Chandrababu Naidu Meets PM Modi: ప్రధాని మోదీ, అమిత్ షాతో సీఎం చంద్రబాబు భేటీ - ఎన్నికల కమిషన్ అంశంపై చర్చించారా?
PM Modi Chandrababu Meeting: ఢిల్లీ పర్యటనలో ప్రధాని నరేంద్ర మోదీ, అమిత్ షా, సీఆర్ పాటిల్, పియూష్ గోయల్‌లతో సీఎం చంద్రబాబు వరుస భేటీలు నిర్వహించారు. పోలవరం, అమరావతి, విశాఖ మెట్రోపై పలు కీలక అంశాలపై చర్చించారు.
Chandrababu Naidu: ఆంధ్రప్రదేశ్ ముఖ్యమంత్రి నారా చంద్రబాబు నాయుడు రెండు రోజుల హస్తిన పర్యటనలో భాగంగా గురువారం ప్రధానమంత్రి నరేంద్ర మోదీతో పాటు పలువురు కేంద్ర ముఖ్య మంత్రులతో వరుసగా సమావేశమయ్యారు. ఢిల్లీలోని లోక్‌కల్యాణ్ మార్గ్‌లోని ప్రధాని నివాసంలో జరిగిన ఈ భేటీ అత్యంత ప్రాధాన్యత సంతరించుకుంది. రాష్ట్ర విభజన హామీలు, మౌలిక వసతుల కల్పన, అమరావతి రాజధాని నిర్మాణం, విశాఖ మెట్రో రైల్ ప్రాజెక్ట్, విశాఖ బీచ్ కారిడార్ మరియు కేంద్రం నుంచి రావాల్సిన వివిధ ఆర్థిక సహాయాలపై ప్రధాని మోదీతో సీఎం చంద్రబాబు లోతుగా చర్చించారు. రాష్ట్ర పునర్నిర్మాణంలో కేంద్రం అందిస్తున్న నిరంతర సహకారానికి ప్రధానికి ఆయన ప్రత్యేక ధన్యవాదాలు తెలియజేశారు.
Chief Minister of Andhra Pradesh, Shri @ncbn met Prime Minister @narendramodi. @AndhraPradeshCM https://t.co/zEBH59xDNn
— PMO India (@PMOIndia) October 8, 2026
ఈ ఢిల్లీ పర్యటనలో భాగంగా సీఎం చంద్రబాబు కేవలం ప్రధానితోనే కాకుండా కేంద్ర హోంశాఖ మంత్రి అమిత్ షాతోనూ ప్రత్యేకంగా సమావేశమయ్యారు. రాష్ట్రంలో ప్రస్తుత శాంతిభద్రతల పరిస్థితి, కేంద్ర-రాష్ట్ర సమన్వయం, త్వరలో జరగనున్న స్థానిక సంస్థల ఎన్నికలు , రాష్ట్రాభివృద్ధికి సంబంధించిన భద్రతాపరమైన అంశాలపై అమిత్ షాతో చర్చలు జరిపారు. ఏపీ విజ్ఞప్తులపై సానుకూలంగా స్పందించిన హోంశాఖ, కేంద్రం నుంచి అన్ని రకాల మద్దతు ఉంటుందని భరోసా ఇచ్చింది.
అలాగే, కేంద్ర జలశక్తి శాఖ మంత్రి సి.ఆర్. పాటిల్‌తో సీఎం చంద్రబాబు భేటీ అయి రాష్ట్రంలో నీటిపారుదల ప్రాజెక్టులపై చర్చించారు. పోలవరం ప్రాజెక్టు నిర్దేశిత సమయానికి పూర్తి చేసేందుకు నిధుల విడుదల వేగవంతం చేయాలని, రూ. 30,000 కోట్లతో చేపట్టిన జల్ జీవన్ మిషన్ - అమరజీవి జలధార పనులకు త్వరితగతిన ఆర్థిక సహాయం అందించాలని కోరారు. వీటికి తోడు, గోదావరి-కావేరి అనుసంధానంతో పాటు దక్షిణ భారతదేశంలోని ఐదు ప్రధాన నదుల గోదావరి, కృష్ణా, తుంగభద్ర, పెన్నా, కావేరి అనుసంధానంపై సీఆర్ పాటిల్‌కు సవివరమైన ప్రణాళికను అందించారు.
పర్యటనలో భాగంగా కేంద్ర వాణిజ్య, పరిశ్రమల శాఖ మంత్రి పియూష్ గోయల్‌తో కలిసి సీఐఐ పార్టనర్‌షిప్ సమ్మిట్ 2026 కర్టెన్ రైజర్ కార్యక్రమంలో సీఎం పాల్గొన్నారు. నవంబర్ 12–13 తేదీల్లో విశాఖపట్నంలో జరగనున్న గ్లోబల్ ఇన్వెస్ట్‌మెంట్ సదస్సుకు కేంద్ర ప్రభుత్వ సహకారాన్ని, అంతర్జాతీయ పారిశ్రామికవేత్తల ప్రాతినిధ్యాన్ని ఆహ్వానించారు. మరోవైపు, కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీతో సమావేశమై జాతీయ రహదారుల విస్తరణ, విశాఖ-భోగాపురం బీచ్ కారిడార్ మరియు వివిధ ఎక్స్‌ప్రెస్ వేల అనుమతులపై విజ్ఞప్తులు సమర్పించారు.
కేంద్ర హోం మంత్రి శ్రీ అమిత్ షా తో గౌరవ ముఖ్యమంత్రి శ్రీ నారా చంద్రబాబు నాయుడు నేడు ఢిల్లీ లో భేటీ అయ్యారు. రాష్ట్రావికి సంబంధించి పెండింగులో ఉన్న వివిధ సమస్యలను పరిష్కరించాలని కోరారు. @ncbn @AmitShah https://t.co/cYzXejNKY8
— CMO Andhra Pradesh (@AndhraPradeshCM) October 8, 2026
సీఎం చంద్రబాబు జరిపిన ఈ రెండ్రోజుల హస్తిన పర్యటన ఏపీ ప్రయోజన సాధన దిశగా అత్యంత సానుకూలంగా సాగింది. ప్రధానమంత్రి మోదీ మొదలుకొని కీలక శాఖల కేంద్ర మంత్రుల వరకు అందరితో జరిపిన చర్చలు రాష్ట్రాభివృద్ధికి, మౌలిక వసతుల నిధుల సమీకరణకు కొత్త ఊపునిచ్చాయని రాజకీయ విశ్లేషకులు భావిస్తున్నారు.
టాప్ హెడ్ లైన్స్
ట్రెండింగ్ వార్తలు
