T20 World Cup 2021 Schedule: అభిమానులారా... గుడ్‌న్యూస్... రేపే ICC T20 ప్రపంచకప్ షెడ్యూల్

ప్రపంచంలోని క్రికెట్ అభిమానులకు గుడ్‌న్యూస్. ఎంతో ఆసక్తిగా ఎదురుచూస్తోన్న T20 ప్రపంచకప్ షెడ్యూల్‌ని ICC రేపు (ఆగస్టు 17న) అధికారికంగా ప్రకటించనుంది. 

ఒకే గ్రూప్‌లో భారత్, పాకిస్థాన్ 

యూఏఈ, ఒమన్‌ వేదికగా ఈ ఏడాది అక్టోబర్‌ 17 నుంచి నవంబర్‌ 14 వరకు T20 ప్రపంచకప్ జరగనుంది. ఈ నేపథ్యంలో ఇప్పటికే ICC ప్రపంచకప్‌ 2021 డ్రాను విడుదల చేసింది. ర్యాంకింగ్స్ ఆధారంగా మొత్తం ఎనిమిది జట్లు నేరుగా ప్రపంచకప్‌కు అర్హత సాధించగా, మరో ఎనిమిది జట్లు క్వాలిఫయర్స్‌ బెర్త్‌ ఖరారు చేసుకున్నాయి. రెండు రౌండ్లుగా ఈ మెగా టోర్నీ జరగనుంది. తొలి రౌండ్‌లో క్వాలిఫయర్ మ్యాచ్‌లు నిర్వహించనున్నారు. రెండో రౌండ్‌లో సూపర్-12 పద్దతిలో లీగ్ మ్యాచ్‌లు జరగనున్నాయి.

12 దేశాలను రెండు గ్రూప్‌లుగా విభజించారు. ఇక టోర్నీ లీగ్ దశలోనే భారత్, పాకిస్థాన్ తలపడనున్నాయి. ఈ రెండు జట్లు ఒకే గ్రూప్‌లో ఉన్నాయి. గ్రూప్ 2లో భారత్, పాకిస్థాన్‌తో పాటు న్యూజిలాండ్, అఫ్గానిస్థాన్ ఉండగా.. మరో రెండు దేశాలు క్వాలిఫయర్స్ మ్యాచ్‌లు ఆడి చోటు దక్కించుకోనున్నాయి.

ఇక డిఫెండింగ్ ఛాంపియన్ వెస్టిండీస్, ఇంగ్లండ్, ఆస్ట్రేలియా, దక్షిణాఫ్రికా గ్రూప్ - 1లో ఉన్నాయి. క్వాలిఫయర్స్ ఆడిన రెండు దేశాలు ఈ గ్రూప్‌లో చేరనున్నాయి. టీమ్ ర్యాంకింగ్స్ ద్వారా గ్రూప్‌లను విభజించినట్లు ఐసీసీ ప్రకటించింది. '2021 మార్చి 20 నాటి టీమ్ ర్యాంకింగ్స్ ఆధారంగా గ్రూప్స్‌ను విభజించడం జరిగింది.  శ్రీలంక, బంగ్లాదేశ్‌తో పాటు మొత్తం 8 జట్లు క్వాలిఫయర్స్ మ్యాచ్‌లు ఆడనున్నాయి. ఈ క్వాలిఫయర్స్ మ్యాచ్‌లను కూడా రెండు గ్రూపులుగా విభజించడం జరిగింది. ఐర్లాండ్, నెదర్లాండ్స్, నమిబియా, శ్రీలంక గ్రూప్-ఏలో ఉండగా.. ఓమన్, స్కాట్లాండ్, పీఎన్‌జీ, బంగ్లాదేశ్ గ్రూప్‌బీలో ఉన్నాయి.'అని ఐసీసీ తమ ప్రకటనలో పేర్కొంది.

భారత్-పాక్ మధ్య నెలకొన్న సరిహద్దుల ఉద్రిక్తతల కారణంగా ద్వైపాక్షిక సిరీస్‌లు జరగడం లేదన్న విషయం తెలిసిందే. కేవలం ఐసీసీ టోర్నీల్లో మాత్రమే ఈ రెండు జట్లు తలపడతాయి. 2019 వన్డే ప్రపంచకప్ తర్వాత మరోసారి భారత్-పాక్‌లు టీ20 ప్రపంచకప్ లీగ్ దశలోనే తలపడనున్నాయి.

అక్టోబరు 24న భారత్Xపాకిస్థాన్

అక్టోబర్ 24 న భారత్, పాకిస్థాన్ ల మధ్య మ్యాచ్ ఉంటుందని ఐసీసీ ప్రతినిధి గతంలో వెల్లడించారు. దీనిపై రేపు అధికారిక ప్రకటన రానుంది. దుబాయ్ స్టేడియంలో  ఈ రెండు జట్ల మధ్య మ్యాచ్ జరగనున్నట్లు సమాచారం. గత రెండేళ్లుగా ఇండియా, పాకిస్ధాన్ జట్ల మధ్య క్రికెట్ మ్యాచ్‌లు జరగలేదు. 2019 వన్డే వరల్డ్ కప్‌లో ఇరు జట్లు చివరిసారిగా తలపడ్డాయి. మళ్లీ రెండేళ్ల తర్వాత టీ-20 ప్రపంచకప్‌లో దాయాదులు తలపడనున్నారు. దీంతో, ఈ మ్యాచ్ కోసం క్రికెట్ లవర్స్ ఎంతో ఆసక్తిగా ఎదురుచూస్తున్నారు.