Jawan: షారుక్ ఖాన్ కోసం ‘కెప్టెన్ అమెరికా’ స్టంట్ మాస్టర్ - హాలీవుడ్ రేంజ్‌లో ‘జవాన్’ స్టంట్స్

బాలీవుడ్ స్టార్ హీరో షారుక్ ఖాన్ అట్లీ కుమార్ కాంబినేషన్లో తెరకెక్కుతున్న 'జవాన్' సినిమాలో ఓ భారీ యాక్షన్ సీక్వెన్స్ ని హాలీవుడ్ స్టంట్ కొరియోగ్రాఫర్ డిజైన్ చేసినట్లు తెలుస్తోంది.

Photo Credit: Red Chillies Entertainment/Twitter

బాలీవుడ్ స్టార్ షారుక్ ఖాన్ హీరోగా కోలీవుడ్ యంగ్ డైరెక్టర్ అట్లీ దర్శకత్వంలో తెరకెక్కుతున్న తాజా చిత్రం 'జవాన్'. ఇండియాస్ మోస్ట్ అవైటెడ్ ప్రాజెక్ట్స్ లో ఇది కూడా ఒకటి. 'పఠాన్' వంటి భారీ సక్సెస్ తర్వాత షారుక్ ఖాన్ నటించిన సినిమా కావడంతో అటు అభిమానుల్లోనూ, ప్రేక్షకుల్లోనూ ఈ సినిమాపై భారీ స్థాయిలో అంచనాలు ఉన్నాయి. రీసెంట్ గా 'జవాన్' రివ్యూ పేరుతో రిలీజ్ అయిన టీజర్ ఆ అంచనాలను తారస్థాయికి చేర్చింది. ఇటీవలే షూటింగ్ పూర్తి చేసుకున్న ఈ సినిమా ప్రస్తుతం పోస్ట్ ప్రొడక్షన్ కార్యక్రమాలతో బిజీగా ఉంది. ఇక మూవీ టీం సినిమాపై ఎప్పటికప్పుడు వరుస అప్డేట్స్ ఇస్తూ మరింత హైప్ క్రియేట్ చేస్తున్నారు. ఈ క్రమంలోనే తాజాగా సినిమా నుంచి అదిరిపోయే అప్డేట్ బయటకు వచ్చింది.

'జవాన్' సినిమాలో యాక్షన్ సీన్స్ ఏ రేంజ్ లో ఉండబోతున్నాయో ఇప్పటికే శాంపిల్ గా టీజర్ లో చూపించారు. అయితే తాజాగా ఈ సినిమాలో ఓ భారీ యాక్షన్స్ సీక్వెన్స్ ని హాలీవుడ్ బిగ్గెస్ట్ యాక్షన్ డైరెక్టర్ స్పిరో రజటోస్ డిజైన్ చేసినట్లు తెలుస్తోంది. 'ఫాస్ట్ అండ్ ఫ్యూరియస్', 'కెప్టెన్ అమెరికా', 'వెనమ్' లాంటి హాలీవుడ్ సినిమాలకు యాక్షన్ కొరియోగ్రాఫర్ గా పనిచేసిన స్పిరో రజటోస్ ఆధ్వర్యంలో షారుఖ్ ఖాన్ ఓ భారీ రిస్కీ ఫైట్ సీక్వెన్స్ ని చేశారట. ఈ రిస్కీ ఫైట్ సీక్వెన్స్ సినిమాలో ఓ విజువల్ ట్రీట్ లో ఉంటుందని తాజాగా చిత్ర యూనిట్ పేర్కొంది. ఇక ఈ అప్డేట్ తో షారుఖ్ ఫ్యాన్స్ ఖుషి అవుతున్నారు. 'జవాన్' కోసం ఏకంగా హాలీవుడ్ స్టంట్ మాస్టర్ ఫైట్స్ డిజైన్ చేశారనే విషయంతో సినిమాలో యాక్షన్ సీన్స్ నెక్స్ట్ లెవెల్ లో ఉంటాయని స్పష్టం అవుతుంది.

మరోవైపు సినిమాలో తలపతి విజయ్ సేతుపతి కూడా గెస్ట్ రోల్ చేశారని, షారుక్, విజయ్.. ఇద్దరు కలిసి చేసే ఓ ఫైట్ సీక్వెన్స్ కూడా నెక్స్ట్ లెవెల్ లో ఉంటుందని చెబుతున్నారు. మొత్తం మీద 'జవాన్' సినిమాలో దర్శకుడు అట్లీ కుమార్ ఎక్కువగా యాక్షన్ సీన్స్ పైనే దృష్టి పెట్టినట్లు తెలుస్తోంది. కాగా సుమారు రూ.200 కోట్లకు పైగా భారీ బడ్జెట్ తో షారుక్ ఖాన్ భార్య గౌరీ ఖాన్ రెడ్ చిల్లీస్ ఎంటర్టైన్మెంట్ బ్యానర్ పై ఈ సినిమాని నిర్మిస్తున్నారు. సినిమాలో షారుక్ ఖాన్ సరసన నయనతార హీరోయిన్‌గా నటిస్తోంది. ఈ సినిమాతోనే నయన్ బాలీవుడ్ కి ఎంట్రీ ఇస్తోంది.

అలాగే తమిళ విలక్షణ నటుడు విజయ్ సేతుపతి ఓ కీలక పాత్ర పోషిస్తుండగా.. బాలీవుడ్ బ్యూటీ దీపికా పదుకోన్ అతిధి పాత్రలో కనిపించనుంది. వీరితో పాటు ప్రియమణి, సానియా మల్హోత్ర, సంజిత బట్టచార్య, సునీల్ గ్రోవర్ తదితరులు ఇతర పాత్రలు పోషించారు. అనిరుద్ రవిచంద్రన్ ఈ చిత్రానికి సంగీతం అందించారు. త్వరలోనే ప్రమోషన్ కార్యక్రమాలను మొదలుపెట్టనున్న ఈ సినిమా సెప్టెంబర్ 7న ప్రపంచవ్యాప్తంగా హిందీ, తమిళ తెలుగు భాషల్లో విడుదల కానుంది. మరి 'పఠాన్' లాంటి భారీ విజయం తర్వాత త్వరలోనే ప్రేక్షకుల ముందుకు రాబోతున్న ఈ 'జవాన్' షారుక్ ఖాన్ కి ఎలాంటి సక్సెస్‌ను అందిస్తుందో చూడాలి.

Join Us on Telegram: https://t.me/abpdesamofficial