Arrest Warrant: కొడాలి నాని, వంగవీటి సహా పలువురికి షాక్! వారిపై అరెస్ట్ వారెంట్ జారీ చేసిన కోర్టు

2016లో ప్రత్యేక హోదా కోసం ధర్నా చేసిన వారిలో వీరు కోర్టుకు హాజరు కాలేదని అరెస్ట్ వారెంట్ జారీ అయింది.

కొడాలి నాని (ఫైల్ ఫోటో)

వైఎస్ఆర్ సీపీ నేతలు కొడాలి నాని, పార్థసారథి, అడపా శేషులకు అరెస్ట్ వారెంట్ జారీ చేశారు. టీడీపీ నేత వంగవీటి రాధాకు ఈ వారెంట్ జారీ అయింది. 2016లో ప్రత్యేక హోదా కోసం ధర్నా చేసిన వారిలో వీరు కోర్టుకు హాజరు కాలేదని అరెస్ట్ వారెంట్ జారీ అయింది. వీరు కోర్టుకి రాకపోవడంపై కోర్టు ధిక్కారం కింద ఆగ్రహం వ్యక్తం చేసిన ప్రజా ప్రతినిధుల న్యాయస్థానం కొడాలి నానిపై అరెస్ట్ వారెంట్ ను అమలు చేయాలని ఆదేశాలు జారీ చేసింది.

తెలుగుదేశం పార్టీ అధికారంలో ఉన్న సమయంలో ప్రత్యేక హోదా అంశంపై అప్పటి ప్రభుత్వం విపరీతంగా పోరాటం చేసిన సంగతి తెలిసిందే. ఈ అంశంపై కొడాలి నాని 2016లో విజయవాడ నగరంలో ఒక ర్యాలీ నిర్వహించారు. 2016 మే 10వ తేదీన విజయవాడ తుమ్మలపల్లి కళాక్షేత్రం నుంచి మాజీ మంత్రి కొలుసు పార్థసారధితో పాటు ఇంకొందరితో ర్యాలీ చేశారు. అనుమతి లేకున్నా కూడా వన్ వేలో ఈ ర్యాలీ చేపట్టారు. దీంతో పోలీసుల ఉత్తర్వులను ఉల్లంఘించి ట్రాఫిక్ కు తీవ్ర అంతరాయం కలిగించారని ఆరోపణలతో అప్పుడు కొడాలి నానిపై గవర్నర్ పేట పోలీస్ స్టేషన్‌లో కేసు నమోదు అయింది.

ఈ కేసు విచారణకు కొడాలి నాని సహా ర్యాలీలో పాల్గొన్నవారు కోర్టుకు హాజరు కాకపోవడంతో కోర్టు అరెస్ట్ వారెంట్ జారీ చేసింది. 2023 జనవరి 5వ తేదీ నుంచి ఈ కేసు పెండింగ్ లో ఉంది. కేసు వాయిదాలకు కోర్టుకు కొడాలి నాని హాజరు కావడం లేదు. దీంతో తాజాగా అరెస్టు వారెంట్ జారీ అయింది.