'స్పై' నిర్మాతతో గొడవ - క్లారిటీ ఇచ్చిన నిఖిల్!

గత రెండు రోజులుగా 'స్పై' మూవీ నిర్మాత, హీరో నిఖిల్ మధ్య రిలీజ్ విషయంలో గొడవలు జరుగుతున్నట్టు వార్తలు వినిపిస్తున్న సంగతి తెలిసిందే. అయితే తాజాగా హీరో నిఖిల్ దీనిపై క్లారిటీ ఇచ్చాడు.

Photo Credit: Nikhil Siddhartha/Instagram

టాలీవుడ్ యంగ్ హీరో నిఖిల్ ప్రస్తుతం వరుస సినిమాలతో బిజీ బిజీగా గడుపుతున్న విషయం తెలిసిందే. 'కార్తికేయ2', '18 పేజేస్' వంటి బ్యాక్ టు బ్యాక్ హిట్స్ తో ఫుల్ ఫామ్ లో ఉన్న ఈ యంగ్ హీరో ఇప్పుడు పాన్ ఇండియా లెవెల్ లో భారీ బడ్జెట్ సినిమాల్లో నటిస్తున్నాడు. ప్రస్తుతం నిఖిల్ 'స్పై' అనే సినిమాలో నటిస్తున్న విషయం తెలిసిందే. ఫ్రీడమ్ ఫైటర్ సుభాష్ చంద్రబోస్ మర్డర్ మిస్టరీ ఆధారంగా తెరకెక్కుతున్న ఈ సినిమాకి గ్యారి బిహెచ్ దర్శకత్వం వహిస్తున్నారు. అయితే గత రెండు రోజులుగా ఈ సినిమా నిర్మాతకి, నిఖిల్ కి మధ్య అసలు పడడం లేదని.. ఇద్దరి మధ్య చిన్నపాటి యుద్ధం నడుస్తుందని వార్తలు వస్తున్నాయి. స్పై రిలీజ్ డేట్, ప్రమోషన్స్ విషయంలోనే హీరో నిఖిల్, నిర్మాత రాజశేఖర్ రెడ్డి మధ్య అభిప్రాయబేధాలు నెలకొన్నట్లు తెలుస్తోంది.

నిఖిల్ ఈ సినిమా రిలీజ్ ని వాయిదా వేయాలని కోరగా నిర్మాత రాజశేఖర్ రెడ్డి మాత్రం ఎట్టి పరిస్థితుల్లోనూ సినిమాని ముందు ప్రకటించిన తేదీ జూన్ 29 విడుదల చేయడానికి డిసైడ్ అయ్యారట. దీంతో నిఖిల్ ఈ సినిమాకు డబ్బింగ్ చెప్పడానికి నిరాకరించినట్లు తెలుస్తోంది. అంతేకాదు ఈ సినిమా ప్రమోషన్స్ కి కూడా నిఖిల్ దూరంగా ఉండాలని నిర్ణయం తీసుకున్నట్లు ఇప్పటికే వార్తలు వినిపించాయి. దీంతో ఈ ఇష్యూ కాస్త ఇప్పుడు ఇండస్ట్రీలో చర్చనీయాంశంగా మారింది. అయితే గతంలో కూడా నిఖిల్ ఇలా చాలాసార్లు చేశాడని అతనిపై కొన్ని కథనాలు వచ్చాయి. సరిగ్గా సినిమా రిలీజ్ టైం లోనే నిర్మాతలకు నిఖిల్ ఇలాంటి తలనొప్పులు తెచ్చి పెడతాడని, నిర్మాతల గురించి కానీ సినిమా బిజినెస్ గురించి ఏమాత్రం ఆలోచించకుండా కేవలం తన ప్రయోజనాల కోసం ప్రాధాన్యత ఇస్తాడంటూ నిఖిల్ పై ఇదివరకు నుంచే ఇండస్ట్రీలో ఓ టాక్ ఉంది.

అయితే తాజాగా హీరో నిఖిల్ దీనిపై క్లారిటీ ఇచ్చాడు. స్పై మూవీ సీజీ వర్క్ ఇంకా పూర్తి కాలేదని, పోస్ట్ ప్రొడక్షన్ పనులు సైతం పెండింగ్లో ఉన్నాయని ఈ సందర్భంగా తెలిపారు. అంతేకాకుండా ఇలాంటి గందరగోళ పరిస్థితుల్లో సినిమాను విడుదల చేయడం కరెక్ట్ కాదని భావిస్తున్నాడు. స్పై మూవీ పాన్ ఇండియా వైడ్ గా రిలీజ్ కాబోతోంది. కాబట్టి అందుకు తగ్గ ప్రమోషన్స్ కూడా చేయాల్సి ఉంటుంది. పాన్ ఇండియా స్థాయిలో ప్రమోషన్ చేయాలంటే అందుకు పక్కా ప్రచార ప్రణాళికలు ఉండాలని నిర్మాతలను కోరారట. నిర్మాత ఇందుకు వ్యతిరేకించడంతో నిఖిల్ స్పై మూవీ రిలీజ్ డేట్ ని వాయిదా వేయాలని కోరినట్లు తెలుస్తోంది. దీంతో ఆలోచనలో పడ్డ నిర్మాతలు స్పై సినిమా వాయిదా వేయనున్నట్లు తెలుస్తోంది అంతేకాదు త్వరలోనే కొత్త విడుదల తేదీని ప్రకటించాలని మేకర్స్ భావిస్తున్నారట.

ఇక స్పై మూవీ విషయానికొస్తే.. ఇప్పటికే విడుదలైన టీజర్ మంచి స్పందనను దక్కించుకుంది. ఈడి ఎంటర్టైన్మెంట్స్ బ్యానర్ పై రాజశేఖర్ రెడ్డి, చరణ్ తేజ్ ఉప్పలపాటి ఈ సినిమాని సంయుక్తంగా నిర్మిస్తున్నారు. ఈ సినిమాలో నిఖిల్ సరసన ఐశ్వర్య మీనన్ హీరోయిన్గా నటిస్తోంది. ఆర్యన్ రాజేష్, జిస్సు సేన్ గుప్తా, మకరందేశ్ పాండే, సన్యా ఠాకూర్, అభినవ్ గోమాటం ఇతర కీలక పాత్రలు పోషిస్తున్నారు.