AP SGST Growth: వ్యాపారాలు జోరందుకున్నా ఎస్‌జీఎస్టీ ఎందుకు పడిపోయింది? ఏపీ ఖజానాకు అసలు షాక్ ఎక్కడ తగిలింది?
AP GST Revenue Fall: ఏపీ ఎస్‌జీఎస్టీ వసూళ్లలో మైనస్ 7 శాతం నమోదైంది. అభివృద్ధి పనులు జరుగుతున్నా, వ్యాపారాలు జోరందుకున్నట్లు కనిపించినా ప్రభుత్వ ఖజానాకు ఆదాయం ఎందుకు రాలేదు?
CAG AP Revenue Report: ఆంధ్రప్రదేశ్‌లో ప్రభుత్వం మారిన తర్వాత పరిశ్రమలు వస్తున్నాయని, నిర్మాణ రంగానికి ఊపొచ్చిందని, వ్యాపార లావాదేవీలు క్రమంగా పుంజుకుంటున్నాయని అధికార వర్గాలు చెబుతున్న తరుణంలో.. కంప్ట్రోలర్ అండ్ ఆడిటర్ జనరల్ , కేంద్ర జీఎస్టీ పోర్టల్ విడుదల చేసిన తాజా గణాంకాలు ప్రభుత్వానికి ఊహించని షాక్ ఇచ్చాయి. 2025-26 ఆర్థిక సంవత్సరపు తొలి త్రైమాసికం ఏప్రిల్-జూన్లో రాష్ట్ర సొంత వస్తు సేవల పన్ను రాబడి ఏకంగా మైనస్ 7 శాతం క్షీణించింది. పన్నుల ద్వారా వచ్చే ఆదాయం గతేడాది కంటే పెరగాల్సింది పోయి, ఏకంగా నెగెటివ్ గ్రోత్‌లోకి జారిపోవడం ఆర్థిక నిపుణులను, ప్రభుత్వ వర్గాలను విస్మయానికి గురిచేస్తోంది.
ఎందుకింత తేడా?
మార్కెట్లో కనిపిస్తున్న సందడికి, ప్రభుత్వ ఖజానాకు చేరే నికర రాబడికి మధ్య ఎందుకు ఇంత భారీ అంతరం ఏర్పడిందనేదే ఇప్పుడు ప్రధాన ప్రశ్న. ఒకవైపు నిర్మాణ పనులు వేగం పుంజుకోవడం, ఇసుక పాలసీ మార్పులు, వ్యాపారాల్లో కొనుగోళ్లు మెరుగైనట్లు క్షేత్రస్థాయిలో కనిపిస్తున్నప్పటికీ.. పన్నుల లెక్కల్లో ఆ గ్రోత్ కనిపించకపోవడం వెనుక ప్రధానంగా సాంకేతిక, ప్రక్రియపరమైన లొసుగులు ఉన్నాయని చెబుతున్నారు. వ్యాపారాలు జరిగినంత మాత్రాన పన్నులు వెంటనే ప్రభుత్వ ఖాతాలోకి జమ కావు. ముఖ్యంగా వర్తకులు గతంలో నిలిచిపోయిన పెద్దమొత్తం ఇన్‌పుట్ ట్యాక్స్ క్రెడిట్ క్లెయిమ్ చేసుకోవడం వల్ల ప్రస్తుత త్రైమాసికంలో చెల్లించాల్సిన నికర నగదు పన్ను నామమాత్రంగా మారిపోయింది.
ఆర్థికపరమైన లెక్కల చిక్కులు
మరో ప్రధాన కారణం ఐజీఎస్టీ సెటిల్‌మెంట్లలో జరిగిన తీవ్రమైన జాప్యం. ఏపీ ప్రధానంగా ఇతర రాష్ట్రాల నుంచి సరుకులను ఎక్కువగా దిగుమతి చేసుకునే వినియోగ ఆధారిత రాష్ట్రం. పొరుగు రాష్ట్రాల నుంచి వచ్చే వస్తువులపై కేంద్రం వసూలు చేసే ఐజీఎస్టీ నిధులను రాష్ట్రాలకు క్రమం తప్పకుండా సెటిల్ చేయాల్సి ఉంటుంది. అయితే ఈ తొలి త్రైమాసికంలో కేంద్రం నుంచి రాష్ట్రానికి రావాల్సిన ఐజీఎస్టీ సెటిల్‌మెంట్లు సమయానికి కాగ్ ఖాతాల్లో సర్దుబాటు కాకపోవడం వల్ల, కాగితాలపై రాష్ట్ర సొంత ఎస్‌జీఎస్టీ వసూళ్లు తక్కువగా రికార్డయ్యాయి. వస్తువుల వినియోగం పెరిగినా, కేంద్ర సెటిల్‌మెంట్లలో జాప్యం జరిగితే ఆ ప్రభావం నేరుగా రాష్ట్ర లెక్కల్లో పతనంగా కనిపిస్తుంది. పొరుగు రాష్ట్రాలతో పోల్చినప్పుడు ఈ తేడా మరింత స్పష్టంగా, ఆందోళనకరంగా బయటపడుతోంది. పక్కనే ఉన్న తెలంగాణలో తొలి త్రైమాసికంలో ఎస్‌జీఎస్టీ వృద్ధి ఏకంగా ప్లస్ 16 శాతంగా నమోదు కాగా, కర్ణాటక , కేరళ , మహారాష్ట్ర వంటి రాష్ట్రాలు రెండంకెల స్థాయిలో పన్ను రాబడిని పెంచుకున్నాయి. ఒకే దేశం, ఒకే రకమైన జీఎస్టీ చట్టాలు ఉన్నప్పటికీ తమిళనాడు , రాజస్థాన్ , ఒడిశాలతో పాటు ఏపీ కూడా మైనస్ గ్రోత్‌లోకి పడిపోవడం చూస్తే.. ఇతర రాష్ట్రాలు తమ తయారీ, సేవా రంగాల నుంచి నగదు రూపేణా పన్ను రాబడిని రాబట్టుకుంటున్న వేళ, ఏపీ మాత్రం పన్ను వసూళ్ల వ్యవస్థలో లీకేజీలు, రిటర్న్స్ పరిశీలనలో వెనుకబడిపోయిందని స్పష్టమవుతోంది.
ప్రభుత్వం జాగ్రత్త పడాల్సిందే
దీనికి తోడు క్షేత్రస్థాయిలో వ్యాపారాలు జరుగుతున్నా.. అవి పన్ను నెట్‌వర్క్‌లోకి పూర్తిగా రాని అసంఘటిత లావాదేవీలుగానే మిగిలిపోతున్నాయన్న ఆరోపణలు ఉన్నాయి. రిటైల్ మార్కెట్లో చాలావరకు బిల్లులు లేకుండా జరిగే అమ్మకాలు, చెక్‌పోస్టులు లేకపోవడం వల్ల ఇతర రాష్ట్రాల నుంచి పన్ను ఎగవేసి వచ్చే అక్రమ సరుకు రవాణాను కట్టడి చేయడంలో వాణిజ్య పన్నుల శాఖ తగినంత దూకుడు ప్రదర్శించలేకపోతోందనే విమర్శలు వినిపిస్తున్నాయి. ప్రభుత్వం కొత్త ప్రాజెక్టులు, పెట్టుబడుల ఒప్పందాలు చేసుకుంటున్నప్పటికీ, అవి పూర్తిస్థాయిలో ఉత్పత్తి దశకు వచ్చి పన్నులు సమకూరేందుకు కొంత సమయం పడుతుందన్నది వాస్తవమే అయినా, ఇప్పటికే ఉన్న మార్కెట్ నుంచి రావాల్సిన పన్నులు జారిపోవడం యంత్రాంగ లోపమేనని చెప్పాలి. ఈ మైనస్ 7 శాతం పతనం రాబోయే బడ్జెట్ నిర్వహణపై, ప్రభుత్వ సంక్షేమ పథకాల అమలుపై తీవ్ర ఒత్తిడి తెచ్చే ప్రమాదం ఉంది. ఉచిత పథకాలు, సూపర్ సిక్స్ హామీలకు వేల కోట్ల రూపాయల నిధులు అవసరమైన ప్రస్తుత పరిస్థితుల్లో.. సొంత పన్నుల రాబడే పడిపోతే అప్పులపై ఆధారపడటం మినహా మరో దారి ఉండదు. ఇప్పటికైనా ప్రభుత్వం మేల్కొని ఐటీసీ క్లెయిమ్‌లపై క్షేత్రస్థాయి ఆడిటింగ్ నిర్వహించడం, ఐజీఎస్టీ సెటిల్‌మెంట్లను కేంద్రంతో సమన్వయం చేసుకుని త్వరితగతిన తెచ్చుకోవడం, జీఎస్టీ ఎగవేతలపై నిఘా పెంచడం వంటి చర్యలు చేపట్టకపోతే ఖజానా మరింతగా లోటులోకి జారుకోవడం ఖాయమన్న ఆందోళన వ్యక్తమవుతోంది.
టాప్ హెడ్ లైన్స్
ట్రెండింగ్ వార్తలు
