Rajinikanth: విజయ్ సినిమాపై రజినీకాంత్ ఓపెన్ కామెంట్స్ - మళ్లీ ఫ్యాన్ వార్ షురూ!

కోలీవుడ్‌లో జరిగే ఫ్యాన్ వార్‌కు మరోసారి జీవం పోసినట్టుగా అయ్యింది. విజయ్ సినిమా గురించి రజినీ ఓపెన్‌ కామెంట్స్ చేయడమే దీనికి కారణంగా మారింది.

Rajinikanth and Vijay

సినీ పరిశ్రమలో ఫ్యాన్ వార్స్ అనేవి చాలా సహజంగా మారిపోయాయి. పైగా ఒక్కొక్కసారి ఇవి శృతిమించిపోతున్నాయి కూడా. హీరోలు ఎవరి పని వారు చేసుకుంటూ, కలిసి మెలిసి ఉంటున్నా కూడా ఫ్యాన్స్ మాత్రం ఇతర హీరోలు మాట్లాడే మాటల్లో, చేసే పనుల్లో కావాలని తప్పులు వెతుకుతూ వారిని ట్రోల్ చేస్తూ ఉంటారు. ముఖ్యంగా తమిళ సినీ పరిశ్రమలో జరిగే ట్రోల్స్ విపరీతంగా ఉంటాయి. తాజాగా రజినీకాంత్ చేసిన వ్యాఖ్యలు.. విజయ్ ఫ్యాన్స్‌కు ఆగ్రహాన్ని తెప్పించాయి. ఇది కోలీవుడ్‌లో జరిగే ఫ్యాన్ వార్‌కు మరోసారి జీవం పోసినట్టుగా అయ్యింది. విజయ్ సినిమా గురించి రజినీ ఓపెన్‌ కామెంట్స్ చేయడమే దీనికి కారణం.

జైలర్ సినిమాను డైరెక్ట్ చేసిన నెల్సన్ దిలీప్‌కుమార్ ఇంతకు ముందు స్టార్ హీరో విజయ్‌తో కలిసి ‘‘బీస్ట్’’ చిత్రాన్ని తెరకెక్కించారు. ‘బీస్ట్’ సినిమా కమర్షియల్‌గా సక్సెస్ అయ్యిందా లేదా అన్న విషయాన్ని పక్కన పెడితే.. ప్రేక్షకుల దగ్గర నుండి మాత్రం చాలా నెగిటివ్ రివ్యూలను అందుకుంది. విజయ్ ఫ్యాన్స్ సైతం సినిమాకు నెగిటివ్ రివ్యూలను అందించారు. అంతే కాకుండా విజయ్ తండ్రి కూడా ‘బీస్ట్’ రిజల్ట్‌పై అప్పట్లో స్పందించడం సంచలనంగా మారింది. నెల్సన్ దిలీప్‌కుమార్ అసలు ‘బీస్ట్’ స్క్రీన్‌ప్లేను సరిగా ప్లాన్ చేసుకోలేదని, తెరకెక్కించిన విధానంలో చాలా లోపాలు ఉన్నాయని ఓపెన్‌గా కామెంట్ చేశారు విజయ్ తండ్రి. తాజాగా రజినీ కూడా ‘బీస్ట్’ రిజల్ట్‌పై ఓపెన్‌గా కామెంట్స్ చేయడం విజయ్ ఫ్యాన్స్‌ను ఆగ్రహానికి గురిచేసింది.

‘బీస్ట్’ రిజల్ట్‌పై రజినీ స్పందన

‘బీస్ట్’ విడుదలయిన కొన్నిరోజులకే రజినీతో జైలర్ చిత్రాన్ని అనౌన్స్ చేశాడు నెల్సన్ దిలీప్‌కుమార్. దీంతో ఫ్లాప్ దర్శకుడితో సినిమా ఏంటి అని రజినీ ఫ్యాన్స్ కలవరపడ్డారు. తాజాగా జైలర్ మూవీ టీమ్ ఏర్పాటు చేసిన ఆడియో లాంచ్ ఈవెంట్‌లో నెల్సన్‌తో సినిమా అనగానే డిస్ట్రిబ్యూటర్స్ ఎలా స్పందించారు అనే విషయాన్ని రజినీ బయటపెట్టారు. నెల్సన్‌తో సినిమా అనగానే డిస్ట్రిబ్యూటర్లు తనకు ఫోన్ చేసి ‘బీస్ట్’‌కు రివ్యూలు బాలేవని అన్నారని, అందుకే తనతో సినిమా క్యాన్సల్ చేయమని చెప్పినట్టు బయటపెట్టారు. ఈ విషయం నిజమా, కాదా తెలుసుకోవడం కోసం ‘బీస్ట్’ నిర్మాతలకు తాను ఫోన్ చేసినట్టుగా తెలిపాడు. అప్పుడు నిర్మాతలు కూడా ‘బీస్ట్’‌కు నెగిటివ్ రివ్యూలు వచ్చాయని కాకపోతే పెట్టిన పెట్టుబడి మాత్రం తిరిగి వచ్చినట్టుగా తెలిపారన్నారు. 

రజినీకాంత్ ఇలా ఓపెన్‌గా విజయ్ లాంటి స్టార్ హీరో సినిమాపై కామెంట్స్ చేయడం ఏమీ బాలేదని విజయ్ ఫ్యాన్స్ ఆగ్రహం వ్యక్తం చేస్తున్నారు. ఇక రజినీ చివరి చిత్రం ‘అన్నాత్తే’ రిజల్ట్ గురించి వారు తెరపైకి తీసుకువస్తున్నారు. ‘బీస్ట్’ కంటే అన్నాత్తే రెవెన్యూ పరంగా ఘోరమైన పరాజయాన్ని అందుకుందని, మరి దాని గురించి ఎవరు మాట్లాడతారంటూ విజయ్ ఫ్యాన్స్ సోషల్ మీడియా వేదికగా ఫైర్ అవుతున్నారు. దీంతో కోలీవుడ్‌లో ఫ్యాన్ వార్ మరోసారి తెరపైకి వచ్చింది. 

ప్రేక్షకుల ముందుకు ‘జైలర్’

రజినీకాంత్ సినీ పరిశ్రమలో అడుగుపెట్టి ఎన్నో సంవత్సరాలు అవుతున్నా ఇప్పటికీ తిరుగులేని హీరోగా ముందుకు వెళ్తున్నారు. ఆఫర్ల విషయంలో రజినీ దూకుడు ఏ మాత్రం తగ్గలేదు. తాను చేసిన సినిమా రిజల్ట్ గురించి పెద్దగా పట్టించుకోకుండా వెంటవెంటనే సినిమాలు చేస్తూ ముందుకు వెళ్తున్నారు ఈ సీనియర్ హీరో. అయితే ప్రస్తుతం రజినీ.. నెల్సన్ దిలీప్‌కుమార్‌తో కలిసి ‘జైలర్’ అనే చిత్రాన్ని చేశారు. ఇందులో రజినీకాంత్‌తో హీరోయిన్‌గా జతకట్టింది మిల్కీ బ్యూటీ తమన్నా. ఆగస్ట్ 10న ఈ చిత్రం ప్రపంచవ్యాప్తంగా భారీ విడుదలకు సిద్ధమవుతోంది. సినిమా విడుదల తేదీ దగ్గర పడుతున్న సమయంలో మూవీ టీమ్ ప్రమోషన్స్ విషయంలో దూకుడుగా వ్యవహరిస్తోంది. ఇప్పటికే జైలర్ నుండి విడుదలయిన ‘కావాలి’ పాట బ్లాక్ బస్టర్ హిట్‌గా నిలిచింది.