Alia Bhatt: బాలీవుడ్ స్పై యూనివర్స్‌లో ఆలియా భట్ - కన్ఫర్మ్ చేసిన ఆ నిర్మాణ సంస్థ సీఈఓ

Alia Bhatt: ‘హార్ట్ ఆఫ్ స్టోన్’లాంటి హాలీవుడ్ చిత్రంలో తన యాక్షన్‌ను చూపించిన ఆలియా భట్.. ఇప్పుడు బాలీవుడ్‌లోని స్పై యూనివర్స్‌లో చేరి అలాంటి క్యారెక్టర్‌తోనే ప్రేక్షకులను పలకరించడానికి సిద్ధమయ్యింది.

Image Credit: Alia Bhatt/Instagram

Alia Bhatt in YRF Spy Universe: బాలీవుడ్‌లో సినిమాటిక్ యూనివర్స్‌లు అనేవి చాలా అరుదుగా తెరకెక్కుతుంటాయి. ఇక వాటన్నింటిలో బాగా పాపులారిటీ సంపాదించుకుంది వైఆర్ఎఫ్ స్పై యూనివర్స్. ఇప్పటికే ఈ స్పై యూనివర్స్‌లో పలు చిత్రాలు వచ్చాయి. అవన్నీ బ్లాక్‌బస్టర్ హిట్లు అయ్యాయి. అయితే ఇందులో ఇప్పటివరకు వచ్చిన సినిమాలు అన్నీ స్టార్ హీరోలతోనే తెరకెక్కాయి. కానీ మొదటిసారి ఈ స్పై యూనివర్స్‌లోకి ఒక హీరోయిన్ అడుగుపెట్టనుంది. తను మరెవరో కాదు.. ఆలియా భట్. ఈ విషయాన్ని వైఆర్ఎఫ్ సీఈఓ స్వయంగా ప్రకటించారు. ఇది తెలిసిన ఆలియా భట్ ఫ్యాన్స్.. ఫుల్ ఖుషీలో ఉన్నారు.

అప్పుడే షూటింగ్ ప్రారంభం..

2024 చివరిలోపు ఆలియా భట్‌తో ఒక సినిమాను ప్రారంభిస్తున్నామని యశ్ రాజ్ ఫిల్మ్స్ సీఈఓ అక్షయ్ విధానీ ప్రకటించారు. అంతే కాకుండా ఇది వైఆర్ఎఫ్ స్పై యూనివర్స్‌కు చెందిన చిత్రమని కూడా బయటపెట్టారు. ముందుగా ఈ స్పై యూనివర్స్‌లో ‘టైగర్’ అనే చిత్రం తెరకెక్కింది. ఇందులో సల్మాన్ ఖాన్ హీరోగా నటించాడు. ఆ తర్వాత హృతిక్ రోషన్ హీరోగా ‘వార్’ తెరకెక్కింది. ఇక గతేడాది షారుఖ్ ఖాన్‌ నటించిన ‘పఠాన్’ ప్రేక్షకుల ముందుకు వచ్చింది. ఇవన్నీ స్పై యూనివర్స్‌లో భాగమే. ఇందులో ప్రతీ సినిమా ఒకదానికి మించి మరొకటి హిట్ అయ్యింది. ఇప్పుడు ఇలాంటి భారీ ప్రాజెక్ట్‌లో ఆలియా భట్ చేరడం తన ఫ్యాన్స్‌ను సంతోషపెడుతోంది.

అంతే చెప్పగలను..

తాజాగా యశ్ రాజ్ ఫిల్మ్స్ సీఈఓ అక్షయ్ విధానీ ఒక ఇంటర్వ్యూలో పాల్గొన్నారు. అందులో తన సంస్థ గురించి, అది తెరకెక్కించే సినిమాల గురించి పలు ఆసక్తికర విషయాలను బయటపెట్టారు. ‘‘ఇండస్ట్రీలో దాచిపెట్టిన ఘోరమైన సీక్రెట్‌ను నేను ఇప్పుడు షేర్ చేస్తున్నాను. ఆలియా భట్ స్పై యూనివర్స్‌లోని ఒక సినిమాలో లీడ్‌గా నటించనుంది. ఈ ఏడాది చివర్లో సినిమా షెడ్యూల్ ప్రారంభం కానుంది. మేము ఈ విషయంలో చాలా ఎగ్జైటెడ్‌గా ఉన్నాం. ఇది మాత్రమే కాదు.. స్పై యూనివర్స్‌లో మరెన్నో ఆసక్తికర అంశాలు చేరనున్నాయి. మరెన్నో చిత్రాలు ఈ యూనివర్స్‌లో తెరకెక్కనున్నాయి. ప్రస్తుతానికి ఆలియా భట్ కూడా ఈ స్పై యూనివర్స్‌లో భాగమవుతుంది అని మాత్రమే చెప్పగలను’’ అని తెలిపారు అక్షయ్ విధానీ.

ఆ సినిమా పూర్తయ్యాక..

ఇక వైఆర్ఎఫ్ స్పై యూనివర్స్ విషయానికొస్తే.. ఈ సంస్థ భవిష్యత్తులో తెరకెక్కించాలని అనుకుంటున్న అన్ని సినిమాలతో ఒక ప్లాన్‌ను ఏర్పాటు చేసుకుంది. ఇప్పటికే షారుఖ్ ఖాన్‌తో ‘పఠాన్ 2’ తెరకెక్కించడానికి సిద్ధంగా ఉంది. దాని తర్వాత ‘టైగర్ వర్సెస్ పఠాన్’ అని మరో చిత్రం ప్లానింగ్‌లో ఉన్నట్టు సమాచారం. ఇందులో షారుఖ్ ఖాన్, సల్మాన్ ఖాన్ ఒకరితో ఒకరు తలపడనున్నారు. వాటితో పాటు ఆలియా భట్ కూడా ఇందులో చేరడం ఫ్యాన్స్‌ను సంతోషపెడుతోంది. ప్రస్తుతం ఆలియా భట్ చేతిలో ‘జిగ్రా’ అనే చిత్రం ఉంది. ఈ సినిమాలో తను హీరోయిన్‌గా నటించడంతో పాటు నిర్మాతగా కూడా వ్యవహరిస్తోంది. ఈ సినిమా షూటింగ్ పూర్తయిన తర్వాత తను వైఆర్ఎఫ్ స్పై యూనివర్స్‌లో చేరే అవకాశం ఉంది.