Wedding Diaries Trailer: బిగ్ బాస్ ఫేమ్ అంబటి అర్జున్ హీరోగా ‘వెడ్డింగ్ డైరీస్’ - మూవీ ట్రైలర్ చూశారా?

బిగ్ బాస్ ఫేమ్ అంబటి అర్జున్, చాందిని తమిళరసన్ హీరో, హీరోయిన్లుగా నటించిన తాజా చిత్రం ‘వెడ్డింగ్ డైరీస్’. త్వరలో ఈ మూవీ ప్రేక్షకుల ముందకు రానున్న నేపథ్యంలో మేకర్స్ ట్రైలర్ ను విడుదల చేశారు.

‘వెడ్డింగ్ డైరీస్‘ మూవీలో అర్జున్, చాందిని

Source : Nivriti Vibes/Instagram

Wedding Diaries Trailer Release: బిగ్ బాస్ ఫేమ్ అర్జున్ అంబటి హీరోగా వెంకటరమణ మిద్దె దర్శకత్వంలో తెరకెక్కిన తాజా చిత్రం ‘వెడ్డింగ్ డైరీస్’. చాందిని తమిళరసన్ హీరోయిన్ నటిస్తోంది. ఎమ్ వి ఆర్ స్టూడియోస్ బ్యానర్ లో డాక్టర్ మిద్దె విజయవాణి ఈ కుటుంబ కథా చిత్రాన్ని సమర్పిస్తున్నారు. ఇప్పటికే అన్ని కార్యక్రమాలను పూర్తి చేసుకున్న ఈ మూవీ త్వరలో విడుదల కాబోతోంది. ఈ నేపథ్యంలో మూవీ ట్రైలర్ ను ఆస్కార్ విన్నింగ్ లిరిసిస్ట్ చంద్రబోస్ విడుదల చేశారు.  

ఆకట్టుకుంటున్న ‘వెడ్డింగ్ డైరీస్’ ట్రైలర్

బుల్లితెరపై తనకంటూ ఓ ప్రత్యేక గుర్తింపు తెచ్చుకున్న అంబటి అర్జున్, బిగ్ బాస్ రియాలిటీ షోలో కంటెస్టెంట్ గా పాల్గొన్న తర్వాత బాగా పాపులర్ అయ్యాడు. ఇప్పటికే హాట్ స్టార్ కోసం ‘అగ్నిసాక్షి’ అనే వెబ్ సిరీస్ లోనూ నటించారు. ఇప్పుడు ‘వెడ్డింగ్ డైరీస్’ మూవీతో హీరోగా మరోసారి ప్రేక్షకుల ముందుకు రానున్నారు. ఈ సినిమాలో చాందిని, అర్జున్ భార్య, భర్తలుగా నటిస్తున్నారు. ఈ ట్రైలర్ లో ఈ జంట మధ్య కెమిస్ట్రీ బాగా ఆకట్టుకుంది. చాందిని అందంగా కనిపించడంతో పాటు గ్లామరస్ గా అలరించింది. అర్జున్ క్యారెక్టర్ అద్భుతంగా ఆకట్టుకుంటోంది. నిరాశతో కూడిని భర్త పాత్రలో అర్జున్ చక్కగా ఒదిగిపోయి నటించాడు. ఈగోల కారణంగా ఓ జంట విడిపోయేందుకు ఎలా సిద్ధం అయ్యారు? చివరకు ఏమైంది? అనేది చూపించారు. ఈ ట్రైలర్ ప్రేక్షకులను బాగా ఆకట్టుకుంటోంది. సినిమాపై అంచనాలు పెంచుతోంది.

ట్రైలర్ ఆసక్తికరంగా ఉంది- చంద్రబోస్

ట్రైలర్ రిలీజ్ తర్వాత గీత రచయిత చంద్రబోస్ ఈ సినిమా గురించి ఆసక్తికర వ్యాఖ్యలు చేశారు. “‘వెడ్డింగ్ డైరీస్’ సినిమా ట్రైలర్ చాలా ఆసక్తికరంగా ఉంది. పెళ్లి తర్వాత చాలా అపార్థాలు కలుగుతాయి. అపోహలు వస్తుంటాయి. కానీ, ఎల్లప్పుడూ ఉండవు. శాశ్వతంగా నిలిచేది వైవాహిక బంధం ఒక్కటే అనే కథతో ఈ సినిమాను అద్భుతంగా తెరకెక్కించారు. ఈ సినిమా మంచి విజయాన్ని సాధించాలని కోరుకుంటున్నాను. అంబటి అర్జున్, చాందిని చక్కగా నటించారు. దర్శకుడికి నా శుభాకాంక్షలు. ఈ సినిమాకు ప్రేక్షకులు మంచి విజయాన్ని అందించాలని కోరుకుంటున్నాను” అన్నారు.

ఈ సినిమా పెళ్లి మీద ఉన్నవిలువను వివరిస్తుంది- వెంకటరమణ

‘వెడ్డింగ్ డైరీస్’ మూవీ మంచి కుటుంబ కథా చిత్రం అన్నారు నటుడు అర్జున్ అంబటి. ప్రతి ఒక్కరు కచ్చితంగా చూడాల్సిన సినిమా అన్నారు. వివాహ జీవితంలో ఎదురయ్యే ఇబ్బందులు, సమస్యలను ఓ జంట ఎలా ఎదుర్కొంటుంది అనేది ఈ సినిమాలో చూపించినట్లు దర్శక, నిర్మాత వెంకటరమణ తెలిపారు. ప్రేక్షకులు ఇలాంటి సినిమాలను ఆదరించాలని కోరారు.   

ఆగష్టు 23న ‘వెడ్డింగ్ డైరీస్’ విడుదల

‘వెడ్డింగ్ డైరీస్’ మూవీ ఈ నెల 23న ప్రేక్షకుల ముందుకురానుంది. ఈ సినిమాకు మదీన్ ఎస్కే స్వరాలు సమకూర్చారు. ఈ చిత్రానికి ఈశ్వర్‌వై సినిమాటోగ్రఫీని అందించారు. ఈ చిత్రంలో చమ్మక్ చంద్ర, మేకా రామకృష్ణ, రవితేజ కీలక పాత్రలు పోషించారు.