Chanti Elimination: చలాకీ చంటి షాకింగ్ నిర్ణయం, సెల్ఫ్ ఎలిమినేషన్ చేసుకుని బిగ్‌‌బాస్ నుంచి బయటికి వచ్చేసిన కమెడియన్?

బిగ్‌బాస్ హౌస్‌లో ఎప్పుడు ఏం జరుగుతుందో చెప్పడం చాలా కష్టం. ఈ వీకెండ్ ఎలిమినేషన్ కూడా అలాగే జరిగిందని సమాచారం.

(Image credit: Instagram)

ప్రతి వారం ఒకరు బిగ్ బాస్ హౌస్ నుంచి ఎలిమినేట్ అవ్వాల్సిందే. ఈ వారం రానే వచ్చింది. ఎవరు ఎలిమినేట్ అవుతారా? అని చర్చించుకుంటున్నారు ప్రేక్షకులు. కానీ ఈలోపే ఒక వార్త సోషల్ మీడియాలో హల్ చల్ చేస్తోంది. చంటి తనకు తానుగా బయటికి వచ్చేశాడని, అంటే సెల్ఫ్ ఎలిమినేట్ చేసుకుని బిగ్ బాస్ హౌస్ నుంచి బయటికి వచ్చేశాడని టాక్ నడుస్తోంది. నాగార్జున పర్మిషన్ తోనే ఇలా చేశారని తెలుస్తోంది. ఆయన ఇంట్లో ఇమడలేక చాలా ఇబ్బంది పడుతున్న సంగతి తెలిసిందే. ముఖ్యంగా గీతూకు ఆయనకు అయిన గొడవ చినికి చినికి గాలివానగా మారాయి. మొదటి వారం నుంచి వారిద్దరికీ పడడం లేదు. గీతూ కక్ష కట్టి మరీ ఆయనపై చెడు ప్రచారాలు చేసింది. ఒక వారం గీతూ - చంటి గొడవే హైలైట్ అయింది. ఆ సమయంలో చంటి చాలా అప్ సెట్ అయినట్టు కనిపించాడు. గీతూ ప్రవర్తనతో ఆయన చాలా ఇబ్బంది పడినట్టు షో చూసే వారికి ఎవరికైనా అర్థం అవుతుంది. 

ఫ్లాఫ్ అని చెప్పుకుని మరీ...
నేటి ప్రోమోలో హౌస్లో ఎవరు హిట్? ఎవరు ఫ్లాప్? అనే గేమ్ ఆడించారు.ఇందులో అందరూ తమను సెల్ఫ్ ప్రొటెక్ట్ చేసుకునేందుకు ప్రయత్నించారు. తాము ఆడామని, తామే హిట్ అని చెప్పుకున్నారు. ఒక్క చంటి మాత్రం ‘నేను హిట్ అని చెప్పుకోవడం లేదు’ అని షాకిచ్చాడు. దానికి నాగార్జున ‘ప్రేక్షకులందరికీ చెబుతున్నావా నువ్వు ఫ్లాప్ అని’ అడిగారు. దానికి కూడా చంటి ‘అవును నేను ఫ్లాప్ అని ఒప్పుకుంటున్నాను’ అన్నాడు. ఆ మాటల్లో ఆయన ఎలిమినేట్ కావాలని నిర్ణయించుకున్నాకే ఇలా చెప్పాడని సోషల్ మీడియాలో చర్చలు నడుస్తున్నాయి. 

వాసంతి సేఫ్ 
నిజానికి చంటి తనకు తానుగా ఎలిమినేట్ కాకపోతే వాసంతి కచ్చితంగా బయటికి వెళ్లేదని తెలుస్తోంది. ఆమె డేంజర్ జోన్లో ఉందని, అందరి కన్నా చాలా తక్కువ ఓట్లు వచ్చాయని సమాచారం. కానీ చంటి తనకు తానుగా బయటికి వెళ్లడం వల్ల వాసంతి సేఫ్  అయిందని టాక్. ప్రతి వారం వాసంతి వెళ్లిపోతుందనే అనిపిస్తుంది ప్రేక్షకులకు. కానీ ఏదో విధంగా ఆమె సేఫ్ అవుతూ వస్తోంది. 

చంటి హర్ట్ అయ్యాడా?
బిగ్ బాస్ హౌస్‌లోకి వెళ్లిన మొదటి వారమే ఆయనకు గీతూ గొడవలు మొదలయ్యాయి. రెండు వారాల క్రితం చంటి గీతూని నామినేట్ చేసినప్పుడు గీతూ చాలా ఓవర్ గా ప్రవర్తించింది. కీర్తి దగ్గరికి వెళ్లి చంటి నిన్ను ఇలా అన్నాడు, అలా అన్నాడు అని నాలుగు మాటలు కలిపి చెప్పింది.  అలాగే రేవంత్ దగ్గరికి వెళ్లి చంటి నీ మీద జోకులు వేస్తున్నాడు అంటూ ఏవేవో చెప్పింది. ఆమె ప్రవర్తన బయట చూస్తున్న జనాలకే చికాకు కలిగింది. మరి చంటికి ఏమనిపించిందో అర్థం చేసుకోగలం. అలాగే చిన్న చిన్న గొడవల్లో కూడా చంటి ఇన్వాల్వ్ అయ్యాడు. నిజానికి రేవంత్, ఇనయా వంటి వారితో పోలిస్తే చంటికి హౌస్ లో ఉన్న గొడవలు పెద్దవేం కాదు. వీరిద్దరే చాలా ఫైట్ చేస్తూ నిలబడుతున్నారు. కానీ చంటి ఒకరిద్దరితో ఉన్న గొడవలు పడలేక, హౌస్‌లో ఇమడలేక బయటికి వచ్చేయడం కాస్త వింతగానే ఉంది.