఘోస్ట్' సినిమాతో ఆయన పాన్ ఇండియా మార్కెట్ మీద దృష్టి పెట్టారు. 'కెజియఫ్', 'కాంతార' విజయాలు, ఆ చిత్రాలకు ఇతర భాషల్లో వచ్చిన వసూళ్లు మిగతా కన్నడ హీరోలకు ఉత్సాహాన్ని ఇచ్చాయని చెప్పవచ్చు. యూనివర్సల్ అప్పీల్ ఉన్న కథలతో పాన్ ఇండియా సినిమాలకు శ్రీకారం చుడుతున్నారు.   

కన్నడ, తెలుగు, తమిళ, మలయాళ, హిందీ భాషల్లో 'ఘోస్ట్' సినిమాను భారీ  ఎత్తున విడుదల చేసే విధంగా సినిమాను తెరకెక్కిస్తున్నారు. దీనికి కన్నడ హిట్ సినిమా 'బీర్బల్' ఫేమ్ శ్రీని దర్శకత్వం వహిస్తున్నారు. సందేశ్ ప్రొడక్షన్స్ పతాకంపై ప్రముఖ రాజకీయ నాయకులు సందేశ్ నాగరాజ్ నిర్మిస్తున్నారు. ఈ చిత్రానికి మస్తీ, ప్రసన్న విఎం మాటలు రాస్తున్నారు. 'కెజియఫ్' ఫేమ్ శివ కుమార్ (KGF Movie Art Director) కళా దర్శకుడిగా పని చేస్తున్నారు. అర్జున్ జన్య సంగీతం అందిస్తున్నారు. మహేంద్ర సింహ ఛాయాగ్రహణ బాధ్యతలు నిర్వర్తిస్తున్నారు.