Naveen Medaram: ‘డెవిల్‘ వివాదం - ఆ మూవీ కోసం మూడేళ్లు కష్టపడ్డా, ఎప్పటికీ నేనే దర్శకుడిని: నవీన్ మేడారం

Naveen Medaram: ‘డెవిల్’ మూవీ వివాదంపై దర్శకుడు నవీన్ మేడారం స్పందించారు. ఈ సినిమా కోసం మూడేళ్లు కష్డపడినట్లు చెప్పారు. ఎవరు ఏం చెప్పినా, ఈ సినిమా దర్శకుడిని తానేనని వెల్లడించారు.

హీరో కల్యాణ్ రామ్ తో నవీన్ మేడారం (Photo Credit: Naveen Medaram/Instagram)

Naveen Medaram On Devil Movie: నందమూరి కల్యాణ్ రామ్ తాజా చిత్రం ‘డెవిల్’.అభిషేక్ ఆర్ట్స్ బ్యానర్ మీద ఈ సినిమా తెరకెక్కింది. ఈ చిత్ర ప్రకటన సమయంలో దర్శకుడిగా నవీన్ మేడారం కొనసాగుతారని నిర్మాత అభిషేక్ నామా వెల్లడించారు. ఆ తర్వాత ఏం జరిగిందో తెలియదు గానీ, అభిషేక్ నామా ఈ సినిమాకు దర్శకత్వం వహిస్తున్నారని ప్రకటించారు. దర్శక నిర్మాత అభిషేక్ నామా అని ప్రచారం చేశారు. దీంతో ఈ సినిమా నుంచి నవీన్ మేడారంను తొలగించారని అందరికీ అర్థం అయ్యింది. ఆ తర్వాత నవీన్ మేడారం కూడా సోషల్ మీడియా ద్వారా ఈ మూవీ నుంచి తనను తప్పించడం పట్ల ఆవేదన వ్యక్తం చేశారు.

‘డెవిల్’ నా బేబీ- నవీన్ మేడారం

త్వరలో ‘డెవిల్’ సినిమా విడుదల కాబోతున్న నేపథ్యంలో నవీన్ మేడారం సోషల్ మీడియా వేదికగా కీలక ప్రకటన చేశారు. ఈ సినిమా కోసం తను పడ్డ కష్టాన్ని వివరించారు. “డెవిల్' సినిమాకు ప్రాణం పోసేందుకు మూడేళ్లుగా ఎంతో కష్డపడ్డాను. కాన్సెప్ట్, స్క్రిప్ట్‌,  స్క్రీన్‌ ప్లే నేనే డెవలప్ చేశాను. కాస్ట్యూమ్స్ నుంచి ఫ్యాబ్రిక్స్ వరకు చాలా జాగ్రత్తలు తీసుకున్నాను. సెట్‌ నుంచి లొకేషన్ల వరకు నేనే దగ్గరుంచి పనులు పర్యవేక్షించాను.  సినిమాలోని ప్రతి అంశాన్ని అద్భుతంగా తీర్చిదిద్దాను. ‘డెవిల్‌’ని  స్వయగంగా రూపొందించాను. కారైకుడి, వైజాగ్‌, హైదరాబాద్‌ లోని లొకేషన్లలో (కొన్ని రోజుల ప్యాచ్‌ వర్క్‌ మినహా) 105 రోజుల పాటు సినిమాని షూట్ చేశాను. నాకు ఇది కేవలం ఒక ప్రాజెక్ట్ కాదు. నా బేబీ కూడా. ఎవరు ఏం చెప్పినా ఈ సినిమా దర్శకుడిని నేనే” అని చెప్పుకొచ్చారు.   

క్రెడిట్ ఇవ్వకపోవడం నిరాశ కలిగించింది- నవీన్

అటు తన గురించి తప్పుడు ప్రచారం చేస్తున్నా మౌనంగానే ఉన్నట్లు వెల్లడించారు నవీన్. “నేను సైలెంట్ గా నా పని నేను చేసుకుంటూ వెళ్తున్నాను. నా మౌనాన్ని కొందరు తప్పుగా అర్థం చేసుకుంటున్నారు. ఈ సినిమా నిర్మాణంలో నేను ఎలాంటి తప్పు చేయలేదని స్పష్టం చేస్తున్నాను. ఈ రోజు ఎదురైన వివాదానికి అసలు కారణం అహం, దురాశ మాత్రమే. ఈ సినిమా విషయంలో నేను ఏ రకమైన చట్టపరమైన చర్యలు తీసుకోలేదు. నా సొంత చిత్రంలో నాకు క్రెడిట్ ఇవ్వకపోవడం పల్ల చాలా నిరాశకు గురయ్యాను. అయినప్పటికీ నేను దిగులు చెందడం లేదు. నాకున్న అనుభవం, నైపుణ్యం, విశ్వాసాన్ని ముందుకు కొనసాగిస్తాను. పట్టుదలగా నా కెరీర్ ను ముందుకు తీసుకెళ్తాను. పట్టుదలతో మరింత బలంగా తిరిగి వచ్చేందుకు ప్రయత్నిస్తాను” అని  నవీన్ తెలిపారు.

‘డెవిల్’ బ్లాక్ బస్టర్ అవుతుంది- నవీన్

అటు “నటుడు కల్యాణ్‌ రామ్ ఈ సినిమా కోసం 100% కష్టపడ్డారు. ఈ సినిమా కోసం నాతోపాటు కష్టపడ్డ ప్రతి ఒక్కరికి హృదయపూర్వక ధన్యవాదాలు. 'డెవిల్' బ్లాక్ బస్టర్ అవుతుందని నాకు నమ్మకం ఉంది. డిసెంబర్ 29, 2023న ఈ చిత్రాన్ని థియేటర్లలో చూడవలసిందిగా అందరినీ కోరుతున్నాను. నేను ఒక కొత్త చిత్రానికి సంతకం చేశాను. ప్రస్తుతం స్క్రిప్ట్‌ వర్క్ చేస్తున్నాను. త్వరలో వివరాలను ప్రకటిస్తాను. ధన్యవాదాలు” అని నవీన్ మేడారం తెలిపారు. ఈ సినిమాలో సంయుక్త మీనన్ హీరోయిన్ గా నటిస్తోంది. మాళవిక నాయర్ కీలక పాత్ర పోషిస్తోంది. ఈ సినిమా డిసెంబర్ 29న ప్రేక్షకుల ముందుకు రాబోతోంది. 1942లో జరిగిన పీరియాడిక్ కథగా ఈ మూవీ రూపొందింది.

 

 

 

 

 

View this post on Instagram

 

 

 

 

 

 

 

 

 

 

 

A post shared by Naveen Medaram (@naveen_medaram)