Antony Ruben: ‘పుష్ప 2’ టీమ్‌కు బిగ్ షాక్? ఎడిటర్ రూబెన్.. మూవీ నుంచి తప్పుకున్నారా?

‘పుష్ప 2: ది రూల్’ మూవీ షూటింగ్ ఎండింగ్ కు చేరుకుంది. త్వరలో పోస్టు ప్రొడక్షన్ పనులు ప్రారంభం కానున్నాయి. ఈ నేపథ్యంలోనే చిత్రబృందానికి పెద్ద షాక్ తగిలినట్లు తెలుస్తోంది.

‘పుష్ప 2‘ నుంచి తప్పుకున్న ఎడిటర్ రూబెన్ (Photo Credit: X)

Editor Antony Ruben opts out of 'Pushpa 2’: అల్లు అర్జున్ హీరోగా సుకుమార్ తెరకెక్కిస్తున్న తాజాగా చిత్రం ‘పుష్ప: ది రూల్’. ఎప్పుడెప్పుడు చూడాలా అని దేశవ్యాప్తంగా ప్రేక్షకులు ఎదురు చూస్తున్నారు. ఇప్పటికే సినిమా రిలీజ్ డేట్ అనౌన్స్ చేశారు మేకర్స్. ఈ నేపథ్యంలోనే కీలక పరిణామం చోటు చేసుకుంది. ‘పుష్ప’ సినిమా సక్సెస్ లో కీలక పాత్ర పోషించిన ఎడిటర్ ఆంటోనీ రూబెన్ ఈ మూవీ నుంచి తప్పుకున్నట్లు తెలుస్తోంది.

‘పుష్ప 2’ ఎడిటింగ్ బాధ్యతల నుంచి తప్పుకున్న ఆంటోనీ రూబెన్

‘పుష్ప ది రూల్’ మూవీపై రోజు రోజుకు హైప్ పెరుగుతోంది. ‘పుష్ప’ సినిమా అద్భుత విజయాన్ని అందుకున్న నేపథ్యంలో ఈ సినిమా అంతకు మించి ఉండేలా చిత్రబృందం  జాగ్రత్తలు తీసుకుంటోంది. అదిరిపోయే ఔట్ పుట్ కోసం టాప్ టెక్నీషియన్లతో పని చేయిస్తున్నారు. ఈ నేపథ్యంలో ఈ సినిమాకు పని చేస్తున్న ఎడిటర్ ఆంటోనీ రూబెన్ వైదొలిగినట్టు సినిమా పరిశ్రమలో టాక్ వినిపిస్తోంది. వ్యక్తిగత కారణాలతో ఆయన ఈ సినిమా నుంచి తప్పుకున్నట్లు తెలుస్తోంది. రూబెన్ తీసుకున్న నిర్ణయంతో చిత్రబృందం షాక్ కు గురైనట్లు తెలుస్తోంది. రూబెన్ ‘బిగిల్’, ‘మెర్సల్’, ‘వివేగం’, ‘పుష్ప’, ‘జవాన్’ లాంటి బ్లాక్ బస్టర్ చిత్రాలకు ఎడిటర్ గా చేశారు. ఇండియన్ ఫిల్మ్ ఇండస్ట్రీలో నెంబర్ వన్ ఎడిటర్ గా కొనసాగుతున్న ఆయన ప్రస్తుతం అట్లీ, వరుణ్ ధావన్ కాంబోలో వస్తున్న’బేబీ జాన్’ సినిమాకు పని చేస్తున్నారు.

‘పుష్ప 2’ ఎడిటర్ గా నవీన్ నూలి?

ఈ నేపథ్యంలో చిత్రబృందం మరో ఎడిటర్‌‌ను వెతికే పనిలో పడినట్లు తెలుస్తోంది. ఈ సందర్భంగా ప్రముఖ ఎడిటర్ నవీన్ నూలిని సంప్రదించినట్లు తెలుస్తోంది. ‘జెర్సీ’ సినిమాకు గాను ఉత్తమ ఎడిటర్ గా ఆయన జాతీయ చలనచిత్ర అవార్డు అవార్డును అందుకున్నారు. ‘నాన్నకు ప్రేమతో’, ‘రంగస్థలం’ లాంటి సక్సెస్ ఫుల్ సినిమాలకు నవీన్ ఎడిటర్ గా వ్యవహరించారు. ‘పుష్ప 2’ సినిమాకు నవీన్ న్యాయం చేయగలరని దర్శకుడు సుకుమార్ భావిస్తున్నారట. అన్నీ అనుకున్నట్లు జరిగితేనే ‘పుష్ప2’ ఆగష్టు 15న విడుదలయ్యే అవకాశం ఉంది. లేదంటే మరింత ఆలస్యం అయ్యే అవకాశం ఉంది.

కొత్త ఎడిటర్ పై త్వరలో అధికారిక ప్రకటన

అల్లు అర్జున్ హీరోగా సుకుమార్ తెరకెక్కిస్తున్న ఈ సినిమాను  మైత్రీ మూవీ మేకర్స్ సంస్థ ప్రతిష్టాత్మకంగా నిర్మిస్తోంది. ఈ చిత్రంలో నేషనల్ క్రష్ రష్మిక మందన్న హీరోయిన్ గా నటిస్తోంది. మలయాళ స్టార్ హీరో ఫహద్ ఫాసిల్ విలన్‌ పాత్ర పోషిస్తున్నారు. సునీల్, అనసూయ కీలక పాత్రలు చేయనున్నారు. దేవీ శ్రీ ప్రసాద్ ఈ చిత్రానికి మ్యూజిక్ అందిస్తున్నారు. ఈ సినిమాకు కొత్త ఎడిటర్ ఎవరు అనే విషయంపై చిత్రబృందం త్వరలోనే వెల్లడించే అవకాశం ఉంది.